NAGSUGOD sa nakalusot nga chorizo bilbao gikan sa Binondo, Manila ang paglapta sang African Swine Fever (ASF) virus sa Barangay Bita Norte, Oton, Iloilo sadtong Septiembre sin inga tuig.
Malawig man ang panagang kag pagbantay sang Iloilo Provincial Veterinary Office agud nga maproteksyunan ang probinsya sang Iloilo sa sini nga virus nga makahalalit sa baboy.
Bangud lang sa wala pasunaid kag kabalaka nga mga tawo, nagpalusot sila, gintago gid ang produkto nga indi madakpan, apang nagsungaw ang kamatuoran kag ang halit indi na matakus kag mapunggan.
Naghimakas ang 14th Sangguniang Panlalawigan ng Iloilo sa pagpanguna ni Vice Governor Christine “Tingting” Garin nga magdihon sang ordinansa agud nga matapna ang pagsulod sang African Swine Fever (ASF) virus. Nakahibalo ang 14th SP nga dapat maghimo sang angay nga tikang agud pangapinan ang hog industry sa Iloilo apang may naghalit gid kag nagpahibi sa mga manugsagod sang baboy tungod sa kahul-anan nga ila ginaagunto.
Nahibaluan nga nauna na nga napasar nga ordinansa nga Provincial Ordinance No. 2021-250 nga may tigulo “An Ordinance Banning The Entry Of Livestock Transport Carriers And Hog Vans To The Province Of Iloilo Without Disinfection Certificate And/Or African Swine Fever-Free Certificate From The Point Of Origin Or Port Of Exit And Live Pig, Boar Semen, Pork And Pork Products Including Food Items Containing Pork Originating From Manufactured And/Or Processed In Areas Affected By African Swine Fever (Asf), As Declared By The Department Of Agriculture (Da), And Providing Funds Thereof” nga gin-author ni 3rd District Board Member Matt Palabrica.
Malawig man ang tion sang pagpangapin apang ang abilidad sang manugpalusot ang nagpangibabaw kag nagtuga sang halit.
Gilayon pa gid nga nag-akto ang 14th SP kag nagdihon sila sang bag-o nga ordinansa nga Provincial Ordinance No. 2022-286 nga may tigulo “An Ordinance Creating the Provincial Task Force and Technical Working Group, and Adopting and Implementing the ‘Bantay ASF sa Barangay’ or the “BABy ASF Program” in the Province of Iloilo and Providing Powers thereof and for other purposes”.
Luyag sang ordinansa nga penahan ang mga magalapas agud nga maamligan ang probinsya batok sa ASF. Nasaad sa Section 10 sang Provincial Ordinance No. 2022-286 ang mga ginadumilian nga mga akto.
May paglapas sa Section 10 kon wala sang Veterinary Health Certificate ang gina-transport nga baboy, kon wala sang Certificate of Free Status on ASF gikan sa barangay ukon sa Municipal Agriculture Office ukon sa Veterinary Doctor gikan sa ila Veterinary Office; kon yara sa red area, dapat may laboratory test result tuhoy sa ASF. Dapat may weekly negative disease monitoring report nga obrahon; kon taguon ang impormasyon, kaangay sa natabu sa Oton, Iloilo nga sadtong Septiembre pa nakamonitor na ang mga tawo nga may sintoma na sang ASF; kag kon dal-on ang napatay nga sapat gikan sa quarantine area padulong sa iban nga lugar. Ginadumilian man ang movement of animals nga wala sang angay nga permiso ukon dokumento. (To be continued/PN)
