NAGAHIMAKAS ang mga opisyales sang Barangay Bitoon sa distrito sang Jaro nga makapakig-angot sa tagdumalahan sang South Balibago Waterworks-Jaro Iloilo Branch agud nga makatilaw man sang ila nga serbisyo.
Madugay na nga nagasalig lang sa tasuk ukon sa bubon ang mga residente sang Barangay Bitoon bangud nga wala sang linya sang tubig ang nagalusot sa ila lugar kag wala sila sang mahimo kundi magpangita sang paagi nga makaangkon sang tubog sa matag-adlaw nga pagsinarayo.
Sa pila na ka dekada nga pagserbisyo sang Metro Iloilo Water District, kon kapila man sila mag-ilis sang ngalan, wala gid nakatilaw sang ila serbisyo ang mga residente sang sini nga barangay.
Nagsulod sa pag-operate ang Metro Pacific Iloilo Water, Inc. Ginpamangkot ko sila tuhoy sa ila serbisyo kag nagsabat sa electronic mail nga indi sakop sang ila franchise area ang ini nga barangay.
Kon ang nakasakop diri amo ang South Balibago Resources, Inc. (SBRI), nagakaangay lamang nga diri kita magapakig-angot kag hingyuon sila nga tumanon ang nasaad sa ila prangkisa.
Luyag sang SBRI nga magserbisyo sa linibo ka panimalay sa distrito sang Jaro. Ginapabugal nila ang ila water supply kag distribution system nga ginalakipan sang 10 million-liter per day capacity water treatment plant sa Pototan, Iloilo, ang 17 kilometros nga transmission line kag 60 kilometros nga distribution network pipes sa Jaro.
Target sang ila 450 million pesos nga proyekto nga makaserbe sa ginabulubanta 10,000 ka panimalay kag commercial establishments sa sini nga lugar.
Nagpirma sa kasugtanan ang local government sang Iloilo City kag SBRI kag ang ini nga kasugtanan nagahatag sa SBRI sang prangkisa sa pagserbe sa 34 ka subdivision kag tatlo ka barangay sa distrito sang Jaro sa sulod sang 25 ka tuig.
Sadtong 2017, nag-umpisa na ang pagtayhon nila sang tubig sa ila mga konsumidor. Nagalaum kita nga sa sini nga panahon madamo na sila sang naserbisyuhan kag maserbisyuhan pa.
Namutikan sang mga pumuluyo sa Bitoon nga may mga linya na sang tubig ang iban nga lugar nga bag-o pa lang naistaran sang mga tawo apang una pa sila nga nakatilaw sang tubig halin sa SBRI.
Nagamantenir ang mga pumuluyo sang tubig gikan sa tasuk kag sa bubon agud nga may magamit sa ila panimalay. Apang ang ini nga tubig ang posible nga kontaminado na bangud sa naga-ikit nga panimalay sa New Site, Bitoon, Jaro.
Indi malikawan ang pagtuhaw sang balatian sa panit bangud sa kontaminado nga tubig nga ila ginagamit.
Ang iban nagabakal sang tubig nga nasulod sa mga container. Masarangan nga baklon sang pumuluyo ang tag-10 ka pesos nga balor sini lamang nga may gamiton nga tubig nga ipaligo ukon panghugas sang pinggan.
Kon kalkulahon, masarangan sang pumuluyo sang Bitoon nga magbayad sa bulanan nga konsumo bangud nagabayad gani sila sang kantidad nga labaw kaysa sa minimum nga ginasukot sang SBRI.
Bangud sini, nagsulat ang konseho sang barangay kag namangkot kon paano maserbisyuhan ang mga pumuluyo. Nagpasar sila sang resolution para diri kag nagahulat sang desisyon sang board sang SBRI.
Gin-athag sang SBRI nga may linya sang tubig sila sa Metropolis apang indi magsugot ang tagdumalahan sang Metropolis nga makaangot diri ang taga-Bitoon. Ginsiling sang SBRI nga may linya sang tubig sila sa Uhong-Uhong sa Barangay Buhang, Jaro kag sa Barangay Camangay, Leeganes, Iloilo kag diri posible makaangot sang linya para sa mga residente sang Bitoon, Jaro.
Nagapangabay kita sa chairman sang Committee on Transportation, Communication and Public Utilities sa Iloilo City Council nga magbulig kag mag-akto agud nga paboran sang board sang SBRI ang pangabay sang mga pumuluyo sa Bitoon, Jaro.
Kabay pa nga indi pagdalukan sang SBRI sang ila serbisyo ang mga poumuluyo sa Bitoon nga madugay na nga nagahandom nga makatilaw sang ginproseso nga tubig, matin-aw, masaligan kag wala dala nga balatian.
Nakahibalo kita nga medyo malawig pa ang proseso antes matakdan sang linya sang tubig ang mga pumuluyo. Nagakadapat nga may lihok ukon plano na nga ginaumpisahan agud mas mahapos na lang sa palaabuton.
Dapat pamangkuton na kon pila ka residente ang handa nga magbayad sa serbisyo sang SBRI. Konsultahon ang pumuluyo kag pumuluyo kag sugiran kon pila ang ila pagabayaran, ano ang ila pabagabayaran kag kon pila ang minimum consumption kag kon pila ang balor sini.
May mga residente nga indi magpatakod sa una, apang kon madamo na ang natakdan sang kuntador, maganyat na ina sila kag magaupod man sa pagpatakod.
Kahibalo man kita nga giring sang kwarta ang ginateleskopyo sang SBRI. Negosyo ini nila. Nagalaum kita nga ma-justify sang ila mangin income ang ila mangin expenses sa pagtakod sang linya sang tubig sa sini nga lugar.
Kinahanglan lang sang interbensyon gikan sa Iloilo City Council kag mismo sa Iloilo City Government agud mabuligan ang Barangay Bitoon nga makaangkon na sang tubig nga matinlo, matin-aw, masaligan kag luwas nga gamiton.
Nagasandig ang mga pumuluyo sang Bitoon sa bulig sang Iloilo City Government nga makapanuktok sa konsensya kag kabalaka sang SBRI kag aprubahan ang pangabay nga tubig sa Bitoon. (bertladera@gmail.com/PN)
