TUNGOD sa problema pa sa COVID-19 kag sa kakulangan sang mga hulot buluthuan, nga tungod man sa kakulangan mismo sang gobyerno sang pondo, ginapanugyan na gid lang anay ang Limited Face-to-Face (F2F) learning sa opening of classes sa Agosto 22, 2022, kon indi na ma-postpone pa ini.
Buot man silingon sini nga ang iban nga mga estudyante magapabilin anay sa online learning, ukon distance learning paagi sa internet, kag paagi sa modular learning sa puluy-an labi na gid para sa mga naga-kindergarten. Pwede man ang mixed ukon hybrid nga pagtuon, nga blended learning ang tawag sini sang mga otoridad sa edukasyon.
Tubtub karon, sunu sa DepEd, madamo na nga mga eskwelahan, pampubliko kag pribado, ang na-qualify sa F2F nga klase.
Sa Western Visayas, sunu sa DepEd-6 sadtong Hulyo 7, 2022, mga 50% na sang 5,068 ka mga eskwelahan pampubliko kag pribado ang nakapasar sa evaluation agud makapatuman sang F2F nga mga klase.
Mga 2,828 na ini sila tanan, sunu sa DepEd-6. In fact, mga 1,366 naman sa ila ang nagapatuman sang F2F nga klase sang nagligad pa nga school year.
Obviously, indi ma-implementar diri ang F2F nga klase sa tanan nga mga estudyante sa kinaandan nga kadamuon sa hulot, katulad sadtong wala pa ang COVID-19, tungod sa requirement sang health protocol.
Ang health protocol naga-requirer sang isa ukon duha ka metro sa tunga sang mga estudyante para malikawan ang infection.
Sunu gani sa DepEd Order NO. 34, series of 2022, ginatagaan ining mga na-qualify sa F2F classes sing option kon ano ang ila bagay itudlo. Ang direct in-person nga pag-klase bala, blended learning sa sulod sang tatlo (3) ka adlaw kag duha (2) ka adlaw nga distance learning, ukon apat (4) ka adlaw nga in-person kag isa (1) ka adlaw nga distance learning.
Kon ano man ang option nga itudlo ginatugyan na ini sang DepEd sa mga eskwelahan depende sa kahimtangan sang lakat sang COVID-19 sa ila lugar, sa kahulas ukon kabudlay, ukon ano kahilway sa peligro ang panghulag sang mga estudyante pakadto sa eskwelahan kag pauli sa ila mga puluy-an, kag kon ano ang mga kagamitan sa ila pagtuon kag healthcare ang available sa ila sa padayon nga pagluntad sang COVID-19.
***
Base sa akon experyensya bilang manunudlo sadto sa high school sa Iloilo City (Molo) NHS under sa “discovery method” nga pagtudlo sa Geometry bilang Math Major sa Secondary Education, pwede ang in-person (sa hulot buluthuan) kag distance learning (sa puluy-an) nga wala sing problema agud ma-akomodar ang tanan nga mga estudyante gamit ang isa lang ka hulot sa kinaandan nila nga kadamuon.
By the way, tapos man kita sang B.S. in Commerce, major in Banking & Finance, kag second year Law nga wala ko na ginpasige sang pag-deklarar ni Marcos Sr. sang martial law sadtong 1972.
Sa pagtudlo ko paagi sa “discovery method” – ang modern method of teaching sa panahon sang amon ka-batch – pwede ang duha ka klase sang pagtudlo sa isa ka hulot mismo.
Ang isa sini amo ang oral nga pagtudlo sa tunga sang manunudlo kag iya mga estudyante. Ang ikaduha amo ang tion sang “seat work” kon diin ginatagaan ang mga estudyante sang dugang nga mga problema nga sila mismo ang magamatu-matu sa paghibalo (independent learning) sa nabilin nga tion sang ila class period.
Tsekon sang manunudlo ang resulta sang “seat work” nila sa pagsulod na nila sa klase sa masunod nga adlaw. Reviewhon ang ila gintun-an sang nagligad nga adlaw kon kinahanglan kag ugaling sugdan ang bag-o nga leksyon sa klasehan.
Kon himuon nga regular ang ining duha ka klase sang pagtuon, pwede ini ma-apply sa F2F nga pagtuon sang tanan nga mga estudyante, nga ang katunga sa ila atubangon in-person sang manunudlo sa una nga adlaw, kag mag-“independent learning” sa sunod nga adlaw sa ila puluy-an, nga dayon buslan sa hulot sang nabilin nga katunga sang klase nga maga-independent learning man sa puluy-an pagkatapos, and so on.
In effect, indi na kinahanglan ang dugang nga hulot klasehan agud ma-akomodar ang nabilin nga katunga kay pwede na magamit nila ang pareho nga hulot sa ila bulos-bulos nga pagtuon in-person upod ang manunudlo kag sa ila “independent learning” sa puluy-an. Indi bala?/PN
