GINA-dumdum sang mga Katoliko, nga gina-updan man sang iban nga denominasyon Kristiyano, ang nagtaliwan nila nga mga Pinalangga kag mga Himata sa tion sang Pyesta Minatay.
Gina-selebrar ini nga okasyon sa duha ka adlaw – sa All Saints’ Day, ukon Adlaw sang mga Balaan (saints), sa Nobyembre 1, kag sa All Souls’s Day sa Nobyembre 2 para sa tanan nga mga Kalag (souls).
Sa pagdumdum sa mga nagtaliwan, masami may ginahalad sa mga lulubngan sing mga bulak kag pagsindi sing kandila.
Partikular sa bahin sang mga Katoliko, ginaupdan man ini sang pagpangamuyo sa atubangan sang mga lulubngan samtang ginasindihan ang mga kandila. Pagpabatyag ini sang ila paglaum agud mabuligan sa pagsaka sa Langit ang ila mga nagtaliwan nga wala pa lubos mapatawad sang Diyos ang ila mga kasal-anan.
***
Indi katingalahan nga ang kadam-an naga-selebrar sang Pyesta sang Minatay sa All Saints’ Day sa Nobyembre 1.
Una, tungod sugod ini nga adlaw sang Pyesta Minatay. Ikaduha, agud seguro ipangamuyo sa Diyos, sa bulig sang mga santos, ang lubos na nga kaluasan sang ila mga nagtaliwan.
Ang kaluasan sang kalag indi lang naton maangkon sa sinsero nga paghinulsol sa mga kasal-anan, kundi sa pagka-inosente man sang mga kabataan.
Bilang padya man sa mga may espesyal nga misyon sa Diyos katulad sang mga propeta kag matutum nga suluguon sang Diyos sa Bibliya.
May espesyal man nga balatyagon ang Diyos sa mga gina-abusohan ang pagkatawo nga nagatampalas na sa Ispiritu Santo.
Katulad sang natabo kay Jovelyn nga ginlugos kag ginpatay sang iya mismo pakaisa kag isa pa ka himata kag ginpabayaan lang udakan sang mga dalok sa unod nga mga kasapatan nga indi na matagaan sing respeto ang iya pagkatawo nga gintuga sang Diyos sa iya mismo imahen.
Tungod sa makahalanusbo niya nga nadangtan, gapati kita nga ginbaton dayon sang Diyos sa Langit si Jovelyn. God bless you, Jovelyn!
***
Dapat indi man ibalewala ang All Souls’ Day sa Nobyembre 2. In fact, mas importante ini kay gapadumdum ini sa kapalaran sang katauhan sa pagbalik ni Hesukristo bilang Hari sang tanan nga katauhan, kon san-o husgaran Niya sa ulihi nga tion (Last Judgment, ukon Judgment of the Nations) ang tanan nga katauhan.
Sa ina nga tion, ibulag niya ang mga matarong nga makadto sa “eternal life” kag ang indi-matarong nga mahulog sa “eternal piunishment”.
Wala sing bisan sin-o sa aton ang makapat-ud sang pagbalik ni Kristo. Gani, importante gid nga indi kita malipat sa ina nga hitabo, nga pwede malakip na naton sa aton pagpangamuyo sa Nobyembre 1.
Sa gospel angot sa Last Judgment, ginapanugyan diri ni Kristo ang kaayuhan nga dapat himuon naton agud mapasakop sa Iya kaharian sa duta. Panugyan Niya ang pag-ulikid sa kinahanglanon sang mga labing kubos.
Ginapanugyan Niya (Matthew 25:31-46 halin sa New American Bible) ang paghatag sing pagtamod sa mga bululigan kag ang mga talabangan, ang nagaantos sa bilangguan, kag ang nagakinahanglan sing paglaum sa pagpalangga sang Diyos.
***
Angot sa pagdumdum sang Last Judgment sa Nobyembre 2, ang aton abyan nga si Pedro gapati nga malapit na lang matabo ini, bisan pa siya man indi makapat-ud kon san-o gid ini matabo.
Nagapati gani si Pedro nga basi mauna na sa sa pagkari si Kristo bag-o pa ang Last Judgment agud makabulig sa pagluas sang madamo pa nga nagtalang sa tadlong nga dalanon. Basi kuno gani maga-disguise si Kristo.
Bilang isa ka pari sa pagpahanumdum sa mga salawayon sang batasan nga mga pari agud magbag-o.
Ukon bilang isa ka evangelist, nga pwede dira ang isa ka journalist, nga katulad ni San Juan wala mahadlok magbuyagyag sang kalainan kag kagarukan sa gobyerno. Ginbayaran gid gani niya ini sang iya ulo nga ginhalad sa bandehado sa atubangan sang demonyo nga hari. Katulad man ayhan ni journalist Percy Lapid nga ginpapatay gid? Wala masiling si Pedro kundi maglungo-lungo lang sang iya ulo.
Ukon ano pa nga personalidad kon diin makabulig Siya sa pagpahanumdum sa mga labing makasasala agud magliso na sang ila balatyagon pabor sa Diyos.
***
By the way, sin-o gid ayhan ang mga mastermind sang pagpapatay kay Percy? Laban-laban ang may daku gid nga motibo, may ikasarang nga magpapatay, kag nagapati nga kaya nila mahinago ang ila krimen tungod sang ila kwarta kag poder.
Madamo gani ang nagapati nga indi na madakpan pa kon sin-o man ang mga mastermind sa pagpatay kay Percy tungod todo poderoso ini sila. Ano abe sa imo?/PN
