NAGTAHAW na ang pagpamintas sang Covid 19. Nagbalik na gani ang masami paggwa sang mga tawo kag paghimo sa naandan nga mga buluhaton.
Nagpagsik naman ang pagpangabuhi, kag salamat kay lakip na dira ang tourism industry, nga sa bug-os nga kalibutan ginpakunol gid sang Covid 19.
Labi na gid sang mga kubos nga mga pungsod nga sa turismo lang maka-kumpetensya sing lubos sa mga manggaran nga mga pungsod sa mga kapinasahe nga bugay sang Ginuo sa kada pungsod.
Natural lang nga ang bisan sin-o man nga tawo maganyat gid sa paghibalo sang wala pa nila makita kag ma-experyensyahan nga buluhaton, nga dapat “exciting” para sa ila.
Tungod sini indi lang ang tinaga nga “turista” ang matumod naton sa mga pangayaw halin sa iban nga mga pungsod kundi sa mga lokal folk man.
Gani, indi katinglahan nga posible mag-inupod ang local kag foreign tourists sa pila ka mga lugar sa pungsod nga pareho mag-enjoy dira, nga mahimo nila sa ila hilway nga panahon sa ila weekends kag holiday breaks, kag natalana nga pleasure trips sa ila pag-retire kag sa ano man nga rason.
Ang problema lang kon paano sila maganyat sa luyag nila kadtuan kag luyag makita kag ma-experensyahan nga mga buluhaton. Kag, siyempre, sa masarangan lang sang ila badyet!
Tungod sini, importante nga mahibaluan ini sang mga promotional activities sang tourism establishment nga ginapangunahan sang Dept. Of Tourism, upod sa mga pribado nga tourism agencies kag sang ila mga hospitality staff.
Kag tungod man sa limitasyon sang travel budget, importante nga may pilian sila sa gina-promote nga ma-enjoy nila dira pa lang sa ila place of origin, kon diin may pasalig man nga mahimo nila ang ila tourist trips sing may kahulas sa ila panghulag, may seguridad kag pagpangamlig sa ila ikaayong lawas labi na gid sa sining panahon pa sang Covid 19.
Gasugod na dira ang importansya sang promotional slogan kag ang pwede nila ma-enjoy sa diin man nga lugar nga gina-suggest sa ila.
Siyempre, luas sa nagakaigu nga pagtatap sa ila, nga amo gid ang pinaka-importante sa mga turista agud lubos ma-enjoy ang ila kadtuan kag ma-experyensyahan nga mga buluhaton.
***
Nangin trending ang farm tourism ukon agritourism una seguro sa Estados Unidos sang pagluntad sang Covid 19 sang pagsugod pa lang sini sa una nga binulan.
Sa sina nga binulan nagsugod na ang mga Amerikano sa pag-amlig gid sang husto batok sa crowded places sa siyudad.
Nagtudlo man ini seguro sa ila agud maglikaw sa pagbakal sang farm needs nila sa matawo nga mga baligyaan sa siyudad kag ginpalabi ang magbakal sa farm nga malapit sa ila.
Nakapadumdum man seguro ang Covid 19 sa ila sa paghatag importansya sa natural nga katahum sang naturalisa kag kaayuhan nga dulot sang fresca nga hangin sa mga farm site. Nga naghatag man sing ideya sa mga farm owner sa pagpasanyog sang ila mga farm agud mangin tourism sites.
Diri sa agritourism sites, ang mga bisita pwede makadayon sa mga guest house nga a la hotel ang akomodasyon para sa ila plano nga bakasyon ukon malakip man lang sa ila tourist visit. Kag diri pwede man sila matagaan sing makalilingaw nga activities. Kon luyag nila pwede man sila gani maka-participate sa mga farm work kag kon paano gina-produce ang produkto sang farm para sa merkado.
***
Naka-inspire ini seguro kay Iloilo Gov. Arthur Defensor Jr. agud isuhestyon ang pag-convert sang pila ka farm sa Iloilo bilang tourism sites.
May 250 ka certified farms sa Iloilo kag may mga “idle farm” pa gani nga mahimo mapuslan para sa farm tourism.
Ginapahanumdum ta lang ugaling nga lain ang panan-aw sang mga Amerikano sa madamo nga mga bagay, lakip na ang pagtan-aw sa mga farm bilang mga tourist destination.
Gani kinahanglan seguro i-adjust ang promotion sini sa kultura mismo sang mga Filipino. Daku seguro nga puntos diri ang pagka-relihiyoso nila.
In fact, indi katingalahan nga mabakal sa mga turista and Trappist Monastery sa ila tourist visit. Ang iban nga relihiyon gani may religious concept man sa ila mga tilipunan katulad sang Camp Higher Ground.
May kasubong man nga religious concept ang Balaan Bukid sa Guimaras kag ang isa ka farm resort dira sa Guimbal.
Sa ini nga mga lugar, pasanyugon mo lang ang farm activities, pasyalan kag tilipunan, ayos na!
Good luck sa sining plano para sa mga agritourism sites sa Iloilo!/PN
