NANGIN tatak sang administrasyon ni President Benigno Simeon “Noynoy” Aquino (PNoy) III ang “tuwid na daan” ukon ang tadlong nga dalan nga nagakahulugan nga matinlo nga pagdumalahan.
Nangin baliskad ini sa pamunuan ni President Gloria Macapagal-Arroyo (PGMA) nga iya ginsundan nga napun-an sang isyu sang kurapsyon. Nakasohan pa gani si PGMA sang indi kuno husto nga paggasto sang ponod sang Philippine Charity Sweepstakes Office.
Hunyo 24, 2021 nagtaliwan si PNoy. Sya ang ika 15th president sang Pilipinas. Sa iya panahon nahimo niya nga mabatak ang ekonomiya sang PIlipinas. Sa pagkamatuod ginakabig nga pinakamataas sugod sadtong 1970s ang gross domestic product (GDP) sang pungsod sa iya administrasyon.
Nangin estable ang lakait sang GDP halin 2010-2016 ukon sa umpisa tubtob sa pagtapos sang iya pamunuan.
Base sa data, ari ang GDP sa panahop ni PNnoy:
* 2010 – 7.6 percent
* 2011 – 3.7 percent
* 2012 – 6.8 percent
* 2013 – 7.2 percent
* 2014 – 6.1 percent
* 2015 – 5.9 percent
* 2016 – 6.9 percent
Ini tanan nagguba lang sang mag-abot na ang panahon sang election para sa 2016 presidential elections. Isyu sang droga, SAF44, tanim bala kag Priority Development Assistance Fund. Ini tanan ginhaboy sa iya pamunuan gani nagdaug ang mayor gikan sa Davao bangud sang pangako nga baliskado ini nga mga sitwas. (Ang masubo wala gid natuman.)
Apisar nga wala na sya sa pwesto padayun gihapon ang mga pakalain nga iya nabaton. Pero wala nagasabat kundi nagahipos lang. Siling sang iya utod nga si Pinky sa ila ginpaggwa nga statement: “Pabay-an lang sila kay mahamuok pa man ang iya katulugon kun gab-i.” Buot silingon matinlo ang iya kunsensya.
Bisan ang pahayag sang Palasyo, wala nagakilala sa kontribusyon ni PNoy sa pungsod magluwas lang sang pahayag nga “he gave his best to serve the country.”
Matapos ang 20216 elections madamo ang nagtalikod sa iya agud maluwas sa kabangis sang bag-o nga administrasyon. Subong nga nagtaliwan sya, may nagbalik naman sa pagdayaw sa iya bangud nakita nila nga nagapalugdang na ang barko sang karon nga administrasyon.
Sa makapila man ka beses nga naka-cover ako sang iya pagbisita sa Iloilo, wala ako sang nabati-an ukon nakita nga kaangas sa iya personalidad. Tanan nga pamangkot ginasabat sang diretso kag may punto. Wala sang salaay sang pamangkot. Kun ikaw katapo sang media, excited ka mamangkot sa iya.
Matuod nga isa sya ka marespeto nga tawo. May etikita, may dignidad!
Paalam PNoy!/PN
