KUN DAMO ang nagalugay, nagabasa ang kalamay. Amo ‘ni sang una mabati-an ko sa amon mga katigulangan kun may ginahambalan nga mga importante nga bagay sa pamilya ukon komunidad. Kun may mga nagasamolak nga daw wala man punto, amo ini ang ginasabat sang pinakaginatahod nga tigulang sa grupo.
Ini ang tinaga nga indi mahangpan sang mga hilabtero nga klase tawo. Ini bala nga tanan na lang entrahan nya kag akuon ang tanan nga kredito.
Kalain sang klase batasan nga pamatyagan mo bosyo ka sang bug-os nga Rehiyon 6. Tanan nga tawo gusto mo magsaludar sa imo. Pati ang hilikuton sang mga pagpanalawsaw sa medisina gusto pa entrahan.
Ngaa bala gusto gid mag-entra? Para makakuha man sang papel kag hatagan sya sang kredito?
May mga trabaho sa medikal nga patag nga indi mahangpang sang ordinary nga tawo. Ang imo pagkapolitiko wala nagahatag sang lisensya sa imo nga hilabtan na lang ang mga hilikuton. Matuod bilang lider sang imo nasakupan may katungdanan ka sa imo mga lokalidad, pero ang gamiton mo ini nga balasehan sa tanan nga oras agud makapahilabot sa mga bagay nga indi mo dapat hilabtan, indi naman matarong.
Kuntani bilang isa ka lider, makahibalo sia sang iya limitasyon. Dapat man niya tandaan nga indi lang iya ang tanan nga higayun. Maathag nga may iban nga nagalapaw na sa latid sang ila pagkalider. Bisan ang mga bagay nga wala sila sang kasampaton, pahilabtan sa landong sang pagpangapin sa nasakupan apang ang matuod nga katuyuan amo ang pagpadayaw sang kaugalingon sa iban. Madasig magsakay sa isyu kag akuon ang ginpangabudlayan sang iban.
Samtang matunog subong ang panawagan nga magsaylo ang iban nga banwa gikan sa ILECO pakadto sa isa ka pribado nga kumpaniya. Madamo ang madasig magsakay sa isyu. Pero ang matuod ang una dira amo ang konseho sang Pavia. Matuod nga kun nagahulag ang pamunuan lokal sa problema sa power utilities, dako nga bagay ang matabo nga pagbag-o.
Halimbawa ang banwa sang Calinog, Iloilo sa idalum ni Mayor Francisco “Ico” Calvo, nagtukod sila sang command center para sa madasig nga pagpalambot sang impormasyon gikan sa mga kabarangayan panaog sa banwa sa ti-on sang emerhensya. Indi lang sa mga insidente. Pero kun may nagakatabu nga wala ginapaabot nga power interruption sa isa ka barangay madasig nga mapalambot sa ILECO II agud maaktuhan.
Indi man madasig ang pagresponder sang ILECO II apang sa masami maresolbar sa gilayun ang problema. Ini nagapakita nga kun may inisyatibo ang banwa sa mga simple nga problema, madasig kag indi na magdako pa ang problema. Amo ini ang mga bagay nga dapat pahilabtan sang mga LGU.
Kaladlawan lang kay may iban nga LGU nga palareklamo, pero nakahimo bala kamo sang inisyatibo kaangay sang nahimo sang banwa sang Calinog?
Tandaan lang natun nga antes kita manghilabot, binagbinagon anay kun bala sakop pa ini sang atun poder bilang lider!/PN
