OKEY ining community pantry, nga isa ka version sang Bayanihan sa pagbinuligay. In fact, duna gani ini nga pamatasan pang-komunidad sang mga Filipino.
Diri ginabaton ang mga bulig sang may ikasarang para sa isigkapareho nga nagakinahanglan sing dayon nga bulig sunu sa ila pagkinahanglan sa ila panimalay sa amo nga tion.
Indi katingalahan nga nag-popular dayon ining community pantry nga ginsuguran sang Maginhawa Community Pantry sa Quezon City.
In fact, sugod sadtong pagtukod sini sadtong Abril 19, madasig na nga nag-ululhot ang mga ini sa iban nga bahin sang pungsod. Pati ang mga media outlets nag-ulupod na.
Natural man lang nga mag-popular ini. Madale mag-popular ang isa ka bagay nga bag-o, ukon madugay na nga nalipatan apang liwat nagtuhaw, nga nagapakita dayon sing pagka-mapuslanon sa mga tawo, labi na gid kon makabulig dayon katulad sa ini nga panahon sang pandemic (COVID-19), kon diin madamo ang wala sing trabaho ukon nagakita sing kulang sa ila kinahanglanon.
Sa nasiling ta na gani, duna na nga binatasan sang mga Filipino ang pagbinuligay sang magkasilingan, labi na gid sa mga kubos nga panimalay, sang pwede nila mahulam, ukon mapangayo, nga pila ka bagay nga nawad-an sila kag kinahanglan dayon.
Sa ini nga binatasan, nagahulamay ukon nagapangayuay ang magkasilingan sing asin, kalamay, panimpla sa tinola nga katumbal, sibuyas, patis kag bisan pa gani bugas nga tilig-angon, ukon ano pa.
In fact, kon basehan mo ini sa ining pamatasan sang pagbinuligay sang magkasilingan, ang community pantry wala sing kinalis sa sining duna nga pamatasan.
Ginpalapad lang ining magkasilingan nga pagbinuligay sang community pantry. Sa lugar nga magpalapit ka sa pihak balay sang imo dayon nga kinahanglanon, may kadtuan ka na nga pwesto kon diin madamo na ang makahatag kag makapangayo sang kinahanglanon.
In other words indi bag-o nga ideya ining community pantry. Daan na ini nga ideya sang pagbinuligay sang magkasilingan nga ginpalapad lang ang gahatag bulig kag ang maka-benepisyo agud matawag na nga community pantry.
***
Ang problema ugaling kay nangin kontrobersyal ini tungod sa palpak nga approach sang kapulisan.
Sala ang ila priority approach, kon diin naggwa pa nga sablag sila sa kaayuhan nga dulot sining community pantry sa mga pumuluyo.
Amo gani nga ang matag-as nga pamunuan sang kapulisan nagsaway na sa mga pulis sa indi nila tani ginhimo.
Si President Duterte, paagi sa iya spokesperson nga si Harry Roque, nagsaway man gani sa sining mga kapulisan agud pabay-an lang ang community pantry kon indi man lang ginagamit ini sa pagpakalain sa gobyerno sang mga progresibo nga mga grupo.
Ang report nagsiling nga ginakuhaan sang kapulisan sing ngalan ang mga organizer, kon ano ang ila organisasyon kag kon sin-o ang mga nagahatag sang mga produkto nga ginapanghatag, kag iban pa nga impormasyon.
Suno sa mga abogado indi dapat ini ginhimo sang kapulisan tungod sa ila kinamatarong sa “privacy”, ukon pang-kaugalingon nga impormasyon.
Sala gid man ining ginhimo sang kapulisan. Nag-focus ang kapulisan sa ila suspetso nga may malain nga agenda ang pila ka organizer – nga posible ini mga supporter sang “communist terrorists”, kag ang ila proyekto nga community pantry isa lang ka paagi sa pagpakalain sa gobyerno.
Siling ugaling sang kapulisan nga wala man sila sang malain nga tuyu sa ila mga ginapamangkot kundi agud maamligan mismo ang interes sang mga pumuluyo.
Nakamuno ugaling ang iban kon paano ini masiling sang kapulisan kay wala man gani ining nagapatigayon sang community pantry sing dala nga mga propaganda materials ukon pabutyag nga kontra sa gobyerno.
Ang husto tani ng approach amo ang una nga pag-focus sa mas importante naton nga problema batok sa COVID-19 – kon bala nagasunod ini sila sa minimum health protocol katulad sa paggamit sa face mask, ace shield, kag physical distancing, kag kon bala may permit ini, kon kinahanglan gid.
Ulihi na lang ang mga suspetso. May tion dira. Anyway kon wala man lang sila nagadala sang propaganda kontra gobyerno upod sa ila community pantry, wala man seguro sing malain da.
Sigeha lang ya ang inyo surveillance kag intelligence work. Makahulat ina. Pero indi ang aton problema sa COVID-19. Indi bala?/PN
