NAKITA ko ang paghimakas ni Vice Gov. Christine “Tingting” Garin kon paano matigayon nga mapasar ang iya ordinansa. Luyag niya nga mabuligan ang mga indi na makabangon gikan sa ila ginaligiran. Halos nag-okupar ini sa iya paminsaron kag balatyagon.
Sa kada pagpadulong niya sa mga lugar, ginahibalo niya kon may mga persona nagaligid lang sa iya higdaan, indi makabangon kon indi pag-alalayan, indi makatindog kon indi pagbuligan. Bangud sa iya nakita nga kabudlay sang sitwasyon kag makaluluoy lang kon lantawon, natandog ang iya balatyagon kag nagpangua sa paghimo sang akto nga makabulig sa mga kubos.
Gintun-an niya kon paano mabuligan ang mga persona nga nagaligid na lang sa ila ginahigdaan. Luyag niya nga mahatagan sang alibyo ang kabudlay nga ila ginaagunto. Nakita man sini ang sakripisyo sang mga tawo nga wala gid nagapabaya sa ila himata nga nagaligid na lamang kag tinuig na nga nagaantus sa iya kahimtangan.
Nag-abot ang tion nga ang kabudlay nangin mabinungahon kag nalab-ot gid ang handom nga mabuligan ang mga tawo nga lubos nga nagakinahanglan.
Natandog ang balatyagon iya balatyagon sa tagsa ka makita niya sa sulod sang panimalay nga may nagaantus, nagaligid lang kag dapat nga buligan sa bisan gamay nga paagi lamang nga makapamag-an sa ginaabaga nga problema sang partikular nga panimalay.
Bangud sini, iya ginduso ang ordinansa agud mabuligan ang mga totally bedridden person kag mabuligan man ang mga tawo nga nagaatipan sa ila.
Wala man nagpang-alang-alang sa pagsuportra ang bug-os nga katapo sang 13th Sangguniang Panlalawigan ng Iloilo agud nga mapasar ang ordinansa sang Hulyo 13, 2021.
Naghandu man si Gov. Arthur Defensor Jr. sang ginsugilanon ni Vice Gov. Christine
“Tingting” Garin tuhoy sa mangin badyet sang sini nga ordinansa. Mismo ang gobernador ang lubos nga nagasuporta diri.
Sa tion nga ipatuman na ang ordinansa, may lauman na nga financial assistance kag iban pa nga health kag medical benefits ang totally bedridden persons sa probinsya sang Iloilo paagi sa aprubado na nga Provincial Ordinance No. 2021-255.
Ginpahayag sang author sang ordinansa nga si Vice Gov. Tingting Garin nga may batunon nga P2,000 per quarter ang totally bedridden person, may libre nga medical examinatios, laboratory kag admission sa mga ospital nga ginadumalahan sang Iloilo Provincial Government.
Ginsiling sini nga ang kwalipikado amo ang totally bedridden person sa sulod na sang isa ka tuig kag sertipikado sang doktor, may balido nga PWD card, residente sang probinsya sang Iloilo sang kapin sa anum ka asud-asud nga bulan kag sertipikado sang Punong Barangay, kag nalakip sa indigent family nga sertipikado man sang Social Welfare and Development Office sang natungdan nga Local Government Unit.
May inisyal nga 20 million pesos nga ipain nga pondo sa pagpatuman sang sini nga ordinansa nga nalakip sa badyet sang Office of the Governor. Kaangay nga pondo ang ipain sa masunod nga mga Annual Budget sang probinsya sang Iloilo.
Kon magdaku na ang pondo sang kapitolyo, posible pa nga madugangan ang mahimo mabaton sang mga benepisyaryo. Nakadepende ini sa ikasarang sang provincial government apang ang importante nga nagahimo na sang tikang agud nga matalupangod kag mabuligan ang kahimtangan sang mga totally bedridden person sa probinsya.
Kabay pa nga umpisa subong, ang mga himata sang sini nga posible mangin benepisyaryo ang maghikutar na sang ila dokumento agud mangin handa sa gilayon nga pagpatuman sang ordinansa.
Ang ila mabaton nga benepisyo sa idalom sang sini nga ordinansa ang tuhay sa ila na ginabaton kag mabaton pa nga benepisyo gikan sa ila banwa ukon sa gobyerno-nasyunal. Nagakahulugan lamang nga kon ano ang ginabaton karon kag posible pa nga batunon nga benepisyo sa palaabuton ang indi makapugong ukon makasablag sa pagabatunon nga benepisyo sang mga kwalipikado sa sini nga ordinansa.
Nakita sang mga katapo sang Provincial Board ang tawhanon nga katuyuan sang ordinansa. Nabatyagan nila ang kabalaka sang bise gobernador kag kahibalo sila nga indi mabutang sa alang-alang ang ordinansa bangud suportado sang gobernador.
Bulahan ang mga totally bedridden sa probinsya sang Iloilo bangud bug-os nga pwersa sang Iloilo Provincial Government ang naga-ulikid sa ila, ang nabalaka sa ila kahimtangan kag nagahimo sang pamaagi agud sila ang mabuligan.
Ginapabatyag lang sa mga natungdan nga may balatyagon ang gobyerno probinsyal, naga-ulikid, nagakabalaka, kag nagahimakas agud nga sila ang maatipan.
Nangin mapag-on ang ordinansa bangud nga ginpululihan sang tanan nga matadlong, mangin mas maathag, kag magsibu sa iya tinutuyo.
Lubos gid nga nagapasalamat ang bise gobernador sa mga kaupdanan sini sa 13th Sangguniang Panlalawigan ng Iloilo nga nagbuylog kag nagsakdag sa sini nga ordinansa nga gin-aprubahan unanimously sa Third and Final Reading sa ginhiwat nga 99th Regular Session sang Hulyo 13, 2021.
Kahibalo kita nga sadto pa man, nangin adbokasiya na sang pamilya Garin ang pagbulig sa sini nga mga indibidwal. Nakita na nila ang sitwasyon sang tagsa ka panimalay kag sa ila persona nga paghimakas, sila ang nagahatag sang bulig sa kutob sang ila masarangan.
Sadto pa man, nabatyagan na sang natungdan nga panimalay ang pag-ulikid sa ila sang pamilya Garin, ilabi na ang pag-ulikid ni Vice Gov. Christine “Tingting” Garin.
Paagi sa sini nga ordinansa, ang ila ginabulig ang madugangan pa gid paagi naman sa igahatag sang Iloilo Provincial Government.
Mas nangin apektado ang natungdan nga panimalay sa sini nga panahon sang pandemya bangud posible nga nawad-an man sang palangitan-an ang ila kaupod sa balay agud nga isuporta sa ila matag-adlaw nga kinahanglanon.
Nabuhinan ang nagatrabaho sa panimalay bangud ang isa sa ila ang nagabantay kag nagaatipan sa sini nga indibidwal. Indi sila makapangita sang trabaho agud nga makadugang sa ila income. Maathag nga kon may totally bedridden person sa isa ka balay, ang ini nga persona ang indi lamang apektado kundi lakip man ang nagaatipan sa iya.
Ini nga rason kon ngaa kinahanglan gid nga hatagan sila sang atensyon kag bulig agud nga mapamag-an man ang ila ginaabaga sa matag-adlaw nila nga pagsinarayo. (bertladera@gmail.com/PN)
