MABUDLAY na nga panason ang ngalan sang isa ka tawo nga napagkit na sa paminsaron kag balatyagon sang mga tawo nga iya nabuligan.
Magapabilin ini nga handumanan kag salandigan sang mangin serbisyo nga itan-ay sa tawo sang nagasunod sa iya mga tikang.
Mabudlay tupungan ang sahi sang serbisyo nga gintan-ay ni former Councilor Atty. Joshua Alim sa mga pumuluyo sang syudad sang Iloilo.
Ang mainit nga pag-abi-abi sa iya presensya ang makita sa nawong sang tagsa ka tawo nga iya masumalangan sa kada magpadulong siya sa kabarangayan. Ang tanan halos nalipay bangud ang ila tagdampig kag nagabatyag sang ila kahimtangan ang nagtapak naman sa ila ugsaran kag nagapangumusta sa ila sitwasyon.
Ginkabig siya nga konsehal sang masa bangud nga iya ginabitbit ang tingog sang mga kubos kag ginapigos. Masami siya mabatian nga nagapangapin sa mga pumuluyo sa tagsa ka tion nga sila ang nabutang sa disbentaha nga sitwasyon kag kon ginadalukan sang hustisya.
Masubo nga nagtaliwan na ang konsehal nga nagserbe sang anum ka termino umpisa 1998 tubtub 2019.
Sa edad nga 57, siya ang ginbawian sang kabuhi sadtong Sabado sang aga, Enero 15, 2022 bangud sa cardiac arrest.
Nahibaluan ko nga may sakit siya sa kidney bangud natalupangdan ko man ang pagmenyar sang iya panit kag medyo maluya na siya apang iya ginalikom kag ginaagwanta ang iya nabatyagan dala sang iya balatian.
Ulihi kami nga nagkitaay sadtong Marso 2021 sa namatyan kon sa diin dungan kami nga nagbisita kag pagkatapos makapangamuyo kag makahinun-anon nagbiya kami gikan sa lugar kag gin-agda niya ako nga sa iya salakyan masakay kag idul-ong ako sa kon diin ako manaog. Nagsiling ako nga ihapit na lang ako sa SM City.
Nahibaluan man sini nga kaadlawan ko sa sina nga adlaw, ginhatagan niya ako sang kwarta nga pangpamahaw. Indi man ako makabalibad bangud gin-insister gid niya. Daku ang akon pagpasalamat kag nanaog sa salakyan, nagsulod sa mall kag nagdesisyon nga ibakal sang polo shirt ang kwarta nga iya ginhatag agud may handumanan man ako gikan kay Atty. Joshua Alim.
Antes pa man sina, masami man kami nga naga-updanay sa bisan diin man nga kapehan kag nagasugilanon tuhoy sa halos tanan nga topiko apang labaw diri ang tuhoy sa pulitika.
Maamigohon kag mahapos palapitan si Atty. Joshua Alim. Wala siya sang may ginapili nga atubangon nga tawo. Tanan alalangay para sa iya. Ini ang mga rason kon ngaa malapit siya sa tawo, kon ngaa nahamut-an siya sang pumuluyo kag kon ngaa madamo siya sang abyan.
Nangin brodkaster, abogado, law professor, realtor, Dangal ng Bayan awardee, kag presidente sang CPU Alumni Association.
Madamo sang mga pumuluyo ang nakibot sa hinali sini nga pagtaliwan. Indi nila malipatan ang sahi sang pagserbisyo nga ginpatuhoy sa ila sang konsehal sang masa. Nagapasalig ang pumuluyo nga magasuporta sa kon sin-o man ang magapadayon sa iya ginsuguran kag sahi sang pagserbisyo sa mga Ilonggo.
Bilang tampad nga abyan kag pulitiko, makita naton kon paano siya ginahatagan sang kabilinggan sang mga pulitiko sa nasyunal nga lebel. Madamo ang nagabisita sa iya haya kag nagapakita sang ila pagdumdom kag pagpalangga sa iya. Indi nila sarang nga talikdan lang si Atty. Joshua Alim.
Indi man siya matupungan sang iban nga pulitiko apang dapat lang nga gamiton nila nga giya ang iya hinimuan kon paano siya nag-alagad sa banwa.
Nagapanindugan siya para sa pumuluyo, ilabi na ang mga ginapigos kag ginadalukan sang hustisya. Ginabitbit sini ang kawsa nga wala sing pagkalingkang. Nagmadinalag-on sa pagpangapin sa mga pumuluyo. Palangga siya sang masa, palangga niya ang masa.
Madamo man siya sang ordinansa nga ginduso kag isa sa iya adbokasiya ang anti-smoking. Ang iya ginapaminsar sa masami amo ang kaayuhan sang pumuluyo, kon ano ang maayo para sa tawo.
Ang pagpalangga sa iya sang pumuluyo makita sa survey nga ginahiwat sang pila ka mga kandidato bangud nga indi siya madula sa top 5 kag ang matuod sina nga yara sia masami sa ikaduha nga pwesto. Bisan pa ini sa sitwasyon nga halos wala na siya nagalagaw bangud man sa kondisyon sang iya ikaayong-lawas. Apang maathag nga wala siya ginakalipatan sang mga tawo kag nagapabilin ang ila suporta sa iya.
Ini man ang rason kon ngaa siya lang ang ginasiling nga konsehal sang masa bangud mismo ang mayoriya sang pumuluyo ang nagatib-ong sa iya sa pwesto. Siya ang ginalantaw sang tawo nga makabulig sa ila kag wala niya sila ginapaslaw.
Mas ginpasulabi niya ang pag-ulikid sa tawo kaysa sa iya kaugalingon bisan pa nga may ginabatyag na siya sa iya nga lawas.
Nagpahuway na ang konsehal sang masa. Salamat sa tanan nga kaayuhan nga ginhimo mo para sa pumuluyo sang syudad sang Iloilo. (bertladera@gmail.com/PN)
