MADAMO sang mga proyekto nga ginapatuman sa bug-os nga probinsya sang Iloilo, ilabi na nga may yara pa gid sang ginpondohan ang National Task Force to End Local Communist Armed Conflict (NTF-ELCAC) nga mga proyekto sa mga lugar nga ila ginpangtumod nga dapat pasanyugon.
Nahibaluan nga may mga proyekyo nga ginapatuman ang Iloilo Provincial Government gikan sa iya pondo kag mga proyekto nga ginpondohan sang NTF-ELCAC kag iban pa nga mga ahensya.
Natalupangdan nga ang kada isa sa mga kontraktor ang indi lang isa ka proyekto ang ginatalupangod kundi nagadoble ukon nagatriple pa bangud sa kadamuon sang mga proyekto.
Namutikan man sang Sangguniang Panlalawigan nga nagasinampaw na ang mga proyekto nga ginapatuman sang mga kontraktor kabangdanan nga dapat ini hatagan sang igtalupangod bangud madamo man ang wala pa nahuman tubtub karon.
Nakaangkon sang interes ang Provincial Board sa mga ginapatuman nga mga proyekto tungod nga ang iban halos ginapabay-an na lamang kag malawig na ang pag-antus ukon perwisyo nga natuga sa mga pumuluyo.
Bangud sa reklamo sang mga pumuluyo, nakadangat sa igtalupangod sang mga opisyal sang probinsya ang sitwasyon kag gin-usisa kon ngaa tubtub karon wala nahuman ang mga proyekto.
Ginpadangat ni 2nd District Board Member Rolito Cajilig ang mga natukiban niya nga wala pa natapos nga proyekto sa iya nasakupan nga distrito sa Provincial Board nga gilayon man nga gin-aktuhan.
Ginpatawag ang mga natungdan, mga kontraktor kag talatapan nga napatuhoy diri, agud nga magpaathag sa mga sirkumstansya nga nagapalibot sa pakaatrasar sang mga proyekto.
May mga hitabu sadto, kaangay sa pagsunog sang ginarentahan sang kontraktor nga backhoe didto sa Leon, Iloilo, nga mas nagapadugay sa paghuman sang proyekto nga dapat hatagan sang igtalupangod kag proteksyon sang mga kapulisan.
Bangud sa sini nga mga hitabu, ginatuyo karon sang Sangguniang Panlalawigan nga hibaluon ang kahimtangan sang tanan nga mga proyekto paagi sa pagpatawag sa mga kontraktor kag pagtipon sa mga datus agud mahisayran ang kahimtangan sang mga proyekto.
Luyag buligan sang Sangguniang Panlalawigan si Gov. Arthur Defensor Jr. paagi sa pag-monitor sa mga proyekto agud nga indi mabudlayan ang mga pumuluyo kag agud nga mangin tayuyon ang serbisyo nga ginadul-ong ni Vice Gov. Christine “Tingting” Garin.
Una na nga gintalupangod ni 2nd District Board Member Rolito Cajilig ang kahimtangan sang Talacu-an Bridge sa Brgy. Talacu-an, Leon, Iloilo nga madugay mahuman kag nakita sini nga daw wala sang may nagatrabaho. Bangud sa iya pagtalakay sini, nakadangat sa mga natungdan ang sitwasyon kag gilayon nga ginpa-usisa nga nagtulod naman sa kontraktor nga mag-akto gilayon.
Sunod nga gintalupagod sini ang Leon-Omambong-Cordova Road nga isa ka provincial road nga proyekto nga nagabalor sang Php 7,699,614.65 kag naga-angot sa Brgy. Barosong, Tigbauan, Iloilo kag Brgy. Talacuan, Leon, Iloilo.
Nagakaangay gid man nga talupangdon ang kahimtangan sang mga proyekto agud mahibaluan kon tapos na ukon naatrasar agud nga matumod kon ano ang kabangdanan kag kon ano ang mabulig sang gobyerno para sa gilayon nga paghuman sang proyekto.
Kahibalo man ang tanan kon ano ang huol nga matuga sang ginapatuman nga proyekto sa matag-adlaw nga pagsinarayo sang pumuluyo. Mas mabudlay pa gid subong bangud naga-ulan kag malunang ang alagyan.
Peligroso ang madanlog nga dalan kag mabudlay nga alagyan para sa mga pumuluyo, ilabi na sa mga estudyante kag mga nagatrabaho, kag sa mga negosyante nga may ginadala nga mga produkto.
Maayo nga panugod ini sa karon nga dapat talupangdon ang mga proyekto. Mas maayo nga nagahulag ang Sangguniang Panlalawigan paagi sa liderato ni Vice Gov. Garin kag tanan nga katapo sini agud nga mabuligan ang opisina sang gobernador nga mamonitor ini tanan.
Manami ang madangatan kon nagabinuligay ang tanan. Para ini sa kaayuhan sang pumuluyo kag agud mapasiguro nga wala sang uyang sa ginapatuman nga mga proyekto.
Kon sa kinaadan lang nga kadamuon sang proyekto, pwede ini matugyan lang sa Provincial Engineer’s Office, apang bangud sa hinali nga pagdamo sang proyekto kinanglan ang bulig sang iban nga opisina nga magbantay ukon mag-monitor.
Ang ini nga tuyo makapatagam sa mga kontraktor nga maglaminday kag magaduso ini sa ila agud nga tutukan kag tapuson ang proyekto santu sa kontrata nga ila ginpirmahan.
Ginahingyo man ang mga pumuluyo nga mangin mabinantayon kag ireport sa mga opisyal kon may matalupangdan nga pagka-atrasar sang mga proyekto agud nga maaktuhan gilayon kag masolbar ang mga problema. (bertladera@gmail.com/PN)
