NAKABATYAG sang pinasahi nga serbisyo ang mga pumuluyo sa syudad sang Iloilo gikan sa power distributor nga wala nagpaslaw kag gilayon nga napabalik ang suplay sang kuryente sa tagsa nila ka puluy-an.
Nakahimo sang pagpaanggid ang pumuluyo bangud man naagyan na nila ang sitwasyon sadtong na nga paglabay sang bagyo sa sahi sang serbisyo nga gintan-ay sang una nga power distribution facility nga amo ang Panay Electric Company, Inc. (PECO).
Matuod nga tuhay ang sitwasyon sang na kag karon apang ang aton ginalantaw amo ang sahi sang pagresponder nila sa natabu.
Ginatakus sang konsumidor kon paano nagaresponder ang isa ka power distribution company sa isa ka problema ukon sitwasyon, kon paano nila gina-handle ang yamo sang tawo, kag kon paano ginakumbinser paagi sa masanag nga pagpaathag ang mga nagareklamo.
Diri nagpangibabaw ang MORE Power Corporation sa ila abilidad sa madasig nga pagtungkad sa mangin problema kag ang gilayon nga pagpangita sang posible nga solusyon. Nangin mabakod nila nga taming ang angay nga pagpanghanda sa mga posibilidad nga ituga sang paglabay sang bagyo Odette.
Sa pagkamatuod lang, ako mismo ang natingala bangud samtang nagawaswas ang bagyo may kuryente pa kag naka-charge pa ako sang cellphone kag nakapamentaha sa paghikot sang mga bagay nga nagakinahanglan sang kuryente. Ginhungod nila nga utod ang suplay sang kuryente sang nagwaswas pa gid todo ang hangin agud nga malikaw sa peligro ang pumluyo kag isa ini ka husto nga desisyon agd malikaw sa disgrasya ang sin-o man.
Sadto, pila pa ka adlaw ang hulat antes magbalik ang kuryente bangud madamo sang nagkalatumba nga poste, ilabi na gabok na ang mga ini. Apang sa karon nangin madasig ang pagtumod sa mga lugar nga dapat hatagan sang gilayon nga atensyon kag pag-akto.
Nakabugtaw ako takna alas 10:00 sang aga, matapos naglumbos ang bagyo Odette, nga nagasiga ang suga kag nagakahulugan ini nga nakabalik gilayon ang suplay sang kuryente. Sa pihak ini sang sitwasyon nga madamo sang atop ang narungkab kag ginpalid sang makusog nga hangin.
Kaangay lang nga daw wala sang may natabu nga paglabay sang bagyo bangud gilayon man nga nakabalik ang suplay sang kuryente.
Nakabulig ang ila ginhimo nga pag-ilis sang mga daan nga poste sadto. Nangin bag-o ang poste kag nangin mabakod sa pag-atubang sa huyop sang mabaskog nga hangin. Ang tuyo sa pag-ilis sang poste sadto agud nga wala sang may matumbahan, agud nga mahipid ang mga linya sang kuryente kag isa ka bentaha nga nakita naton karon nga kon mabakod ang poste mapaiway ang problema sa pagkautod sang suplay sang kuryente tuga sang bagyo.
Maapresyar na naton ang gamay nga sakripisyo nga aton ginreklamo nga pagluntad sang hungod nga pag-brown out bangud may gina-islan sila nga poste ukon may maintenance work sila nga ginhimo. Ang bunga sang sini nga sakripisyo amo ang mabakod nga tindog sang poste kag napaiway ang daku nga huol nga posible sini nga ituga.
May abanse nga paglantaw ang MORE Power sa sitwasyon. Preparasyon ang iya taming nga nagsagang sa huol nga dala sang bagyo Odette.
Gingamit man sini ang bentaha sang social media paagi sa pagganyat sa mga pumuluyo nga ipahibalo sa ila kon sa diin nga lugar may natumba nga poste, kon may nagawayway nga kable, ukon may puno sang kahoy nga natumba kag nagsalawid sa linya sang kuryente.
Sa sini nga paagi, mas napadasig ang pagtumod sa mga lugar nga angay nga respondihan agud nga mas mapadasig ang pagpabalik sang suplay sang kuryente.
Bangud sini, ginadayaw kag ginapasalamatan gid sang mga konsmidor ang MORE Power sa ila maabtik nga pagresponder, sa ila maathag nga paglantaw sa matabu tuga sang bagyo, kag sa ila sistematiko nga paghulag agud mahatagan sang katumanan ang ila ginapasalig nga serbisyo.
Kabay kuntani ang iban nga electric cooperative sa probinsya sang Iloilo ang magkonsiderar sa pagsunod sa mga istratehiya nga ginapakita sang MORE Power. Kahibalo kita nga indi mapaanggid ang ila kapasidad, ang ila kapabilidad kag ila resources sa pagresponder sa problema nga natuga sang bagyo Odette. Apang, ang pamaagi sang MORE Power ang pwede gid nga ilugon sang mga electric cooperative nga una na naton nga napatpat diri.
Dapat nga mangin preparado. Islan na ang gabok nga poste. Aktibo sa pagresponder sa impormasyon nga ginapalab-ot sang konsumidor. Ganyaton ang mga konsumidor nga magpakigbahin sa paghatag sang solusyon kag pagpalapnag sang impormasyon. Gamiton ang gahum sang social media para sa bentaha sang pagserbisyo.
Kinahanglan sang mga electric cooperative nga pasulabihon ang pagpaimprubar sang ila serbisyo para sa ila mga konsumidor. Dapat nga mag-invest sa equipment kag manpower, kag sa moderno nga teknolohiya para sa mas episyente kag epektibo nga pagserbisyo sa mga konsumidor.
Malapad pa ang espasyo sa pag-imprubar sang serbisyo. Kinahanglan lang nga ipatudok nga ang tanan ninyo nga ginahimo ang para gid sa katumanan sang inyo serbisyo. Ini ang magaserbe nga giya ninyo, kag indi magkahuya nga ilugon ang maayo nga ginahimo sang MORE Power para saila konsumidor.
Nakahibalo kita nga padayon ang ginahimo nga innovation sang MORE Power sa ila ginatan-ay nga serbisyo para sa benepisyo sang ila mga konsumidor. (bertladera@gmail.com/PN)
