SA Enhanced Community Quarantine (ECQ), limitado ang hulag sang tawo. Sarado ang mga indi essential nga negosyo.
Ano bala ang nangin balasehan sini nga klasipikasyon sang estado sang quarantine?
Ini amo ang Hospital Care Utilization Rate (paggamit sang hospital COVID room, isolation room, ICU kag mga makina sa pagsuporta sa pagginhawa sang pasyente).
Ang syudad sang Iloilo may mataas nga HCUR nga ara sa masobra 80%. Buot hambalon kun tingbong ang tanan nga pasilidad para sa pagtatap sang pasyente nga may COVID-19, halos 20% na lang sang pasilidad ang nabilin.
Ini nga sitwasyon naagyan man sang National Capital Region (NCR) Plus. Kun pahambalon mo ang national government, nalampasan nila ini bangud sang hugot nga quarantine protocol.
Pero ngaa sa tawo nila tanan ginabasol ang sitwasyon? Ngaa ang mga lokal nga pamunuan ang ila ginawasay sa karon? Ginabala nila sa kanyon ang mga lider sa lokal. Sin-o gid man bala ang may sala?
Nagapati ako nga una may sala ang gobyerno. Ngaa man?
* Mahinay ang rollout sang bakuna bangud ulihi na ang hulag sa pagbakal sini sa mga pharmaceutical companies. Mas gin-una pa ang kabalaslang personal sang administrasyon sa pungsod China.
* Mahinay ang pagdala sang bulig sa mga tawo. Tandaan sang atun gobyerno nga ang populasyon sang Pilipinas kadam-an working class. Ang ila income sa isa ka adlaw amo man ang ila ginagasto sa sulod sang sina nga adlaw. Indi mapilit ang tawo nga magpabilin sa balay kun wala untat ang hibi sang kabataan nga ginagutom, ukon matunog pa ang raguok sang tyan sa sigabong sang sound system.
* Indi patas nga pagtrato sa mga local government units. Maathag man nga kun sin-o ang maisog amo lang ang ginasabat sang gobyerno.
* Inutil ang Department of Health sa nasyonal nga level. Indi mapapanaog ang husto nga programa sa idalum kag indi makahulag sang mga rehiyon nga talatapan bangud nasandig sa ila sa ibabaw ang desisyon. Bisan ang data sang COVID-19 wala nagasilinanto.
* Kulang sang lubos nga ihibalo ang National IATF sa matuod nga sitwasyon sa lokal nga estado. Nagasandig lang sila sa numero kag late man ang pagtipon sini. Wala ginahatagan sang maathag nga analysis ang pagsaka panaog sang numero kag ginabasol lang masami sa mga tawo nga naggawa sa ila balay kag wala nagasunod sa protocol.
* Madamo man nga salawayon sa local. Bisan indi pwede ang tipun-tipon, apang may mga nagahandum nga magpadalagan sa 2022 nga election nga sige gihapon ang kadto sa mga barangay. Kape-kape upod sa pumuluyo. Pamatyagan nila may exemption sila sa paglapta sang virus.
ECQ gid man ayhan ang solusyon?
Siling sang gobyerno ang latunay ara na sa mga panimalay. The paano ka makapabilin kun ang balay may virus man?
Paano mahibaluan sang gobyerno ang matuod nga sitwasyon sa mga panimalay? Sa matuod lang ang mga pamilya, indi magreport sang kaso sang COVID-19 kun wala sila sang makita nga sintomas ukon indi pa malala ang ila katapo sang panimalay. Bunga ini sang kahadlok nga ma-quarantine sang 14 diyas ukon ma-hospital kag magastuhan sang halos minilyon.
Nagapalanglapaw gid man abi ang sukot sang mga hospital bisan sa PPE (personal protective equipment) lang nga ginasoksok sa pagbisita sa pasyente.
Mentras ang tawo nagabutig sang iya estado sang ikaayong lawas, mentras ang tawo indi mag-ako nga ang COVID-19 matuod, ang paglapta sang virus indi mapunggan.
Ang syudad sang Iloilo may 1,490 ka kaso sang COVID-19 halin Hulyo 1-15, 2021. Ini nagakahulugan nga may 97 nga daily average ang syudad. Mas manubo ini sang 18.83% sa 1,819 nga narehistro sa amo man nga period sadtong Hunyo nga may daily average nga 121. Apang mas mataas lang ugaling ang local transmission subong nga ara sa 1,090 kag new cases nga 360. Manubo ang cases sa ROF nga may 9, returning residentd nga may 37 kag 18 sa APOR.
Base sa sini nga data, ano ang pwede mahimo agud mapunggan ang pagdamo sang mga nagasulod sa hospital? May iban gani nga patay na apang wala gina-report sa gobyerno kay mahal man ang cremation.
Maathag nga ang tawo kulang gid sa kooprasyon sa gobyeno sa away sa pandemya bangud sa ila nakita nga kakulangan sini sa publiko.
ECQ gid man ayhan ang solusyon? Hay, ambot mangkota ang gobyerno kay sila man lang ang mas nakahibalo!/PN
