CONGRATULATIONS Hidilyn Diaz sa imo pagdaug sing gold sa una nga tion sa Olympic Games para sa pungsod pagkatapos sang 97 ka tuig sugod sang pagpasakop sini sadtong 1924.
Naangkon mo na ang imo handom agud makilala sa patag sang sports, partikular sa weightlifting, labi na gid sa sining pinaka-prestigioso nga Olympic Games.
Naagom mo na ang pagdaug sing ikaduha nga kadungganan (silver medal) sadtong 2016 Rio Olympics.
Karon ang gold na mismo, nga amo ang pinakamataas nga kadungganan sa imo kategoriya sa weightlifting diri sa 2020 Tokyo Olympics.
Sa pagdaug mo sini para sa pungsod pagkatapos sang halos isa ka siglo (century) nga nagligad, para sa amon, daw si Neil Armstrong ka na gani nga nakalapak sa bulan sa una nga tion para sa kalibutan.
Aba, indi lahog-lahog ang maghulat sang 97 ka tuig bag-o matigayon ini nga kadalag-an sa sport nga kon isipon mo daw iya pa tani ini nga huyog (bodybuilding kag weightlifting) sang lalake.
Nga daan mas gusto kup-an sang madamo nga kalalakehan nga Filipino ang malum-ok nga panglawason sang ila kababaehan. Of course, may ara man nga luyag ang matibsol nga panglawason sang babaye nga mga atleta, labi na gid sa mahuyog man sa athletics.
Kag syempre ang may luyag magka-pamilya sang mga atleta, indi bala? Softball catcher man gani ang iloy ko sang elementrya siya. Isa ini sa mga rason kon nga naluyag ang amay ko sa iya.
***
Mabutang ka na Hidilyn sa kasaysayan sang pungsod kag sang bug-os nga kalibutan. In fact, dala mo pa diri an bugal sang imo pamilya kag sang bug-os nga pungsod. Nabatak mo man diri ang personalidad sang aton kubos nga pungsod nga sa masami ginahikayan sa patag sang sports kag sa iban pa nga patag sang ikasangkol. Mabuhay ka Hidilyn!
Congratulations man sa iban pa ka myembro sang Philippine Olympic Team (19 ini sila tanan) nga padayon pa nga nagapakig-away sa ikasangkol batok sa ila mga kasumpong sa natuonan ila nga mga hampang.
In fact, as off presstime, Hulyo 28, nagdaug na si Nesthy Petecio batok sa iya kasumpong nga taga-Colombia sa Women’s featherweight ,nga nagpaseguro na sang bronze (3rd) medal para sa iya.
Ang dason niya nga hampang batok na sa iya kasumpong nga taga-Italy para sa silver medal, nga tani madaug man niya.
Ang iban nga nagalaum man nga makadaug sang dugang nga mga medalya para sa pungsod galakip kay Irish Magno sang Janiuay, Iloilo nga naka-schedule ang away sa Hulyo 29 sa iya quarterfinals bout sa flyweight division sang boksing, nga tani madaug man niya.
Padayon man ang away sa boksing ni Eumir Marcial, 200m run ni Kristina Knott, vault sa gymnastics ni Carlos Yulo, kag sa golf sang duha ta ka Olympians nga babaye./PN
