INDI naton masuay ang binubuot sang Diyos nga aton Manunuga (Creator) kag Mahal nga Ginoo.
Yara Siya sa ibabaw sang tanan sa Iya wala tupong nga kapinasahe, kag ang tanan yara sa idalom sang Iya gahum.
Tungod sini ang tanan nga nagakatabo either ginatugutan Niya nga hilway matabo ukon direkta Niya ginapatuman para sa Iya Divine Purposes, katulad sang paggamit sang pila Niya ka tinuga sa mga misyon nga luyag Niya patigayunon.
Pero, wala kita dapat kabalak-an sa Diyos, labi na gid ang mga “mainunungon (faithful) sa Iya kag sang Iya mga kasuguan. Ang Diyos Maayo (good), Matarong (Just), Mahigugmaon (loving) kag Maluluy-on (Merciful), nga indi naton dapat pangduha-duhaan pa.
Sa madamo nga kahigayunan, ugaling, indi naton mahangpan kon ngaa ginatugutan ukon direkta nga ginapatuman Niya ang pila ka hitabo, nga pila sini indi naton gani matul-id sa aton experyensya kag lohika (correct human reasoning).
Well, tawo man lang kita kag indi naton malab-ut ang tayog sang panghuna-huna kag ihibalo sang Diyos sa Iya wala tupong nga kinaalam.
Katulad sang kon ngaa ang mga maayo kag matarong kag bisan ang “faithful” sa Iya kinahanglan mag-antos, mapahilayo sa ila mga hinigugma, ukon malutos bisan sa manugdaug na nga sitwasyon.
God knows best, no doubt, kag kinahanglan lang nga magsalig kita sa Iya sa ano man nga matabo.
***
Sa madamo nga indi makapati nga mapierde sila sa nagligad nga eleksyon kon limpyo lang ang kampanyahanay, kag kon napierde gid man sila tungod lang sa fake news, patalang nga balita kag himo-himo nga pasibangod, wala na kita mahimo dira.
Natapos na ang inisipay nga sa daku nga abanse sang pangontra indi na malubag pa bisan may dinayaay kag may kademonyuhan pa sila nga ginhimo.
Gintugot ina sang Diyos nga matabo, nga sa kon ano man nga rason angot sa Iya Divine purposes dapat batunon ta na kag diskubrihon lang sa aton konsyensya kon ano gid ang luyag sang Diyos matabo despues.
Indi ayhan natabo ining kapaslawan tungod luyag sang Diyos matungkad gid ang aton balatyagon sa ka-importante sinang mga hitabo agud mapakita sa Iya ang mas mabungahon pa nga mga hilikuton?
Kon amo, kinahanglan gid mapabakud pa ang “coalition” sang mga pumuluyo nga nasuguran na sang eleksyon pa agud lubos na mapunggan ang nagaluntad sa subong kag ang posible nga pagbalik sang authoritarian rule katulad sang martial law regime sang amay sang nagdaug na nga Presidente.
Pero, sa napanugyan na naton sa ibabaw, dapat batunon na naton ang kadalag-an sang mga nagdalaug. Kag bantayan lang dayon ang ila hulag nga makapalain sa kawsa sang aton Demokrasya kag Kahilwayan.
Of course, kon maayo man lang ang ila ginahimo, dapat wala kita reklamo dira. Updan ang matarong nga hilikuton nila apang indi ang ila kademonyuhan!
***
Ginadayaw naton ang 10 ka pungsod sa ila panikasug agud maaway ang Climate Change.
Isa dira ang Denmark. Nag-invest ini sa highways sa lugar nga itukod ang electrified railroads.
Belgium, nga nagsugod na sa pagpauntat sang nabilin pa nila nga coal-powered plant.
Portugal, sa pag-promote sang “low-carbon economy”sa ila “Commitment to Green growth”.
Malta, sa pag-shift sa solar power plants sa ila energy generation.
Luxembourg, nga nag-komiter sing 20% drop sa ila CO2 emission. Nagsugod ini sang 4% drop sa ila CO2 emission sadtong 2015-2016.
Morocco, nga nag-komiter na sa pagsaylo sa wind, solar kag hydro power generation.
Cyprus, nag-drop sang ila CO2 emmission sing 3% kada tuig halin sadtong 2008.
United Kingdom. Sadtong April 21, 2017 nag-celebarte ini sang ila una nga 24-hour period nga wala coal power. Nag-komiter man ini sa pagpauntat sang ila katapusan nga coal-powered plant sa 2025.
Sweden. Naga-import sang garbage (basura) agud padalaganon ang ila recycling plant. Nag-komiter man sa pag-shift sa renewable energy katulad sang wind, solar kag hydropower pag-abot sang 2040.
France. Ini ang pungsod nga naga-coordinate sang Paris Agreement nga ginsugdan sadtong 2015, nga ginapilit mangin madinalag-on bisan pa sang pagpamalabag sang pila ka nasyon, lakip ang US sa panahon ni Presidente Trump. Nagbalik lang ang US sa Paris Agreement sang pagpungko na ni Presidente Biden. Samtang, wala pa man gani nila mapatuman ang kompensasyon sa mga gagmay nga mga pungsod nga nahalitan sang greenhouse gases nga ginapalapta sa bug-os nga kalibutan sang mga industrialized nations./PN
