SANG sini lang, nangin biktima kita sang isa ka malimbungon nga taxi driver.
Paano ini natabo sa akon? Na-engganyo ako nanday Mrs. sa 1st Birthday celebration sang anak sang iya hinablos sadtong Lunes (Abril 10) sa isa ka beach resort sa Oton.
Sa ina nga adlaw sang Lunes day-off sang mga empleyado sa pungsod tungod sang nagligad nga adlaw (Domingo, Abril 9) gina-selebrar ang Araw ng Kagitingan.
Sa masami, kon matoon ang isa ka kasubong nga holiday sa Domingo, ginapatuman ang day-off sa masunod nga Lunes agud ma-enjoy man sang mga empleyado ang day-off sa Lunes nga work day.
Kaupod ko diri si Mrs., ang anak ko nga maestra kag si ugangan-babaye. Kaupod man namon diri ang mga ginikanan ni Baby Boy Nathan kag pila pa ka katapo sang amon mga pamilya, mga maninay kag mga maninoy, kag pila ka mga abyan nga tanan naglab-ot sobra sa 20 ka tawo.
Nag-abot kami diri sang mga a los 9 sang aga. Gin-okupar namon diri ang isa ka daku nga cottage. Dayon paligo sang iban sa maaya-aya nga baybayon sa idalom sang summer heat. Ang iban nagpabilin sa takas agud himuson ang pila ka lulutuon para sa dinuguan, sinugba nga baboy, kag naprito nga lumpia. Ang iban may dala nga daan sang mga luto na. Pila man sini ang nabakal namon sa ginalibud sa resort, katulad sang watermelon, talaba, kag iban pa.
Pag-abot sang a las 12 dayon ginhiwat ang pagsinadya sa pag-ubay sang sound system nga indi man matonog gid agud indi man makatublag gid sa iban nga mga bisita sa palibut namon nga nagdamo na pakadto sa ugto.
Tapos sini nagpaligo ang wala pa ka paligo, samtang liwat nagpaligo ang iban kay daw malamig pa man kuno ang tubig-dagat bisan naga-tagiti ang init.
Tungod ina seguro kay ang init sa ibabaw pa lang sang tubig kag medyo malamig gihapon sa idalom. Kon gab-i lain naman ang sitwasyon, malamig sa ibabaw kag mainit sa idalom. Ina ang natun-an ko sa mga pakaisa ko nga mananalom sang isda sa Baryo Sinapsapan, Guimaras.
***
Ako lang kag si ugangan ang senior citizen sa nag-upod sa birthday party.
Hambalon pa, daw wala na gid man kami ni ugangan mahimo sa pag-enjoy sa resort samtang gasinadya ang mga linghod sa baybayon kag sa takas, gani naglisensya kami nga mauna sa pagpauli. Mga las dos sa hapon na ato.
Nakasakay kami sa taxi nga gintawgan namon sa telepono sang isa taxi company sa siyudad sang Iloilo. Madamo matuod ang nagalalabay sa atubangan sang beach resort apang pulos puno.
Na-notaran ko ugaling nga wala naga-andar ang metro samtang nagadalagan ang taxi. Ginmuno ko ini. Siling sang drayber nga wala niya gin-paandar ang metro tungod doble byahe siya kuno sa amon. Halin pa kuno siya sa siyudad agud magsugat kag magdala pauli sa amon. Naakig ako kon ngaa wala nga daan nanugid ang drayber, kuntani nakapangita kami lain nga taxi.
Pensar seguro sang drayber nga tungod senior citizen kami mahaslo niya kami.
Siling ko sa iya nga naga-ubra ako sa media, sa Panay News. Daw nakibot siya. Ginsugid ko dayon nga nahibal-an ko ang regulasyon sang LTO sa pagbayad sing pamasahe sa taxi. Kag ina agud gamiton pirme ang metro sa tanan nga byahe.
Nagbag-o ang iya bayhon kay indi na niya ako mabais. Nanawag siya sa ila base dira sa siyudad agud i-explicar ang sitwasyon sang amon byahe. Ginsugid niya sa base nga sukton niya tani kami sing P400 tungod doble byahe siya kuno.
Wala ko na mabatian ang sabat sang base. Pinahog ko dayon siya nga pwede ko siya ireklamo kag mapakuhaan sing lisensya tungod sini.
Daw kinulbaan siya kag nagsiling na gid lang nga: “Ti,kamo na lang sir kahibalo kon pila ang ibayad ninyo sa akon…”
Naluoy na lang ako sa iya kay daw mahibi na siya sa kakulba sa pamahog ko. Gintagaan ko na lang siya sing P350 sa pag-abot sa balay nga may paaman nga akig.
Indi ko na lang hingadlan ang iya ngalan kag ang ila taxi company sa akon kolum.
Gasalig na lang ako nga makilal-an gid siya sang iya kompaniya kag sang LTO nga obligasyon ang pirme mag-monitor sa ginahimo sang mga taxi. Ang masugid ko lang nga naghalin kami sa Anhawan Beach Resort mga a las dos sa hapon sadtong Abril 10 pauli sa siyudad sang Iloilo. Sila na lang da ang magpa-siktu sa iya./PN
