NAG-umpisa na ang pag-file sang Certificate of Candidacy sadtong Oktubre 1 kag magatakop ini sa Oktubre 8, 2021.
Madamo na ang nag-una file sa una mismo nga adlaw kag sila ang nag-agaw sa atensyon sang mga katapo sang media kag nahatagan sang masangkad nga pagpalapnag sang impormasyon tuhoy sa ila intensyon nga magpangalagad sa banwa.
May mga nagapili sang adlaw sa pagfile, may yara sang naga-konsiderar sa petsa ukon sa numero ukon base sa numerology agud nga maagom nila ang swerte sa ila pagpapili.
May yara sang grupo ukon tingob nga linyada, may yara sang pila lamang ukon isa lang sila nga nagmato-mato sa pagpadulong sa talatapan sang Comelec agud nga mag-file sang COC sa posisyon nga ila luyag dalaganan.
Tanan nga nag-file kag maga-file pa sang ila Certificate of Candidacy ang nagapasalig nga magaserbisyo sa tawo. Tanan sila nagahandom nga magbulig sa pumuluyo. Tanan sila luyag nga mag-uswag ang aton komunidad, ang aton pungsod.
Sa kada tatlo ka tuig, sila ang nagapanuktok sa aton ganhaan, sa aton puluy-an, sa aton tagipusoon kag sa aton paminsaron. Luyag naton sila nga pamatian kag buligan bangud luyag nila nga magserbisyo sa aton.
May iban na nga madugay na nga yara sa serbisyo, may iban naman nga bag-o lang naghaboy sang ila kalo sa pulitika, magapasimpalad kon maoyunan sila sang tawo.
May iban nga ginpilit lamang ukon napilitan, may iban nga madugay na nga nagahandom apang wala sang higayon, may iban nga arangka lang nga arangka bisan wala sang piho ang ila madangatan.
Bisan ano pa ang nagadabok sa ila emosyon ukon handom, ang importante nga masigrigar naton ang isa ka kandidato gikan sa madamo nga kandidato nga may kaangay man nga promisa nga magaserbisyo sa tawo.
Tuod, mahapos magsiling nga handa sila magserbisyo, handa sila nga magsakripisyo, handa sila nga ihalad ang ila kaugalingon para sa banwa apang tuhay ang sugilanon kaysa sa aktwal nga hilikuton.
Indi na kita magpadala pa sa matam-is nga mga tinaga, sa mga promisa nga daw kaangay sang matam-is nga hilu nga mahahalit sa aton lawas.
Pilion naton ang mga kandidato base sa ila track record ukon mga nahimuan na, kon sila ang madugay na sa pulitika. Lantawon naton ang kabuhi nila samtang yara sila sa pribado nga sektor ukon bilang indibidwal kon bag-o pa lamang sila nga mga nagka-interes sa pagpadalagan.
Ang nakalipas amo ang magatuad sa palaabuton. Kon ano ang ila huyog kag kon ano ang ila mga prayoridad amo man ang posible nga mangibabaw kon hatagan sila sang higayon nga makapwesto sa gobyerno.
Ini ang rason kon ngaa dapat mag-id-id gid kita sa paglantaw sa mga nakalipas agud mas mabasa naton ang ila karon kag bwas. Dapat mangin mabusisi kita sa pagkilatis sa mga kandidato nga nagapadalagan sa karon bangud sila ang magapanuktok sa aton kag magahingyo sang aton hamili nga boto. Pangayuon nila ang aton bulig kag suporta.
Hibaluon naton ang iya ikasarang sa pagserbisyo sa tawo, ang iya abilidad sa pagdumalasa ila panimalay, ang iya kinaiya bilang katapo sang organisasyon ukon komunidad. Diri naton makilala ang iya personalidad kag matimbang naton kon bala ang iya mga tinaga nagasibu sa iya iya tinutuyo kag mga pasalig ukon pangako.
Madamo na sila nga palapilian apang isa lang ang imo dapat maoyunan kag sakdagon. Dapat indi ka magsayop bangud tatlo ka tuig naman kita nga magaantus.
Pilion naton ang mga kandidato nga ang katuyuan amo ang pagserbisyo sa tawo, pagdampig sa interes sang pumuluyo kag may mahimo ukon hinimuan na samtang yara sa pwesto.
Pilion naton ang mga kandidato nga handa nga magsakripisyo agud lamang nga mapadayon ang pagtin-ad sang komunidad. Pilion naton ang mga kandidato nga maakasarang ipahigad ang partido ukon grupo ukon duag sa pulitika lamang nga mag-ugyon sa kon ano ang mas makapaayo sa banwa.
Yara sa aton nga mga botante ang gahum kon tugutan naton sila nga makapungko sa pwesto. Kita ang magadesisyon kon liwat nga makapungko ang mga salawayon, ang mga dalok, ang mga oportunista kag ang handom amo ang makapamentaha sa kaban sang banwa.
Indi naton mahibaluan ang ila personalidad kon indi naton pagpamatian ang ila panghuna-huna. Tanan sila nagahandom sang kaayuhan para sa banwa nga alagaran.
Ang ila katuyuan sa pagpapili ang aton himulsuhan. May iban nga luyag ipadayon ang nasuguran na, ipadayon ang legasiya, ipadayon ang maayo nga panghimanwa. May iban naman nga magapasimpalad lamang, ginatestngan ang swerte sa panghimanwa.
Ang motibo sang iban amo ang pagsakripisyo sang ila kaugalingon. Ang motibo sang iban amo nga pabusgon ang bugal sang ila kaugalingon.
Tamdon naton ang aton sitwasyon kag lantawon ang luyag naton nga madangatan sa palaabuton. Pilion naton ang kandidato nga nagasibu sa aton handom ang ila direksyon. Pilion naton nga ang ila hulag makapaabante sa aton pungsod padulong sa kauswagan kag kalinungan.
Kuntani indi kita magsala sa pagpili paagi sa paghimbis sa katuyuan sang magapapili. (bertladera@gmail.com/PN)
