SADTONG anom ka tuig nga nagligad na-ospital ako tungod sa mild stroke. Naggwa ako pagkatapos sang anom ka adlaw agud padayunon lang ang akon pagpaayo sa balay.
Tungod sa mga pribelihiyo sang isa ka senior citizen – katulad sang 12% VAT removed, PhilHealth coverage, 20% discount sa bulong – wala ako kag ang akon pamilya nagkabalaka bisan pa sa pribado nga ospital ako nagpa-confine.
Sa sige ugaling pagbakal sang bulong kag kadamo sang ginatiid sang mga doctor sa sulod sang akon lawas, didto ko natantya nga basi kulangon ako sing inugbayad kag ma-stranded sa ospital.
Gani, gin-kumbinse ko ang akon pamilya nga kinahanglan ko magpauli na kag sa balay padayunon ang akon pagpaayo.
Luyag pa sadto ako punggan sang doktor. So nag-pirma ako sang waiver agud wala sing salabton ang ospital kon matabo ako sa paggwa ko.
Ang ginbayran sang amon pamilya sadto mga P11,000 (neto) para sa hospital charges plus ang mga P10,000 nga ginpabakal nga mga bulong sa gwa sang ospital.
***
Sining ulihi lang, mga anom ka tuig nga nagligad, na-ospital naman ako.
Nagtupa naman ako sa pribado gihapon nga ospital tungod medyo nag-improve man ang earnings sang pamilya.
Pagkatapos sang pila ka adlaw, ugaling, nadiskubrihan ko ang sobra nga kamahal sang mga bulong sa pharmacy sang ospital kag sa gwa.
Mataas man ang visiting rate sang akon visiting doktor kag ang daily rate sang akon kwarto. Dugang pa ang mataas man nga rate sang nagakalain-lain nga paglili sa sulod sang akon lawas agud mahibal-an gid ang kabangdanan sang akon ginabatyag.
Kinulbaan ako kay sobra ini kaayo kataas nga galastuhon sa ginpaabot ko ikumparar sa nagligad ko nga pagpa-ospital sa halos pareho man nga ginhimo sa akon.
Gani naghingyo ako sa akon pamilya pagkatapos sang tatlo ka adlaw nga maggwa na lang kay basi ma-stranded ako kon magpabilin pa ako sa ospital.
Nagpasugot ang akon doktor, kag nag-prescribe na gid lang sang isa ka semana nga pagbulong sa balay kag pagkatapos sina mabalik ako sa iya. Naggwa ako sa ospital sang ikaapat nga adlaw.
Sa ina nga hugada, naglab-ut ang amon balayran sa neto nga P40,000 kag mga P15,000 nga bulong sa gwa. Naglab-ut ini tanan sa P55,000.
Atong P21,000 nga gingasto namon sadto malayo kaayo, obviously, sa gingasto namon sining ulihi nga P55,000!
Salamat kay nabayran gid namon ini paagi sa pag-inamutay sang mga myembro sang amon pamilya.
Kahibalo ang akon fraternity, kag naghatag man sing bulig nga P5,000 ang Iloilo Alumni Council sang Sigma Rho Fraternity kag Sorority, Iloilo Chapter sa pagpanguna ni Brod Roger Lopez. Nagpaaman pa amot gani si Sis Rose Rivera sing P1,000. Thanks gid sa inyo tanan, brods kag sis!
By the way, katapo ang SR Iloilo Chapter sa Samahan ng mga Sigma Rho sa PIlipinas, Inc. Nangin Grand Archon man ako sang Iloilo Chapter sang Sigma Rho sadto sa University of Iloilo.
***
Wala kita nagabasol sa pribado nga ospital sa pagtaas sang ila sulokton. Basta nagakaigu lang, okey sa akon.
Ina tungod ginpili naton diri sa Filipinas ang mangabuhi sing Hilway, nga ang isa ka ginapatuman diri amo ang Free Enterprise nga sistima sang ekonomiya.
Mayor nga prinsipyo diri amo ang Law of Supply and Demand. Bunga man sini ang natural nga competition sang mga negosyo nga lakip diri ang mga ospital.
Indi man ugaling buot silingon sini nga pwede mo na abusuhon ang imo pareho labi na gid ang mga kubos. May mga kasuguan man nga naga-protejer sang ila kinamatarong batok, por ejemplo, sa sobra nga presyo sang basic goods.
“Unusual” ugaling ang mga hitabo sa pungsod sa pag-abot sang Covid-19 sadtong Pebrero 2020. Tungod sa mga restriction madamo ang nawad-an sing palangabuhian, samtang ang wala swerte nga madamo nalab-ut gid sang kawit ni Kamatayan.
Sang magkalma ang Covid-19 tungod sa bakuna, amat-amat nga nagbangon ang ekonomiya sang pungsod, lakip na sa siyudad sang Iloilo.
Natukod man diri ang Iloilo City Hospital kag madamo nga mga health centers.
Daku nga bagay ini para sa mga pumuluyo sang Iloilo City sa pagsabat sang kinahanglan nga pagtatap sa ila ikaayong lawas.
Diri na lang gani ako seguro mapa-confine sa Iloilo City Hospital kon liwat ma-ospital ako kag indi na didto sa mga pribado nga mga ospital. Of course, tani indi man matabo ina sa akon. Kon matabo gid man, pwede lang tani ako matatap sa balay tubtub “Baybay Life!”/PN
