GINSAULOG sadtong Martes, Agosto 2, 2022, ang World Day Against Trafficking. Nagalaum kita nga madamo sa aton ang nagadumdom kag padayon nga naga-adbokasiya agud nga mapangapinan ang tagsa ka Ilonggo batok sa pamahog sang kalakasan kag pagpamentaha.
Gintambungan mismo ni Vice Governor Christine “Tingting” Garin ang forum nga ginhiwat sang Provincial Social Welfare and Development Office angot sa pagsaulog sang World Day Against Trafficking nga may tema “Use and Abuse Technology”.
Madamo ang nagpakigbahin sa sini nga higayon sang pagtililipon nga ginhiwat sa Casa Real, Old Capitol, Iloilo City sadtong Martes kag naghatag sang iya mensahe ang bise gobernador.
Lubos nga nagapasalamat ang bise gobernador sa PSWDO sa paghiwat sang forum kag ginpasalig nga ang provincial government padayon sa pag-adbokasiya batok sa trafficking in person kag violence against women and their children.
Ginpahayag ni Mr. Nove Oracion, ang Local Legislative Staff Officer II kag salaligan sang bise gobernador, nga may tatlo ka topiko nga ginhatagan sang igtalupangod sa sini nga forum kag ginalakipan ang mga ini sang tuhoy sa Republic Act 9208 ukon Anti-Trafficking in Persons Act of 2003, as amended by RA 10364 ukon kilala man bilang Expanded Anti-Trafficking in Persons Act of 2012; tuhoy sa impact sang COVID-19 Pandemic on Trafficking in Persons, kag ang Program for Resilience of Ilonggos in Mind and Emotions.
Tuman ka signipikante ang gintalakay nga mga topiko nga daku ang mabulig sa mga naga-adbokasiya kag nagabuylog sa pagpangapin batok sa pamahog kag pamentaha.
Makita naton nga wala nagapabaya ang Sangguniang Panlalawigan sang Iloilo, sa pagpanguna ni Vice Governor Christine “Tingting” Garin sa sini nga katungdanan para sa mga pumuluyo. Pamatuod diri ang tuman ka damo nga mga ordinansa kaangay sang gender and development code, ang anti-discrimination ordinance, kag ang Children’s Code. Dugan pa diri, may yara pa sang pending nga ordinansa sa komitiba nga amo ang anti-trafficking in person ordinance nga natalana nga talakayon sa masunod nga semana sang Sangguniang Panlalawigan.
Ginpat-ud sang bise gobernador nga tuman ka pag-on ang suporta sang probinsya sang Iloilo sa Republic Act No. 9208, as amended, ukon mas kilala bilang “An Act to Institute Policies to Eliminate Trafficking in Persons Especially Women and Children”.
Suno sa bise gobernador nga ginahatagan sang kabilinggan sang provincial government ang dignidad sang tawo kag ginagarantiya ang lubos nga respeto para sa tawhanon nga kinamatarong. Ginaduso ang pag-amlig sang tawo gikan sa anuman nga pamahog sang kalakasan kag pamentaha, papason ang trafficking in persons indi lamang nga suportahan ang trafficked persons kundi mas labaw sa tanan, ipasiguro ang ila recovery, rehabilitation kag reintegration nila sa mainstream sang sosyudad.
Kon naga-updanay ang tanan, maagom ang katuyuan kag handom para sa VAWC-free Province of Iloilo.
Kinahanglan lang naton nga mangin mabinantayon kag mangin aktibo sa adbokasiya agud nga wala sang may mabiktima nga Ilonggo.
Kahibalo kita nga nagabukas na ang madamo nga negosyo kag madamo sang oportunidad nga nagatamwa sa sin-o man, nagahulat nga makatrabaho ukon makapadulong sa iban nga lugar.
Ang ini nga higayon nangin palaagyan sang iban nga mga tawo nga bentahuso, ginagamit ang kahuyang sang ila isig-kapareho kag ginahimo nga biktima.
Makaluluoy ang mga biktima nga indi nabutang sa peligroso nga kahimtangan. Kinahanglan nga matapna ang mge bentahuso nga makapangbiktima paagi sa paghatag sang kaalam ukon ihibalo tuhoy sa kon paano sila makalikaw sa sini nga mga tawo. Dapat mahatagan sila sang palaagyan kon paano sila gilayon makapangayo sang bulig antes pa man maglala ang sitwasyon.
Importante nga masapar ang mga biktima antes sila mahulog sa kamot sang mga nagapamentaha.
Kinahanglan lang naton nga mag-aligmat agud indi lubos nga mahulog sa katalagman ang posible nga mangin biktima. Kadungan sini, aton man bululigan nga mabatak gikan sa kahul-anan ang mga nangin biktima paagi sa pagsapnay ukon pag-alay-ay sa ila agud indi sila mapuklid sang sirkumstansya.
Importante ang pag-ulikid sa isig-kapareho, batyagon ang ila kahimtangan kag hangpon ang ila nadangatan. Ipabatyag sa ila nga may komunidad nga nagatalupangod sa ila, nga wala sila ginapabay-an ukon ginasikway sang sosyudad.
Ang pagsaulog sang World Day Against Trafficking higayon agud dumdumon kag ipadayon nga pakig-angay agud nga mapangapinan ang mga pumuluyo.
Ang pagsuporta sang Iloilo Provincial Government kag mismo ni Vice Governor Christine “Tingting” Garin sa Republic Act No. 9208 makapapag-on sa sini nga kawsa kag makahatag sang determinasyon sa mga naga-adbokasiya nga indi magkalingkang ukon magkahuyang.
Padayon naton nga pamatukan ang trafficking in persons. (bertladera@gmail.com/PN)
