MALAWIG man nga panahon nga ginagamit ang signal jamming sa pagtapna nga magluntad ang anuman nga akto sang terorismo sa kahiwatan sang Dinagyang sa syudad sang Iloilo.
Nangin salandigan na ini sang kapulisan, bisan sin-o pa ang City Police Director, sa paghatag sang seguridad sa sining tuigan nga kahiwatan. Sadto pa man, wala sang may nagluntad nga akto sang terorismo bangud sa pagkamabinantayon sang mga pumuluyo, nagabuylog sa pagpabilin sang kalinong kag katawhay, kag nagahatag sang impormasyon sa kapulisan kon may namutikan nga makaduluda ukon kamala-malahan sa palibot.
Sa subong nga tuig, ginatuyo naman nga ipatuman ang signal jamming sa palibot sang City Proper sa syudad sang Iloilo umpisa alas 6:00 sang aga tubtob alas 2:00 sang hapon sa Enero 21 kag 22. Angot sini, nagpadala na sang hingyo ang Iloilo City Police Office sa National Telecommunications Commission nga tugutan ang in inga tuyo para sa seguridad sang mga bisita kag tumalambong.
Magluwas sa City proper, may tuyo man nga ipatigayon ang signal jamming sa distrito sang Mandurriao sa Enero 21, umpisa alas 6:00 sang gab-i tubtub alas 9:00 sang gab-i para sa Dinagyang Ilominations kag Floats Parade of Lights.
Bisan pa nga may ginapatuman nga 11 ka adlaw nga gun ban, umpisa Enero 13 tubtob 23, apang nagapati ang kapulisan nga daku ang mabulig sang signal jamming sa paghatag sang seguridad sa pumuluyo.
Sa ipatuman nga gun ban, ang kapulisan lamang ang tugutan nga makabitbit sang armas-luthang.
Plastado naman ang safety plan umpisa sa Biernes, Enero 13, nga paghiwat sang opening salvo kag para sa kabug-usan nga kahiwatan sang Dinagyang.
May natukod na nga border control kag may pagahiwaton nga checkpoint operations sa gwa kag sa tunga sang mga kabanwahanan sang Oton, Pavia kag Leganes.
Kon paminsaron gid, daw kaangay nga nasikop na sang lambat sang proteksyon ang palibot sang syudad sang Iloilo batok sa mga may tuyo nga magtuga sang gamo ukon kalakasan. Madamo man sang kapulisan nga makita sa palibot kag nagapamulak ang palibot sang mga judging area kag sa lugar kon sa diin nahamtang ang mga bisita sang syudad.
May kapin sa 6,000 ka personnel sang Philippine National Police (PNP), Philippine Army, Bureau of Jail Management and Penology, Bureau of Fire Protection, Public Safety and Transportation Management Office, Reserved Officers Training Corps sang mga kolehiyo kag mga unibersidad sa Iloilo kag iban pa nga force multipliers.
Maathag nga preparado kag nangin kiunaandan na ang paghimo sang plano para sa seguridad sang kahiwatan may kaantanan sa Dinagyang Festival.
Malawig man ang panahon nga naga-agwanta ang pumuluyo sa kawad-an sang signal sa tagsa ka kahiwatan sang Dinagyang Festival, ilabi na sa sulod sang duha ka adlaw – Sabado kag Domingo.
Masami nga nagabatyag sang kabudlay ang kada isa sa pagpakig-angot bangud nga wala sang signal ang cellphone. Mabudlay maghimo sang komunikasyon kag nagaresulta ini sang masami nga maghulag sang tawo, pagsaylo-saylo bangud nagapangitaay tubtob nga magtabu-ay.
Mabudlay man ini sa mga katapo sang media nga nagahiwat sang ila tagsa ka live coverage, ilabi na karon nga ang tanan nagasandig sa signal sang internet para makapalayag.
Sadtong mga nagliligad nga panahon, may ginahulaman kami nga linya sang telepono para sa live radio broadcast. Apang karon nga panahon, ang tawo wala lang nagasandig sa pagwaragwag sa radio tungod luyag sang kadamuan nga makita ang hitabu kag mas ginapili nila nga maglantaw sa cellphone kaysa sa magpamati lamang sa radyo.
Kalabanan sang media outlet may yara sang Facebook page kag diri nagapalayag sang aktwal nga pagpasundayag sang mga nagapasakop nga tribu sa paindis-indis.
Sa subong, kinahanglan na siguro nga liwat nga timbangon ang sitwasyon nga indi makasablag sa pagbantala sang mga hitabu. Timbangon naton kon ano ang mga bentaha labaw sa mga disbentaha sa sin inga panahon kag karon nga sitwasyon.
Kon nagapati ang kapulisan nga supisyente ang ila preparasyon para sa seguridad, sa gwa kag sa sulod sang syudad, angay man siguro nga konsiderahon ang paghatag sang ligwa nga maka-usar sang cellphone ang kada isa, indi lamang para sa personal nga katuyuan kundi lakip man ang pagpalayag sang mga balita kag impormasyon.
Kon may mapag-on nga balasehan, kaangay sang intelligence report nga may mga grupo nga nagatuyo nga magsabotahe sa kahiwatan, posible nga konsiderahon ang pagpatuman sang signal jamming. Apang, kon para lang sa kombenyente kag balibad para sa seguridad, dapat nga konsiderahon man ang kahilwayan sa pagbantala sang mga balita gamit ang moderno nga teknolohiya.
Nagapati kita nga malinong kag matawhay ang syudad sang Iloilo. Bisan ang kapulisan nagapati nga wala sang problema sa kalakasan ang syudad kag preparado sa paghatag sang seguridad.
Kabay nga konsiderahon nga indi na pag-ipatuman ang signal jamming para sa mas maduagon, aktwal kag mapagsik nga pagsaulog sang Dinagyang Festival. (bertladera@gmail.com/PN)
