TUMAN ka tam-is sang naagom nga kadalag-an. Kaangay ini sang matin-aw kag mabugnaw nga tubig nga nagalatay sa nagalagpok kag mala nga tutunlan. Masaboran ang tagsa ka ilig, nagapanalunton sa tutunlan ang iya katam-is.
Madamo ang napukaw sa kadalag-an nga naagom sang 30-anyos nga si Hidilyn Diaz matapos nga iya nadis-og ang world record holder sang China nga si Liao Qiuyun sa women’s 55kg class kag nahatag sini sa pungsod ang pinakauna nga bulawan matapos ang 97 ka tuig nga kompetisyon sa Olympic.
Malawig man ang panahon nga nagbiya siya sa pungsod, nagsakripisyo, naghanas kag nagtuman sa nutrisyon sang iya ginakaon.
Matapos ang kadalag-an, liwat na niya matilawan ang iya paborito nga ginakaon nga cheesecake kag bubble tea.
Ginbun-ag sadtong Pebrero 20, 1991 sa Zamboanga City si Hidilyn Diaz. Nagataas ini sang lima ka tapak kag isa ka pulgada ukon 1.58 meters.
Una siya nga naghatag sang sorpresa sadtong nakwa niya ang silver medal sa 53kg class sa 2016 Rio Olympic ukon sadtong lima ka tuig na ang nakalipas.
Bangud nga pursigido siya nga ang Rio silver himuon niya nga Tokyo gold, gin-recruit niya ang top Chinese coach nga si Gao Kaiwen duha ka bulan antes nakwa ang pinakauna nga weightlifting Asian Games gold sang pungsod didto sa Jakarta sang tuig 2018.
Sadto pa sang Pebrero 2020 nagpuyo sa Malaysia si Diaz bangud sa COVID pandemic kag sadto pa sang tuig 2019 ulihi niya nga nakita ang iya ginikanan, ilabi na sang iya amay nga isa ka tricycle driver sa pigado nga barangay malapit sa Zamboanga City.
Sa pila ka semana nga COVID-19 restrictions, madamo sang gym ang nagsarado, kulang ang access sa weightlifting equipment kag ang kahangawa kon bala madayon ukon indi ang hinampang.
Pila ka bulan nga nagpakuribong ang “Team HD” sa apartment block sa Kuala Lumpur kag lubos ang iya paghalong nga indi maglitik ang tiles sa salog samtang nagahanas sa paghakwat.
Ang wala ginakapoy nga si Diaz nakamaniobra pa sa pagpangita sang tion nga makatipon sang kwarta paagi sa online training sessions agud makapanagtag sang food packages sa pigado nga mga pamilya sa ila lugar nga nagaantus sa ginapatuman nga lockdown.
Nahibauan nga ang “Team HD” ginatapuan nanday Chinese head coach Gao Kaiwen, strength and conditioning coach Julius Naranjo, psychologist Dr. Karen Trinidad kag sports nutritionist Jeaneth Aro.
Sa personal nga kabuhi, naga-date sanday Diaz kag Naranjo nga isa man ka anay weightlifter kag professional weightlifting coach, isa ka strength and conditioning coach, kag film producer. Ang ila relasyon ginsalida na sa telebisyon sa pungsod.
Samtang, si Diaz ang na-recruit sa Philippine Air Force (PAF) sadting 2013 paagi sa Direct Enrollment Program. Una siya nga gin-assign sa Air Force Special Services Group. Ginhatagan man siya sang Air Force Specialty Code Skills in Recreation in Weightlifting.
Sadtong 2014, gin-promote siya sa rangko Airwoman Second Class gikan sa Airwoman. Nakabaton man siya sang Military Merit Medal kag sang Presidential Citation Unit Badge bangud sa paghiwat sang PAF events.
Samtang nagahanas siya para sa 2016 Summer Olympics, gin-assign siya sa PAF Personnel Management Center nga temporary basis lamang. Bangud sa iya naagom sa Olympics, siya ang gin-promote sang PAF. Ang promotion una nga wala ginbuyagyag apang sang ulihi ginreport nga siya ang na-promote sa rangko nga Airwoman First Class. Kasunod sang kadalag-an ni Diaz sa 2018 Asian Games, siya ang gin-promote bilang airwoman sergeant.
Malawig ang iya paghimakas. Wala nagpalingkang sa mga pagpanghangkat. Gintulok sini ang iya luyag madangatan nga wala nagapatublag sa iya pag-usoy sa dalan. Indi man hamak ang iya sakripisyo, apang bangud sa determinasyon ang bulawan iya naagom.
Mahapdi ang lap-ok sa iya mga palad. Patimaan ini nga indi madali ang paglab-ot sa ginakalangkagan nga bulawan nga medalya.
Sa tagsa ka paghakyaw niya sang mabug-at, ginatib-ong niya ang dungod kag ngalan sang pungsod. Ginapakilala niya ang kinaiya sang mga Filipino. Ginapatangla niya ang iban nga rasa sa ikasarang sang mga Pinoy.
Malipayon na siya bangud minilyon nga padya ang nagahulat sa iya. Nagapaindis-indis man ang mga kompaniya kag dumalagko nga personalidad sa pagtan-ay sa iya sang benepisyo. Bangud sa iya paghimakas, ang iya balhas nag-inggat kaangay sang bulawan.
Matuod nga ang kwarta mapuslanon kag malayo ang madangatan sini. Apang ini ang nagakaubos ilabo na kon indi siya kahibalo mag-uyat. Dapat nga tipigan niya ang kwarta kag benepisyo nga ginpain para sa iya.
Labaw diri, ang indi mapanas kag madula amo ang kadungganan nga iya nahatag sa pungsod. Kabahin siya sa maragtas. Mapagkit siya sa panghuna-huna kag tagipusoon sang kada Filipino.
Dapat ipadayon niya ang paghatag sang inspirasyon kag kabay nga may magasunod sa iya tapak agud nga mapadayon ang kadalag-an sang mga Filipino sa patag sang hinampang.
May pat-in na sa pinsar sang tanan ang medalya nga bulawan nga simbolo sang kadalag-an, apang posible nga para kay Hidilyn Diaz ang lap-ok sa iya palad amo ang mapagkit sa iya panghuna-huna labaw sa bulawan nga ginatangla sang iban.
Para kay Hidilyn Diaz, ang iya lap-ok amo ang ulunlan sang bulawan. Diri nag-umpisa ang ginpapag-on nga kadalag-an kag ini ang mangin bulawan nga handumanan.
Paagi sa iya determinasyon, ang iya lap-ok nangin bulawan. (bertladera@gmail.com/PN)
