SAMTANG wala sing ngalan nga gin-mensyonar si Presidente Duterte, ginpanugyan sini sa mga nagtambong sa inagurasyon sang Narvacan Farmers’ Market sa Ilocos Sur sadtong Marso 4 nga kon magpili sila sang mabulos sa iya dapat isa ini ka Ilokano.
Ginsabat ini sang mga tumalambong sing isa ka matonog nga pagpamalakpak.
Yadtong panugyan ni Duterte isa na bala ka pag-endorso ato sang kandidatura ni Marcos Jr. sa pagka-Presidente sang pungsod?
Ambot lang. Basi paumpaw man lang ato ni Duterte sa mga maki-Marcos nga mga Ilokano sa ginhimo niya sadto nga panghikay kag pagpakalain sa anak sang diktador.
“Indi ako bilib sa iya…weak leader,” siling niya sadto.
Spoiled brat kag wala disiplina, paathag gani niya nga gin-quote pa halin sa nag-leak nga diary ni Diktador Marcos Sr.
Pero basi maliwat man ang panan-aw ni Duterte sa kay Marcos Jr. kag luyag na suportahan ini sa iya pagdalagan sa pagka-Presidente, kag kinahanglan lang niya ma-deklarar sing opisyal bag-o matapos seguro ang Marso. Nga daan “unpredictable” ini si Duterte.
Of course, posible man nga indi si Marcos Jr. ang iya kandidato sa pagka-Presidente. Kon sin-o man ini, ina seguro ang sa pensar niya nga makabulig gid sa iya problema kon wala na siya sa poder.
Nga daan luyag gid sang pila ka sector nga pasabton siya sa ila mga akusasyon angot sa kwestyonable nga pagkapatay sang linibu sa iya War on Drugs nga daw wala man ginasapak sang Dept. of Justice sa idalom niya. Gin-akusaran pa gani nila si Duterte sa International Criminal Court sang “crimes against humanity”.
***
Nagapati kita ugaling nga kon mag-endoroso gid man si Duterte sang kandidato sa pagka-Presidente indi ini magliwan pa kay Marcos Jr. Man, kon indi na si Marcos Jr. ang ka-tandem ni Sara maapektuhan gid sing daku ang tsansa sang naulihi sa iya pagdalagan sa pagka-Bise Presidente, kay madula man ang boto niya upod kay Marcos Jr.
On the other hand, kon si Marcos Jr. gid man – nga indi man imposible pensaron ni Unpredictable Duterte – indi gid man seguro daku nga disbentaha ini sa oposisyon.
Indi man kandidato si Duterte kag ang makasumpong na gid lang nila amo ang iban nga mga kandidato nga liwan ang kalibre sa kay Duterte.
Nadumduman ta pa ang pag-endorso ni anay Senador Ganzon sa iya utod nga nagadalagan meyor, nga bisan anhon niya duso sa mga botante pierde gihapon.
Kon may masaligan pa ang PDP-Laban nga partido ni Duterte amo gid lang ang pwersa sang partido kag sang ila na gid lang kaugalingon nga pagpanikasug. Problema pa gani kay sa subong ginaagawan pa ang liderato sang partido ni Secretary Cusi kag ni Senador Pacquiao.
***
Kon ako si Presidente Duterte, kampanyahan ko na lang ang mga pumuluyo nga suportahan ang akon maayo nga mga programa upod sa mga myembro sang PDP-Laban nga upod sa akon.
Indi man ini ugaling problema sang oposisyon kay pwede man nila updan ang maayo nga mga programa ni Duterte, although madamo sini ang depektoso kag salawayon samtang ginasulong man nila ang ila.
Samtang gatutok na sing lubos sa pag-atake ang oposisyon batok kay convicted Marcos Jr. kag sa iya mga binutig (lies) kag pagpatalang (disinformation) agud mapadayon pa ang kadalok sa poder kag manggad sang Marcos dynasty sa sobra 50 anyos na.
Sa bahin ni VP Leni Robredo, ang political survey sang SWS kag Pulse Asia nagasiling nga nagapangaduha siya kay Marcos Jr., apang nagapanguna naman ini sa survey sang CEAP kag Veritas Trust Survey.
Pinasahe man ang pangampanya sang Leni-Kiko tandem. Katulad ini sa People Power sang Edsa Revolution nga nagtumba sa kay Diktador Marcos Sr., nga nasandig sa “volunteerism”, ukon kusangloob kag mainit nga pagsakdag kon diin masig-gasto ang kada isa sa ila mga posters kag pag-upod sa caravan kag rally.
Padayon man ang pagbaskug sang mga “endorsement” sa ila sang nagakalain-lain nga sector.
Priority man sang Leni-Kiko tandem nga mahatag nila ang tanan nga “doable”, sa serbisyo man kag mga programa, agud maatubang ang mga problema angot sa COVID-19 sa karon kag kon palaron sila pagkatapos sang eleksyon.
Ginapatuman naman gani sang Dept.of Agriculture ang pagpauswag sang pangabuhian sang mga mangingisda kag mangunguma sa idalom sang Sagip Saka Act nga ang author si Senador Kiko Pangilinan./PN
