NAGAPANGIBABAW ang pagpalangga ni Vice Gov. Christine “Tingting” Garin sa mga pumuluyo sang probinsya sang Iloilo. Nangin kaundan ini sang iya pamulong-pulong sadtong Hunyo 28, 2022 nga inagurasyon kon sa diin sila nga mga provincial elected officials ang nagsumpa sa ila katungdanan paagi kay Senador Juan Edgardo “Sonny” Angara.
Nagsumpa ang bise gobernador nga yara sa iya luyo ang iya iloy nga si San Joaquin Mayor Ninfa Garin, utod nga si Aambis-Owa Party list Representative Sharon Garin kag kaupod ang mga hinablos kag bayaw nga si Aambis-Owa Party list Representative Lex Colada.
Nangibabaw ang kaanyag sini sa iya pinasahi nga gown, simple apang elegante, nga gindesinyo sang artist nga si Sidney Eculla. Nagsibu ini sa iya paborito nga duag kag personalidad.
Kadungan sang pagdayaw sa iya sang mga tumalambong sa iya kaanyag kag elegante nga gown, gin-apresyar gid ang kaundan sang iya mensahe nga nagapasalamat kag nagapalangga sa probinsya sang Iloilo.
Ginpasalamatan sini ang mga pumuluyo kag lideres sa tagsa ka distrito sa probinsya sang Iloilo bangud nga wala siya sang nangin kasumpong sa nakaligad nga eleksyon kag tungod sini nangin pinasahi kag maragtason ang pulitika sa Iloilo.
Bilang pinakauna kag naga-isahanon nga babaye nga bise gobernador nga makaserbe sang tatlo ka termino ukon siyam ka tuig, lubos sini nga ginapasalamatan ang pagsalig kag kumpiyansa nga ginahatag sa iya.
Kaangay sa ila nahimo nga kadalag-an sa 13th SP, ginapanawagan sini sa iya mga kaupod sa 14th SP nga mag-ugyon kag ipangibabaw ang trabaho para sa probinsya kaysa sa partido. Kaangay sang nagligad, naghugpong sila para sa katumanan sang mga programa kag proyekto sang probinsya sang Iloilo bisan pa nga magkatuhay ang ila partido.
Maathag ang panawagan sini sa iya kaupdanan sa 14th SP nga sa ila pagpungko, sa pag-umpisa sang ila termino, dapat nga unahon nila ang pagtrabaho para sa probinsya sang Iloilo. Indi sila dapat mag-obra nga mangin tiglawas sang ila magkatuhay nga partido kag dapat ipangibabaw ang pagtrabaho para sa probinsya.
Angay nga ipabugal ang 13th SP bangud nangin responsive, nangin active kag nangin cohesive sila sa pagtuman sang ila katungdanan sa tunga sang hangkat sang pandemya nga nagtulod sa ila sa paghimo sang mga pamaagi agud nga maatubang ang health crisis.
Kaangay man nga mensahe ang iya ginpalab-ot sa una nga regular session ukon ang inaugural session sang 14th SP. Ginsulit sini ang pagpasalamat kag ang pangabay nga mag-ugyon para sa mas mapag-on kag mabuingahon nga pagserbisyo sa mga pumuluyo.
Bangud sa pandemya, nagbinuligay ang kada isa agud nga magmadinalag-on sa paghatag sang serbisyo sa pumuluyo ang probinsya kag ang ila pagbinuligay nagresulta sa pagkapasar sang 90 ka ordinansa, lakip na ang appropriation ordinances, nagpasar sang 2,214 ka mga resolution bisan pa may pandemya.
Naangkon nila ang preska nga mandatu gikan sa pumuluyo kag tungod sini nagakaangay lamang nga papag-unon ang ‘Ilonggo spirit’ sang kada isa kag bilang mga Fililipo.
Bisan pa nga nagarekober na kita gikan sa pandemya apang madamo pa sang dapat obrahon kaangay sang pagbatak sa ekonomiya kag palangabuhian, kag mga programa kag proyekto nga dapat iduso kag hatagan sang katumanan.
Ginalantaw sini nga paagi sa ila bag-o nga mandatu mas magahugpong pa gid sila tungod ini ang mas kinahanglan sang mga Ilonggo gikan sa ila nga mga lideres sang probinsya.
Kuntani magapabilin sa panimuot kag balatyagon sang mga katapo sang 14th SP ang tinaga sang bise gobernador nga nagasiling, “We must be here for one another, not against each other.”
Madamo sang mahimo ang 14th SP sa ila padayon nga paghugpong, sa ila padayon pagka-responsive sa anuman nga sitwasyon nga gina-atubang sang probinsya sang Iloilo.
Madamo sang ordinans nga ginpasar para sa pag-atubang sang pandemya, nakabulig ini sa gobernador agud nga mas hugot nga mapatuman ang mga tikang nga dapat himuon agud nga mapunggan ang paglapta sang virus kag paglalas sang sitwasyon.
May kapag-on sa pagtingob, may matigayon sa pagbuylog, kag ang mas nakabentaha diri ang mga Ilonggo sa nangin akto sang mga lideres sa probinsya sang Iloilo.
Wala sang may mawigit kon pasulabihon ang probinsya. Wala sang may mawad-an kon pasulabihon ang probinsya. Wala sang may malikatan kon pasulabihon ang probinsya. Tungod nga kon pasulabihon ang probinsya, kaangay nga ginapasulabi ang tanan nga Ilonggo.
Bilang iloy sang probinsya, kahibalo gid magtalupangod, magtatap kag mag-ulikid si Vice Governor Christine “Tingting” Garin sa mga nagabug-os sa Iloilo Provincial Government kag pumuluyo sa bug-os nga probinsya sang Iloilo.
Bangud sa pagpasulabi sang bise gobernador sa probinsya sang Iloilo, padayon siya nga ginasaligan sang mga pumuluyo kag ginatugyanan sang katungdanan nga mangin lider sang probinsya. (bertladera@gmail.com/PN)
