WALA sing perfecto nga tawo. Wala sing perfecto nga presidente. Wala sing perfecto nga gobyerno. Kon may kaayuhan sila nga mahimo, may kapalpakan ukon kalainan man sila nga mahimo sooner or later. Gani kinahanglan ang pagbantay sa ila agud matadlong ini para sa kaayuhan sang mga pumuluyo.
Tungod sini, importane sa sosyedad ang taga-Media agud mabantayan ang ila kapalpakan ukon kalainan man agud mapatadlong ini, nga mahimo sang Media sa ila sinumpaan nga obligasyon sa ila propesyon sa radio, TV kag pamantalaan.
Syempre, sunu kay Pedro, indi kalakip dira ang mga sip-sip nga mga vloggers sa social media kag kasubong nila nga nagapagamit agud magdala sang kabutigan sang mga garok nga opisyales sa gobyerno kag sang ila mga kaugyon.
In fact, nagapamatok kami sa Media sa ano man nga Diniktador nga pagginahum nga naga-ipit sang kahilwayan sang mga pumuluyo sa pagtusngaw sang ila hibubun-ot kag mga reklamo.
Labi na gid kon ginatabunan nila ang mga mata sang mga pumuluyo sa Kamatuoran, kag ginapatulon pa sang ila kabutigan agud mapadayon ang kahakog sa manggad kag poder sang sining wala kalag nga mga tinuga.
Of course sa sini nga propesyon sang taga-Media daku man nga risgo sa kabuhi ang maatubang nila sa madiskubrihan kag ma-expose nga mga kalainan.
Gani, nangin kaaway ang madamo sa ila sining mga sinakpan sang kadulom nga kon kis-a nagalab-ut sa ila kahalitan kag hilaw nga kamatayon.
Pero, balewala ining mga pamahog sa madamo nga mas masupog sa ila agud lang mapaluntad ang Diyosnon nila nga misyon para sa mga pumuluyo.
In fact, sa masami, ang pagkatumba sang isa, may isa pa ukon duha pa gani ang nagabulos agud ipadayon ang misyon batok sa kalainan sining mga wala sing kalag.
***
Apang, quo vadis, ukon diin padulong, gid ining halos wala katapusan nga pagpamahog kag pagpamatay sang taga-Media? Ginakilala na gani sa kalibutan nga isa sang pinaka-delikado nga pungsod ang Filipinas para sa mga taga-Media.
Salamat kay sang sining ulihi lang nangin sensational ang mga balita parti sa pagpatay sa maisug nga kolumnista sa radyo nga si Percy Lapid kag maabtik man nag-aksyon ang mga otoridad agud lagson ang nagpapatay kag nagpatay sa iya.
Ugaling man kay sang ulihi daw pakitang-tawo man lang ini kay indi man gali nila madakop ang mga suspetsado nga ginapangunahan ni anay Bilibid Chief Bantag. Daw may maninoy ini nga daku nga nagatago sa iya nga indi matultulan.
***
Anyway, bisan pa-consuelo, nahibal-an sang mga pumuluyo kon ano ka importante ang kawsa sang Media batok sa corruption kag kriminalidad.
Ginpatay si Lapid tungod luyag niya tapnaon ang padayon nga pagpangawat sa kaban sang mga pumuluyo nga padayon man nagatulod sa ila sa pil-as sang paghikahos. Makadto pa tani ining kaayuhan para sa ila. Kag, tungod sini, ginakasubo gid nila ang natabo sa iya.
Kag salamat man sa well-meaning nga pasalig ni Acting PRO-6 director Brig. Gen. Sidney N. Villaflor nga nagaagda sa mga taga-Media sa pag-report dayon sa kapulisan sang mga pamahog sa ila agud maaaktuhan man dayon sini.
In fact, sunu kay Pedro, may pila man ka mga pribado nga mga tawo ang nakapabutyag sang ila luyag nga makabulig sa sining pagpamahog sa taga-Media.
Nadumduman ko pa sadtong ulihi nga tinuig sang Marcos Dictatorial Regime ang pasalig sa akon sang isa ka gapakilala nga abyan. Siling niya indi ako magkahadlok kay proteksyunan nila ako. Wala siya nagpakilala pero ano pa ang masiling ko kundi…Salamat!
Kon sin-o man ining mga nagatanyag sang bulig sa taga-Media, ugaling, wala kita kaseguruhan sa ila intensyon.
Basi bala mga tinawo sang kontra pulitiko. Mga rebelde ayhan nga grupo. Ayhan mga negosyante nga ang interes mabuligan sang kawsa sa Kahilwayan sang Media. Kag basi mga vigilante man nga may simpatiya sa ila.
***
So, ano ang maayo? Maayo lang seguro kon mangamlig gid lang ang kada isa, labi na gid ang nakabaton sing pamahog, nga matugutan magdala armas for personal protection. Kag indi lang magbulag sa proteksyon sang gamhanan naton nga Diyos.
Well, seguro ma-obligar gid man kita sa pag-report sining mga pamahog sa aton kapulisan kay obligasyon nila ang proteksyunan ang mga pumuluyo.
Kag kon may yara pa gid nga iban nga luyag magbulig sa ila matarong man nga intensyon, salamat gid kag ubayan man kamo sang Diyos sa inyo maayo nga handom sa pagpasanyog sang aton Free Press sa matarong sini nga misyon sa aton Demokrasya kag Kahilwayan./PN
