BREAK anay kita sa COVID-19 nga topiko. Cool anay kita subong, mga kaabyanan. Ma-BTS fan kita anay bisan sa isa lang ka adlaw!
Ano bala ang kahulugan sang BTS? Ano gid ang BTS?
Suno sa akun pagpanalawsaw sa internet, ang kahulugan sang BTS amo ang “Bangtan Sonyeondan” nga kun sa Ingles pa means “Bulletproof Boy Scouts”. Pero may nagahaum-haum man nga ini nagakahulugan nga “Beyond The Scene”.
Kun ano man ang kahulugan sang BTS, indi na ina importante bangud bisan ang wala nakahangop sini, tuman gid ang paghangad sa ila.
Sanday sin-o ang kaupod sang grupo nga BTS?
Ini sila amo sanday Kim Tae-hyung (kilala sa tawag nga V), Jung Ho-seok (J-Hope), Kim Nam-joon (RM), Kim Seok-jin (Jin), Park Ji-min, Jeon Jung-kook, kag Min Yoon-gi (Suga).
Ang ila kanta may genre nga electronic, Hip-Hop, Pop, Rock, R&B kag Rap. May mga tema ini angut sa bullying, elitism, kag mental health. Ini nga mga topiko subong tuman ka init kag bisan sin-o sa atun nakaagi sini nga mga hitabu sa atun kabuhi. Amo gani siguro nga kun sa Ingles pa, “maka-relate” gid ang kadam-an.
Nahibaluan nyo bala nga masobra sa $3.6 billion ang ila naamot sa ekonomiya sang South Korea kada tuig kag ginabanta nga indi magnubo sa $1 billion ang ila kontribusyon sa consumer exports? Sa sini pa lang nga numero makasiling ka nga pwerte gid sila.
Tuman ang pagsikat sang BTS bangud wala sila nagsalig sa ila lamang kasikatan para makilala. Naggamit sila sang social media agud mas makakuha pa sang madamo nga mga fans. Indi lang fans kundi ginatawag ang ila kaugalingon nga BTS Army.
Paano sila makalikaw sa kontrobersiya sa tunga sang ila kasikatan?
Ang ila kabuhi madamo man sang limitasyon. Pero ini nga limitasyon nagapasiguro nga indi sila mangin biktima sang malain nga publisidad. Ginahimakasan sang ila kumpaniya nga indi sila maulamid sa mga negatibo nga hitabu kaangay sang aksidente sa salakyan, gani indi sila pwede makamaneho. Kun magpa-picture sa fans, dapat nakapataas ang kamot kag kun anu-ano pa nga mga bagay.
Ang maayo sa Korea bangud ang ila mga artists ginapasiguro nga malakip sa ila kasikatan ang promosyon sang ila kultura kaangay sang pagkaon, mga lugar nga matahum kag pagbinatasan. Dako ang ila nabulig sa mga indi na maayo nga kumpaniya sa Korea bangud sa ila nga pag-endorso, liwat nga nakabangon ini nga mga negosyo. Ini ang husto nga paggamit sang kasikatan. Kasikatan indi lang para sa kaugalingon nga kaayuhan, kundi may bulig sa kadam-an.
Kuntani kaangay man sini ang himuon sa atun pungsod. Ang sikat nga mga artista magbulig sa pagpabanghon sa atun ekonomiya.
Ang problema lang abi kay kun makapanukot gaalalawas bisan indi man gani sikat./PN
