(Ika-4 kag Katapusan nga Bahin)
NAGBULOS-bulos na ang pagkirab sang kilat. Wala pa isa ka minuto kag ginsundan ini sang pagdinaguob.
Samtang nagalumbayag sa balod ang amon sakayan nga nagaraginit sa pag-gios tubtub sa palo (mast) sa waswas sang balod kag hangin. Masalop ini kag maulian sa daluyong nga balod sang Habagat . Kag, hambalon pa, todo sarado gid ang kapyot ko sa banting agud indi mahaboy sa lawod.
Todo ursa ang pagdalagan sang amon sakayan agud masapar gid ang Tatlong Pulo nga ang garhom makita sa kada kirab sang kilat. Ugaling daw indi gid namon masapar ang Tatlong Pulo kay padayon nga lapaw ang amon lakat bisan anhon pa namon nga ursa.
Malapit na seguro sa isa ka oras ang amon panakayon sang nagrinagaak ang sunod-sunod nga pagkirab sang kilat, nga sinundan sang ulihi sang asod-asod nga mala-bomba kag makatilingil nga pagdinaguob. Nag-amat-amat man hina ugaling ang ulan.
Sa pagpati sang mga katigulangan diri, patimaan ini nga manug-ubos na ang paghulog sang ulan halin sa langit.
Kaagahon na ato. Natalupangdan namon nga yara na gali kami sa lawod sang Oton, mga duha ka milya seguro ang antad sa Tatlong Pulo. Panagatan man ini nga lugar kag naisip sang tiyo ko nga managat kami anay liwat. Nga daan wala gid kami sing hulik. Nakahulik gid man kami diri sang isa ka tangegue, mga duha ka kilo seguro.
Sang amat-amat balik ang mabaskug nga hangin kag balod, nag-alsa na kami pondo agud magpauli. Nagsulod kami seguro sadto sa eye-of-the-storm sa pagbalik man sang malain nga panahon.
Mga a las nwebe na kami makaabot sa baybay kon diin madamo na ang nagahulat sa ila kalangkag kon ano na ang natabo sa amon.
***
Well, indi lang ato ang naagihan ko nga peligro sa lawod sa pagpanagat.
Tatlo kami ang nagpalawod. Wala pa kami kaabot sa pondohan sang nagbaskug ang hangin kag balod. Nabalian kami sang palo (mast) kag ginsulod sang balod ang amon sakayan.
Naghingagaw kami pauli nga nagabugsay lang. Sa sulod sang Lawi kami nagtupa sa lugar nga sa Tatlong Pulo. Sang aga na lang kami nagbugsay liwat pauli.
Naanod man ako samtang nagapanagat sang pisogo nga isahanon sa isa ka baroto sa likod sang Naburot, nga isa man ka gamay nga pulo sa unhan lang sang Tatlong Pulo. Gabiti sadto ang init kon san-o masami maayo ang hulik sang pisogo sa ina nga lugar.
Madamo kami sadto ang nagapanagat sang pisogo, ugaling nauna pauli ang iban. Nagpabilin ako anay kay medyo nahuya man ako kay diutay lang ang akon hulik samtang madamo ang hulik sang iban.
Malas seguro kay nalastra ang akon pondo pakadto sa kadadalman nga indi na makapanghawid ang akon ankla. Inanod ako palawod kay indi ko na masarangan bugsayan ang baroto pabalik sa panghigaron, tubtub nagkambyo ang hangin kag napadpad ako pahigad.
Nakahawid ako sa Punta Lawi kon diin may nagsapupo sa akon nga abyan ni papa. Dulom na sadto. Nag-abot ako sa Tatlong Pulo sang mga a las otso sang aga pagkatapos sang mga duha ka oras nga pagbugsay nga nagapanghigaron.
Naabtan ko ang isa ka kandila nga natibsok sa balas. Pensar gali sang lola ko nga wala na ako tungod ginpangita nila ako sa tanan nga bahin sang kalalawran nga malab-utan nila kag wala gid ako makita.
***
Sa nasiling ko na, indi ko luyag i-rekomendar ining natabo sa akon sa luyag maglingaw-lingaw sa pagpanagat diri sa amon sitio. Luas lang kon mananagat ukon sakayanon man sila.
In fact, pinakamaayo ang pagduaw diri sa amon sitio agud maglingaw-lingaw kon panahon sang Amihan. Masinaw ang tubig sa baybay, wala sing gapamerwisyo nga salabay, kag masami makanay ang balod para mag-swimming, magpamunit sa nabawan sakay ang isa ka barato ukon managat sa layo-layo gawa sakay ang motorized banca, kag kon ano pa nga luyag mo ma-experyensya nga hilimuon sang mga taga-baryo sa takas.
By the way, lain na sa karon ang nagapanag-iya sang beach area namon dira sa amon sitio. Beach resort na ini. Sa pihak sang bukid may beach resort man didto.
May mga guest house man dira kon diin ma-akomodar ang mga bisita sa ila luyag nga maglingaw-lingaw diri sa amon baryo.
Mahimo man ini sang pila ka farm sa Iloilo nga malapit sa baybay. Sa takas pwede man ang mountain resort, orchard ukon mango farm, ang may suba ukon waterfall, resting place sa mga mountain climbers, kag kon paano pa maka-enjoy sa pagpamasyal ang isa ka turista sa kaumhan./PN
