NAG-UMPISA na ang makalilingaw nga senaryo bangud man sa banggi-anay sa pulitika. Madamo na ang nagasumpakilay sa social media kag nagalinyahanay sa napilian nila nga kandidato.
Nagapangatubang kita karon sang pinasahi nga eleksyon, ilabi na diri sa syudad kag probinsya sang Iloilo bangud nga tuhay ang sitwasyon kag indi makakampanya kaangay sadto nga wala pa ang pandemya.
Isa ka realisasyon sang mga pulitiko nga ipaiway anay ang pagkontrahanay bangud nga mabudlay ang pagkampanya, indi makahiwat sang house-to-house ukon caucus, limitado lamang ang makatambong nga mga supporter kag ginadumilian ang pagtililipon.
Bangud sini, masami na naton makita ang sumpakilay sa social media, ilabi na sa Facebook nga amo ang popular diri sa Pilipinas.
May branding ang kada kandidato, may duag nga ginasakdag, kag may mga diskarte kon paano makaganyat sang sumulunod sa social media.
Ang mga nakalantaw sa sitwasyon sang nakaligad nga tatlo ka tuig nga ini ang mangin dalagan sang kampanya posible ang nakapreparar na. Posible nga nakaplastar na sila sang ila mekanismo ukon iskema agud nga masiguro ang ila kadalag-an sa pihak nga ang pamaagi indi kaangay sa kinaandan nga kampanya.
May mga kandidato nga nakatipon na sang followers sa Facebook, may unay na sila nga sumulunod ukon nagalantaw sa kada post nila sa ila Facebook page. Ang ini nga mga kandidato ang mas abanse kaysa sa mga kandidato nga subong pa lang nakamarasmas nga dapat magsunod sila sa tawag sang sirkumstansya.
Suno kay Charles Darwin, “It is not the strongest of the species that survive, nor the most intelligent, but the one most responsive to change.”
Dapat makahimo sang istratehiya ang mga kandidato nga nalipasan sang panahon nga makalagas sa moderno nga konsepto sang kampanya. Kinahanglan nila nga mag-adoptar sa teknolohiya kag magsakay sa popularidad sang social media.
Kalabanan sang mga tawo, kon wala nagapamati sa radyo ukon nagalantaw sa telebisyon, ang nagalantaw na lang sa ila Facebook account kon ano ang nagasulod nga mga balita kag impormasyon. Nangin salandigan na ini sang mga tawo bangud nga may kahilwayan sila sa paglantaw ukon pagpamati sa ano man nga oras nga luyag nila.
Ang mga kandidato nga preparado makabig nga nakaabanse na sa ila kasumpong. May nagahimo na sang content ukon unod sang ila Facebook page. Diri makita sang tawo ang ila aktibidades, ang ila ginahimo nga pagserbisyo kag ang pagtuman nila sa ila katungdanan.
Makita man diri ang pagbulig nila sa mga nagapalapit sa ila opisina kag ang pagtugyan sang mga pondo agud nga mapatuman ang mga proyekto sa ila lugar nga nasakupan.
Sadto, ang tanan nagahulat lang sa kon ano ang ihungit nga impormasyon sang mainstream media sa mga pumuluyo. Subong, mismo ang mga pulitiko na ang nagahungit sa kon ano ang luyag nila ihungit nga impormasyon sa tawo.
May gahum na ang mga pulitiko nga makapalapnag sang impormasyon tuhoy sa nagakatabu sa ila pagpanghimanwa.
Bangud sini, mas may bentaha na ang pulitiko sa iya kasumpong ilabi na kon may maayo nga mga tawo nga nagadumala sa iya Facebook page agud nga epektibo nga mapalapnag ang impormasyon nga luyag niya mapalab-ot sa tawo.
Sa sini nga sitwasyon, nakita sang kadamuan nga mga pulitiko nga mabudlay ang tradisyunal nga sahi sang kampanya. Mas maayo na lamang sa probinsya sang Iloilo nga ila naareglo agud nga wala sang kontrahanay sa matag-as nga posisyo agud nga indi matublag ang serbisyo nga ginatan-ay sa pumuluyo.
Ang areglo nga natabu sa magkatuhay nga partido makahatag sang bentaha sa mga kandidato mismo bangud nga indi sila mabudlayan sa pagkampanya. Bentaha man ini sa mga pumuluyo kag supporter bangud indi na sila maglibot sa pagkampanya kag mapunggan ang paglaton sang virus kag indi maglala ang pandemya. Bentaha man bug-os nga pumuluyo bangud ang serbisyo nga ila ginalauman ang indi masablagan bangud wala sang kamog nga magatuhaw sa magkatuhay nga partido.
Ang areglo sang mga kandidato indi lamang para sa ila bentaha kundi agud mapangapinan ang bug-os nga probinsya sang Iloilo sa halit sang pandemya. Imbis nga mag-away ang mga kandidato, dapat sila nga magtingob sa pag-away sa kasumpong nga indi makita nga amo ang COVID-19.
Mangin pinasahi man ini nga kampanya sa sini nga eleksyon apang ang tanan sigurado gid nga makatuon kag maa-adoptar sa sugo sang siwasyon.
Indi madula ang daku nga papel sang mainstream media sa kampanya sang mga kandidato. Yara sa gihapon nga nagapabilin ang pwersa sang pamantalaan, radyo kag telebisyon, apang mas nagadomininar ang social media.
Halos tanan nga tawo may gina-uyatan nga cellphone, kon kaisa masobra pa sa isa, kag may Facebook account nga kon kaisa sobra pa sa isa lang ka account.
Ang kandidato nga makahibalo maggamit sa gahum sang social media ang mas makabentaha sa iya nga kontra.
Indi pa ulihi ang tanan, makalagas pa ang wala sang tul-id nga ihibalo sa sini nga padugi kag sahi sang kampanya.
Indi malipat nga ang kahibalo mag-adoptar sa sitwasyon may mataas nga posibilidad nga makasalbar kag magmadinalag-on.(bertladera@gmail.com/PN)
