TUMALAGASAHON ang higayon nga dayawon sang naga-regulate ang institusyon nga iya gina-regulate. Tungod sa masami, mabatian lang naton ang mga pagpanadlong ukon pagrekomendar sa angay nga himuon agud nga mapaayo ang serbisyo nga ginatan-ay sa mga tawo.
Nalipay kita nga mismo si Energy Regulatory Commission (ERC) Chairman Atty. Monalisa Dimalanta ang nagdayaw sa More Electric and Power Corporation (MORE Power) sa maayo sini nga pagdumala kag pagsunod sa Magna Carta for Residential Electricity Consumers kasunod sang ginpatuman nga bill deposit refund sa ila mga customers kag pag-angkon sang manubo nga power rate sa pungsod.
Gina-ingganyo ni Dimalanta ang iban pa nga Distribution Utilities(DUs) ukon mga electricity provider sa bug-os nga pungsod nga sundon bilang ehemplo ang ginahimo sang More Power.
Kon masarangan ini nga himuon sang MORE Power nga maghatag sang refund sa iya mga konsumidor kag mapanubo ang sukot sa kuryente, posible nga mahimo man ini sang iban para sa benepisyo sang ila ginaserbisyuhan nga mga konsumidor.
Padayon ang pagpanilag sang ERC agud masiguro ang rasonable nga presyo sang kuryente santu sa probisyon sang RA 9136 ukon Electric Power and Industry Reform Act (EPIRA Law).
Sa sulod sang magkasunod nga anum ka bulan sa sini nga tuig nagnubo ang sukot sa kuryente sang MORE Power para sa mga residente nga ginaserbisyuhan sini sa Iloilo City.
Ang residential rate sang More Power para sa bulan sang Mayo tubtob Hunyo nagnubo sang halos P12.2990 per kilowatt-hour (kWh) gikan sa P13.2511 per kWh.
Positibo ang More Power nga padayon pa ang pagnubo sang ila sukot sa kuryente tubtob sa pagtakop sang tuig.
Ginpaathag ni Niel Parcon, MORE Power vice president for corporate planning and regulatory affairs, nga duha sa nangin daku nga factor sa pagnubo sang presyo sang kuryente ang pagbakal nila sang geothermal energy gikan sa geothermal plant sang Energy Development Corp sa Leyte kag ang pagnubo man sang presyo sang coal sa world market gikan sa $488 per ton nga nangin $200 per ton.
Nabatyagan gid sang mga konsumidor sa syudad sang Iloilo ang epekto sa pagnubo sang ila balayran sa kuryente nga nagnubo sang P0.9522 per kWh.
Isa sa mga kabangdanan amo ang padayon nga pagnubo sang generation cost. Tungod man ini sa pagdugang sang geothermal power sang Energy Development Corporation sa power supply mix. Lakip man diri ang manubo nga exposure sa high spot market prices sa Wholesale Electricity Spot Market ang may daku man nga papel sa pagpanubo sang generation costs, kag ang pagnubo sang coal prices sa world market.
Kaangay sa ginasiling nga domino effect, nagnubo man ang value-added tax (VAT) sa generation, nagnubo ang transmission charge, kag ancillary service charge.
Bangud man sa paghimakas sang MORE Power nga mabantayan ang kinawatay sang kuryente, nagtuga ini sang positibo nga benepisyo sa pumuluyo tungod nagnubo man ang system loss charge.
Sa bahin sang refund sa bill deposit, mapamatud-an sang mga konsumidor ang pinasahi nga serbisyo sang MORE Power kag wala lamang ini naga-istorya kundi ginapatupa gid ang benepisyo para sa konsumidor.
Una nga ehemplo diri ang tatlo ka konsumidor nga nagbaton sang refund sa ila bill deposit.
Lubos nga kalipay ang nabatyagan nanday Emmanuel Improgo kag Baby Jean Agustin kag Sambag Punong Barangay Romeo Losaria Jagorin Jr. sang Sambag, Jaro, Iloilo City.
Paagi sa ginhiwat nga simple nga seremonya sa opisina sang MORE Power, pormal nila nga ginbaton ang refund sang ila Bill Deposit.
Nahibaluan nga ang Bill Deposit amo ang ginabayad sang konsumidor sa tion nga magpatakod sang kaugalingon nga kuntador sa ila puluy-an.
Ang pag-refund sang bill deposit ginamandu man sang ERC sa tanan nga mga distibution utilities, pribado man ukon electric cooperative.
Nakasaad sa Article 7 sang Magna Carta for residential electric consumers nga dapat ibalik ang ila bill deposit pagkatapos sang tatlo ka tuig ukon 36 ka bulan nga regular man nga nagabayad ang konsumidor kag wala nakaagi utdan sang kuryente.
Ginpahayag ni MORE Power President Roel Castro nga luyag nila nga mangin ehemplo sa iban pa nga mga distribution utilities.
Ginpabutyag sini nga ang iban nga distribution utilities wala naga-refund tungod nga wala man sila ginasukot sang mga konsumuidor. Ang pinasahi sang MORE Power tungod nga ini na mismo ang nagapaalinton sa mga konsumidor nga may iga-refund sila sa ila.
Tungod sini, personal nga nagpahayag sang iya pagdayaw si Energy Regulatory Commission Commissioner Alexis Lumbatan nga nagtambong sa seremonya.
Ginpabutyag naman ni Mr. Castro nga kon indi magpalso sa pagbayad ang pila ka mga konsumidor nga ila na natumod, may yara sang 5 Million pesos nga Bill Deposit ang ginahanda nga ibalik sang MORE Power sa sini nga tuig.
Manami nga may istorya, apang mas manami nga may mehora. (bertladera@gmail.com/PN)
