Balik poder si Presidente Duterte kon padag-on VP?

MADAMO ang indi sugot sa hingyo sang pila ka myembro sang PDP-Laban Party, kon diin party chairman si Presidente Duterte, nga padalaganon siya sa pagka-Bise Presidente sa palaabuton nga May 22 presidential election.

Isa na dira sa indi gid sugot amo ang abyan naton nga si Pedro.

Nahadlok ining aton abyan nga si Pedro sa “strongman rule”. In  fact, nag-upod siya sa minilyon nga mga pumuluyo sa “bloodless” Edsa Revolution nga gamit lang ang rosarito kag mga bulak agud ululuhan ang mga soldado sa pagtipyok kontra sa diktador nga si Marcos.

Wala na mahimo si Marcos sang pati ang mga soldado nag-upod na sa mga naga-rebelde nga mga pumuluyo sa pagpamuno sang balo ni Senador Ninoy Aquino nga si Cory. Upod sini sanday Constabulary chief Fidel Ramos kag Defense Secretary Juan Ponce Enrile.

Sang ginlusob na sang mga nagasinggitan nga mga pumuluyo ang Malakanyang, naghingagaw na gid lang sa paglayas si Marcos kag ang iya pamilya pa-Hawaii sadtong Pebrero 25, 1986.

Na-trauma seguro sang martial law, ginakahadlukan man ni Pedro ang pagdalagan ni Presidente Duterte  para Bise Presidente sa sining palaabuton nga eleksyon.

Nahadlok siya,  sunu sa iya, kon magdaug bilang ikaduha nga pangulo sang pungsod si Duterte. Posible kuno makabalik ini sa poder bilang Presidente nga ang authoritarian rule sini wala gid siya sing luyag.

Basi kuno ipapatay sang iya mga “fanatic” ang presidente nga indi kaugyon ni Duterte agud ibalik siya sa poder by succession bilang Bise Presidente kag ibalik man ang iya authoritarian nga klase sang pangginahum.

Man nagatakam-takam gid kuno ining mga “fanatic” sa “extrajudicial killings”nga daw mga vampira nga uhaw sa dugo. Daw mga wala man tinun-an nga mga hubog ini sila nga ordinaryo lang sa ila ang binastos nga sugilanon nga luyag pa nila mabatian sang mga kabataan – nga indi sang matarong nga mga ginikanan luyag matun-an nila!

Ngaa ayhan amo gid ini nga lider ang ila luyag? Seguro tungod idolo nila ang bandido nga klase sang baganihan.

Ina bala ang wala nagakilala sang kasuguan kundi ang makabalos ukon mapangapinan lang ang kaugalingon kag pamilya sa bisan paano nga paagi.

Kawsa man sining bandido nga baganihan ang mga lupig kon diin wala sing otoridad nga nagapangapin sa ila kag kon kis-a kaaway pa nila ining mga otoridad nga kaupod pa sang mga tulisan. Masami man gani patungdan sining bandido ng baganihan ining kaaway sang mga pumuluyo sang iya kaugot paagi sa masingki nga lenggwahe katulad sang “pu…ang ina mo!”

Well, kita mismo nakakilala sining gina-idolo sang madamo sa ila mga pelikula katulad ni Rudy Fernandez, Eddie Garcia, kag iban pa.

Siling gani sang iban nga ini nga klase sang baganihan ang ginasunod ni Presidente Duterte sa iya mga sugo sa pagpamatay sa mga suspetsado nga ang iban wala gani sing armas ukon luyag lang tani magsungka apang natiruhan patay gihapon sang mga trigger-happy nga mga pulis.

Segurado naton nga idolo man sang madamo ta nga pulis si Hollywood star Clint Eastwood sa iya mga pelikula, katulad sang Magnum Force, kon diin naga-play siya bilang judge-and-executioner sang mga kaaway sang kasuguan nga wala niya ginatagaan sing “due process” sunu sa ginasugo sang kasuguan.

Ti, ano na lang kon wala sing kasuguan? Masig-patyanay na lang kita sa isa ka “survival of the fittest” nga sitwasyon?

Salamat man ugaling nga sa pila sini ka pelikula may naga-play man sang role sang pulis nga matumanon sa kasuguan nga wala ginapasugtan si Detective Harry sa iya malain nga “personal mission”.

Batasan man gani ni Presidente Duterte ang mamuyayaw sang “pu…ang ina mo!” katulad ni Rudy Fernandez sa madamo sini nga pelikula.

Pwede lang, ugaling,  matabo ini sa pelikula kag indi sa aktwal nga pang-serbisyo sang aton mga opisyales sa gobyerno kag sang mga kapulisan tungod wala man sing mahalitan aktwal kay pelikula man lang ini.

Luas, of course, sa malain nga leksyon nga matun-an sang mga pumuluyo sa sining mga pelikula nga masami wala sing bawi nga moral lesson bisan sa hingapusan man lang nga bahin sang istorya.

Kon matabo ini nga binandido nga binatasan sa aktwal, siyempre indi pwede ina kag dapat may salabton ang nagahimo sini sa idalom sang aton kasuguan. Indi bala?/PN