NAGA-amat-amat na dugok ang mga tawo sa sulod sang mga mall. Makita na ang mga bata kag mga tigulang nga nagalagaw kag ginabulong ang kahidlaw sa masobra duha ka tuig nga gindalukan sang higayon tungod man sa pandemya.
Makita man ang amat-amat nga pagbukas sang mga establisemyento komersyal sa palibot sang syudad. Ang paglagaw sang tawo sa mall, ang pagbukas sang mga negosyo kag ang mainit nga panahon ang magapasaka sa demand sang kuryente diri sa syudad sang Iloilo.
Nakita na ini nga sitwasyon sang MORE Power Corporation kabangdanan nga nagplano, nag-akto kag ginhatagan sang katumanan ang posible nga solusyon sa sini nga problema.
Ginalauman na nga magasaka ang pagkinahanglan sang kuryente sa bug-os nga City Proper sa syudad sang Iloilo kag ini ang gina-antisipar man sa iban pa nga substation sang MORE Power Corporation sa bug-os nga syudad sang Iloilo kabangdanan nga naghulag na sila sing mas temprano paagi sa pag-ilis sang 20 Mega Volt-Amp ukon MVA power transformer nga nangin 33 MVA na agud nga maakomodar ang anuman nga demand sa kuryente sang mga konsumidor.
Madinalag-on nga napaandar sang More Electric and Power Corporation ukon MORE Power agud makasuplay sang kuryente ang bag-o lang naangkon nga 33 MVA power transformer sa City Proper substation sadtong Marso 27, 2022.
Matapos ang 30 ka tuig, naislan gid man ang daan nga transformer sang nagligad nga distribution utility.
Natigayon nga naangkon sang MORE Power ang slightly used transformer gikan sa major electric distribution utility sa Luzon. Ang ini nga transformer gin-manufacture sang Fortune Hitachi sang Taiwan.
Nagabalor sang kapin sa 50 million pesos ang ini nga equipment kag ang pagpagana sini.
Ginpahayag ni Roel Z. Castro, ang President kag COO sang MORE Power, nga ang ini nga bag-o nga power asset kabahin lang sang 1.9 billion pesos nga investment sang MORE Power sa iya paghimakas nga ma-digitalize kag ma-modernize ang distribution system.
Lauman man ang pagpaandar sang 30 MVA sa Megaworld nga bag-o nga substation sa Mandurriao kag posible nga matigayon sa Setyembre sa sini nga tuig.
Antes magtakop ang ini nga tuig, ginalauman nga ang syudad sang Iloilo may yara na sang total capacity nga kapin 193MVA.
Dapat gid naton nga pasalamatan ang kahandaan kag athag nga panan-awan ni Roel Z. Castro, ang President kag COO sang MORE Power, sa mga posibilidad kag kon paano makalikaw sa mga problema nga posible nga magaluntad paagi sa paghimo sang mga tikang sa subong pa lang agud nga indi na ini madangatan pa kag makatublag pa sa tanan.
May mga problema nga nagaluntad nga indi malikawan apang ini ang mahagan-hagan kon ginahandaan na sing mas temprano pa.
Suno kay Douglas MacArthur, “Preparedness is the key to success and victory.” Nakita naton ini karon sa sahi sang pagdumala ni Mr. Roel Castro sa MORE Power bangud wala na niya ginahulat nga magpin-ot ang suplay sang kuryente sa mga konsumidor nga magaresulta sang masami nga kakulangan sang kuryente nga magatuga naman sang brownout. Sa subong pa lang, ginalantaw nila ang mga datus nga salandigan sa posible nga mangin demand sang kuryente sa mga panimalay kag mga negosyo. Antes pa man maguot sa sitwasyon ukon matabu ang sitwasyon kag mangita sang solusyon, subong may solusyon na nga handa mag-atubang sa anuman nga sitwasyon.
Indi luyag sang MORE Power nga mapaslawan sa iya ginpasalig sa mga konsumidor, indi sini luyag nga mapaslawan sa iya ginpangako nga maghatag sang barato, masaligan kag tayuyon nga suplay sang kuryente sa tagsa ka konsumidor.
Agud nga indi mapaslawan, dapat magpreparar. Kaangay sa ginsiling ni Benjamin Franklin, “By failing to prepare, you are preparing to fail.”
Kinahanglan lang naton nga mga konsumidor nga magbuylog kag maghangop sa mga ginapatigayon nga mga hilikuton nila kaangay sang pagluntad sang power interruption kon may ginakay-o ukon may nagaluntad nga problema bangud madasig man nila nga ginarespondihan kag gina-aktuhan agud nga mapabalik ang suplay sang kuryente.
Indi naton mabasol ang iban nga mga konsumidor nga wala sa sakop sang MORE Power nga maghandom nga sila ang maserbisyuhan man. Luyag man nila nga tayuyon ang suplay sang kuryente sa ila panimalay, wala sang masami nagaluntad nga power interruption kag mas barato nga presyo sang kuryente.
Madamo ang nagasiling diri sa syudad sang Iloilo nga tuman ka daku sang gin-imprubar sang sahi sang serbisyo sang distribution utility nga MORE Power kon ikumparar sa nagligad bangud nga mas madasig magresponder kag mapabalik gilayon ang suplay sa kuryente.
Ang tanan nga lihok sang MORE Power ang nasandig sa husto nga pagplano, paglantaw sa palaabuton base sa karon nga mga datus, kag ang abtik nga tikang sa paghimo sang desisyon gani maathag nga preparado gid sila sa pagserbisyo sa mga Ilonggo. (bertladera@gmail.com/PN)
