SA KARON nga nabutang ang tanan sa tunga sang kapigaduhon bangud sang pandemya, ang ano man nga bulig, ginaabi-abi gid. Basta nagapamigado ka, kun kaisa wala ka na nagapaminsar kun ano ang intension sang nagabulig.
Subong malapnagon ang pagtukod sang mga community pantries sa bug-os nga Pilipinas bilang pagpakita snag pagbinuligay. Kilala kita sa pagkamainunungon sa ti-on sang kalalat-an. Ini nga hilikuton gin-ilog na sang Timor Leste.
Masubo lang ugaling kay ang intension gina-question sang atun gobyerno. Masakit matuod kun paagi sa paghulag sang iban nakita ang imo kakulangan. Kun ang adbokasiya sang iban nagahatag sang mas maathag nga laragway sang imo kakulangan, masakit gid man sa bugal.
Kun tani sining panahon sang kapipit-an, ang atun paminsaron amo ang pagbinuligay. Ang sin-o man nga ang katuyuan amo ang pagbulig dapat abi-abihon. Indi na kita magduda sang katampad sang ila bulig. Bisan ano man ang ila panindugan kun ang pagbulig tampad sa ila dughan, balewala na ang kawsa nga nagabahin sa tanan.
Atun tandaan nga ang Pilipino, bisan kaaway, handa nga magbulig basta makita nga ara sa kabudlayan. Ginapahigad ang kasakit sang buot agud makahatag sang alibyo sa isigkapareho.
Diri sa Iloilo ang mga barangays kag hubon sang kabataan nagpanguna na sa pagtukod sang mga community pantries. Nahuman ini gikan sa bulig kag donasyon sang iban nga may sobra sa ila pangabuhi. Ini nagapakita nga ang mga Pilipino, bisan magkatuhay ang estado sang kabuhi, handa nga magbulig.
Mangin halimbawa kuntani ini sa gobyerno nga bisan magkatuhay ang panindugan kag kaangtanan politikal, ginaabi-abi ang pagbulig. Wala nagapaindis-indis ang tawo sa gobyerno. Ang tuyo sini amo nga makabulig agud maghagan-hagan ang ginabatyag nga kabug-at sang kabuhi.
Ang away, awayon sa tuhay nga higayun. Ang pagbulig, abi-abihon sa tanan nga ti-on./PN
