INDI lang ‘Justice delayed, justice denied” ang nagakatabo diri sa aton pungsod sa madamo nga kaso.
Kon indi tungod kulang ang aton mga hwes kag prosecutors, ang padayon nga corruption sa gobyerno ang daku pa gid naton nga problema.
Katulad na lang sang makailinit nga delay sang lakat sang kaso nga ma-experyensyahan batok sa isa ka abusador kag impluwensyado nga akusado nga, gamit ang corrupt nga prosecutor, mapa-delay sini sing madugay ang magasto nga lakat sang iya kaso. Kag, tungod sini, ipaatras na gid lang sang pamilya ang ila akusasyon kag magpa-areglo na lang nga indi matagaan sing matuod-tuod nga hustisya ang nabiktima.
May nahibal-an man ako nga kaso kon diin na-detain ang isa ka akusado sa prisuhan sing duha (2) ka tuig tungod indi makabayad sang bailbond. Sang maaksyunan na sang korte ang iya kaso, ang sentensya niya tubtub man lang gali sa isa (1) ka tuig.
Gani nakagwa siya dayon tungod sobra pa ang naprisuhan niya sangsa iya sentensya. In other words, may utang pa ang gobyerno sa iya sang isa (1) ka tuig nga perhwisyo sa iya pamilya nga syempre indi na niya masukot sa gobyerno.
***
Kasubong man sini ang nagakatabo sa madamo nga proyekto sang gobyerno nga wala natapos sa natalana nga panahon, nga mabasol mismo sa gobyerno tungod sa pagpabaya sa pag-monitor, ukon sa delay sang pag-release sang pondo.
Nagakatabo man gani ini sa mga government housing loan nga ang delay sang fund release naga-resulta man sa delayed project completion kag dugang pa nga gasto sa naga-loan.
Daku ini nga problema kon ang proyekto kinahanglanon gid, katulad sang pagpatukod sang eskwelahan kag ospital para sa mga kubos naton nga mga pumuluyo.
Ejemplo lang ang pagpatukod sang lima (5) ka state-owned hospital nga sunu sa Commission on Audit (COA) sadtong 2021 nagabalor sang P763.126 Million. Natapos lang ini pagkaligad sang 24 tubtub 31 ka bulan. Susmariosep!
Sa mga pasyente nga ang madalaganan nila amo gid lang ang ospital sang gobyerno, basi napatay na ang iban sa sige lang hulat sa sining ospital. Labi pa kon ang madalaganan gid lang nila anay amo ang hampol-hampol kag may minama nga laway ni Mang Kepweng agud bulngon ang tunok sang tuktukon nga lansang, asthmatic attack ni baby, pagkagat sang buang nga idu, kag iban pa. Diri matuod masiling naton ang “Projects delayed, projects (man) denied”.
In fact, sa report sang COA sadtong 2021, 17 ka infra projects gid ang na-delay ukon wala gid nakumpleto. Estimated project costs sini naglab-ut sa P1.44 Trillion.
Nag-resulta ini, sunu sa COA, sa “waste of government funds” kag delay sang benepisyo sa mga pumuluyo nga tani nahatag sa ila kon natapos ining mga proyekto sa natalana nga panahon.
“May misuse kag abuse dira sang public funds sang mga erring public officials kag sang ila kahimbon sa private sector – lakip na ang contractors kag suppliers,” siling pa sadto ni Senador Panfilo Lacson angot sa ining report sang COA.
Gin-akusaran man ni anay Senador Franklin Drilon ang gobyerno sang “criminal neglect” angot man sa sining COA-reported delayed kag abandoned infra projects.
Kon matuod, ngaa daw wala man kita sing nahibal-an nga nakalaboso nga mga “erring public officials”, contractors kag suppliers?
Well, sin-o man abe ang matindug sa pag-akusar ukon magtestigo man lang batok sa ila kay basi kahimbon man sila sa corruption?
***
By the way, nagapabilin nga sarado ang Ungka Flyover sa tunga sang siyudad sang Iloilo kag Pavia sugod sadtong Setyembre 2022 pagkatapos buksan ini sang Hunyo 2022 tungod sang pag-usmod sini.
Napat-ud na sang Third Party Consultant (TPC) ang problema, ti ngaa wala pa masugdan ang trabaho dira agud ma-korekan na ini?
.Agud ma-repair ining flyover kinahanglan ang mga P250M nga funding, sunu kay Engr. Abinales sang TPC.
No problem, no doubt. Madamo man bala kita kwarta sa sige pagpangutang naton, nga naglab-ut na karon sa mga PhP15 Trillion?
Importante ini nga proyekto sa mga pumuluyo kag dapat ma-prayodad gid. Nga daan lapit na sa isa ka tuig ang padayon nga pag-antos sang mga pumuluyo sa pagbaha-baha dira sa idalom kon mag-ulan kag padayon man ang pagginutok sang trapiko dira. Perhwisyo gid sa mga importante nga kaladtuan kag negosyo!
Atubanga lang ninyo ang mga akusasyon dira sang mga nagareklamo kay kinamatarong nila ina, pero sigeha lang bala ang pagpa-repair sining Ungka Flyover kay pasalamatan gid namon ina.
Madamo man gani ang nagahulat nga matagaan trabaho kon mapatigayon na ining repair works. Indi bala?/PN
