MADUGAY na nga ginplano sang Sangguniang Panlalawigan ng Iloilo ang pagbakal sang salakyan apang makapila ka beses man nga wala natigayon bangud sa pila ka mga sirkumstansya nga nagapalibot sa pagbakal sini.
Una nga ginplano sadtong 2018 apang wala nadayon bangud nga may mga bag-o nga katapo sang Provincial Board rason nga ginpaiway kag ginpursige sadtong 2019 nga naabtan man sang pandemya dala sang COVID-19 tubtub nga naghulat pa gid sang 2020 kag sa sini nga tuig.
Katuyuan lamang sini nga mapadasig ang pagdul-ong sang serbisyo sa mga pumuluyo gamit ang salakyan sang gobyerno.
Napondohan na ang plano nga pagbakal, nakapaidalom na sa proseso kag may pahanugot na gikan sa mga ahensya sang gobyerno nga naga-review sa sini nga plano.
Napaidalom naman ini sa deliberasyon sadto kag nakita nga may supisyente nga pondo para sa sini nga kinahanglanon. Ang paghibalo ko ang pondo ginapaidalom sa maid-id nga deliberasyon agud masiguro nga indi maapektuhan ang mga ginaprayoridad nga serbisyo sang Iloilo Provincial Government para sa mga pumuluyo.
Sadtong 2019, naghingyo ang Sangguniang Panlalawigan sang pondo gikan sa Office of the Governor para sa pagbakal sang 10 ka salakyan kag kapin sa tag-P2 million nga pondo para sa kada salakyan ang gin-aprubahan sang Department of Budget and Management.
Bangud sa sunlog sang pandemya, pito na lang imbis nga 10 ka salakyan ang posible nga pagabaklon sang Iloilo Provincial Government kon sa diin ang isa ang hulam-hulamon lang sang tatlo ka Ex-Officio Board Members samtang ang lima ang para sa lima man ka distrito ukon isa ka salakyan nga hulam-hulamon sang duha ka
Board Members sa kada distrito, kag ang isa naman ang para sa bise gobernador.
Ginpapili ang SP members kon ano nga sahi sang salakyan ang mas nagakaangay sa ila pagkinahanglan kag ang Sports Utility Vehicle ukon SUV ang napilian para sa 1st, 3rd, kag 4th districts kag sang opisina sang bise gobernador; pickup naman para sa 2nd kag 5th districts, kag van para sa mga ex-officio member.
Nahangpan ni Vice Gov. Christine “Tingting” Garin nga tuman ka daku sang kantidad kag bangud nga yara kita sa pandemya rason nga ini lang ang ila nahisugtan imbis nga painan gid ang kada nga katapo sang 13th Iloilo SP.
Maathag nga nagaulikid ang Iloilo Provincial Government sa kahimtangan sa karon kag mismo ang mga katapo sang 13th Iloilo SP ang naghatag sang ligwa agud nga indi maapektuhan ang pagpasulabi sa kinahanglanon sang mga pumuluyo.
Ginpasulabi nila ang pagpasar sang mga ordinansa nga makabulig gid sa mga pumuluyo sa sini nga panahon sang pandemya.
Ginpasar ang ordinansa nga nagahatag sang financial assistance para sa mga OFW, ang pagpahulam sang kwarta sa mga apektado nga negosyo kag mga nawad-an sang trabaho, kag ang pag-ulikid sa mga barangay tanod paagi sa paghatag sa ila sang financial assistance.
Ginpasulabi ang pagpasar sang pondo para sa pagbakal sang bakuna, pagpatindog sang molecular laboratory kag iban pa nga makapangapin sa pumuluyo batok sa COVID-19.
Ginpasulabi kag hatagan sang prayoridad sang 13th Iloilo SP ang kinahanglanon sang pumuluyo. Nagasakripisyo sa pagsebisyo bangud ini ang ila ginpasalig sa mga pumuluyo.
Kinahanglan ang salakyan kag daku nga bulig ini sa ila bangud nga tuman ka lapad sang probinsya sang Iloilo kag mas madamo nga barangay ang ginapadulungan.
Kinahanglan ang salakyan bangud sa karon nga pandemya nagakadapat nga idul-ong ang serbisyo sa tawo bangud sa limitado nga transportasyon. Kahibalo man ang tanan nga ginadumilian ang social gathering. Imbis nga tipunon sila sang tuman ka damo, dapat pahat-pahaton kag amat-amaton ang paghatag sa ila sang benepisyo, kag matigayon lamang ang madasig nga pagsaylo-saylo sa mga lugar kon may ginagamit nga salakyan.
May yara sang tatlo ka salakyan sa idalom sang Office of the Vice Governor kag maathag ini base sa record kag sa kumpirmasyon ni Provincial General Services Office Head Aaron Raymundo.
Ginalakipan ini sang Toyota Fortuner nga ginbakal sang 2015; Toyota Hi-lux pick up nga ginbakal sang 2014; kag Nissan van nga ginbakal sang 2018.
Nagaserbisyo pa ang ini nga mga salakyan, ginagamit pa ini kag nagagamit man sini ang mga board members kon kinahanglan nila sang salakyan para sa ila opisyal nga mga lakat kag hilikuton.
Ang gasolina kag maintenance sang sini nga mga service vehicle ang naka-charge sa Office of the Vice Governor.
Mismo ang GSO nagsiling nga wala sang service vehicle nga naka-assign sa mga Board Mmembers.
Sa bahin ni 1st District Board Member Renee Valencia, wala sang problema sa iya kon ipaiway ang plano nga pagbakal sang mga salakyan. Apang nagapati siya nga kinahanglan gid man nila ang service vehicles agud nga mapasanyog ang ila nga pagserbisyo.
Ginsiling sini nga may higayon man nga ginagamit sang mga board members ang service vehicle nga na-assign kay Vice Gov. Christine “Tingting” Garin ilabi na kun may kinahanglan sila nga kadtuan.
Sa bahin ni 4th District Board Member Domingo Oso, Jr., tuman ka inahanglanon ang pagbakal sang salakyan para sa mga board members sa probinsya sang Iloilo.
Ginpabutyag sini nga ang salakyan indi makabig nga luxury para sa ila kundi necessity. Natabuan lamang nga may pandemya sa karon nga panahon.
Mabudlay para sa isa ka board member nga wala sang mobility kag nahangpan ni Governor Defensor, Jr. ang ila katungdanan para sa pumuluyo.
Kinahanglanon ang salakyan para sa madasig kag epektibo nga pagserbisyo sa pumuluyo ilabi na karon nga may pandemya. (bertladera@gmail.com/PN)
