NAGTUGA sang gahod sa social media kag nagtuhaw ang magkatuhay nga opinyon tuhoy sa nakasaad sa Department of Education Order No. 21 nga mga pagsulundan para sa Brigada Eskwela sini nga tuig nga naga-obligar sa tanan nga buluthuan nga tinluan ang dingding sang school grounds kag classroom sang bisan anuman nga “unnecessary artwork, decorations, tarpaulin and posters.”
Ang DepEd Order No. 21 ginpapanaog mismo ni Education Secretary kag Vice President Sara Duterte. Gin-upload ini sa website sang DepEd sadong Agosto 3.
Madamo sang opinyon nga nasandig lamang sa emosyon ang nagtuhaw. May nagasiling nga madamo sang artipanon agud nga magpag-on ang sistema sang edukasyon, kag iban pa nga pasungaw sang hibubun-ot nga wala sang salandigan gikan sa mga pagtuon kag pagpanalawsaw.
Indi naton sila mabasol tungod kinaandan na nga basta may ginaduso nga pagbag-o sa sistema may yara gid sang pagsupak diri. Napamatud-an naman sa madamo nga pagtuon nga ang kada pagbag-o sa sistema nga iduso, sigurado nga sumalangon ini sang mga pagsupak gikan sa indi luyag matublag sa kakomportable nga ila nabatyagan gikan sa naandan nga sistema.
Apang kon aton padalman kag tungkaron ang motibo ukon katuyuan sang bise presidente, maathag nga luyag sini nga magpokus ang mga estudyante sa kon ano ang topiko ukon ginatudlo sa ila, agud nga mas mahangoan nila nga wala sang may nagaagaw sa ila atensyon.
Naandan na ang pagpanami-nami sang mga hulot-klasehan paagi sa mga dekorasyon nga kon kaisa wala na sang relasyon sa subject ukon sa topiko nga ginatudlo sa mga estudyante.
Sa akon nga bahin, sadtong yara pa ako sa elementarya, masami ko nga ginabasa ang anuman nga napagkit sa ibabaw sang pisara. May mga nawong sang mga importante, maragtason, kag kilala nga mga persona. May mga hurubaton kag kon kaisa mga bersikulo gikan sa balaan nga Bibliya.
Tanan nga ina ang naga-agaw sa akon atensyon, ina ang una ko nga ginalantaw ukon ginabasa sa pagsulod sa hulot-klasehan, ilabi na sa una nga semana sang pag-umpisa sang klase.
Makabig man ini nga mapuslanon apang maka-agaw sang atensyon kag makapabuyo sa estudyante nga kon kaisa nagakabanga na kag wala na nagapamati sa kon ano ang ginahambal sang manunudlo.
Gin-athag ni Duterte nga ang mga visual aids pwede nga gamiton sang mga manunudlo kon oras na sang ila klase.
Tungod sini, gintungkad naton kon ano ang mapag-on nga salandigan sa sini nga desisyon sang tiglikom sang DepEd.
Sadtong 2014, ang pinakaulihi nga pagtuon sang Carnegie Mellon University nagapakita nga ang mga dekorasyon sa mga hulot-klasehan makatublag sa proseso sa pagtuon sang mga estudyante.
Ang mga mapa, linya sang mga numero, mga korte, kag iban pa nga mga materyal halos malikupan na ang pader sang hulot-klasehan sa elementarya. Apang, ang tuman ka nami nagadangat sa pagtublag sa atensyon kag pagtuon sang mga kabataan suno sa pagpanalawsaw nga ginbalhag sa Psychological Science, nga isa ka journal sang Association for Psychological Science.
Ang mga psychology researchers nga sanday Anna V. Fisher, Karrie E. Godwin kag Howard Seltman sang Carnegie Mellon University nag-usisa kon bala ang gina-display sa hulot-klasehan maka-alekto sa abilidad sang kabataan sa pagmentinar sang ila pokus samtang may nagatudlo kag makatuon sa kon ano ang unod sang ila leksyon. Natukiban nila nga ang mga kabataan sa hulot-klasehan nga madamo sang dekorasyon ang mas natublag, naga-uyang sang tion sa magagmay nga katungdanan kag gamay lang ang ila natun-an kaysa sa ginkakas ang mga dekorasyon.
Posible nga may madamo pa nga pagtuon ang nahiwat, ginahiwat kag pagahiwaton pa angot diri agud mas mapapag-on sa paglipas sang panahon ang ini nga pagtuon nga makabulig gid sa pagbutho sang mga estudyante.
May mga manunudlo nga personal nga nagagasto agud nga panamion ang ila hulot-klasehan paagi sa pagbutang sang madamo nga dekorasyon. Nagapanghakroy ang iban sa ila nagasto para diri.
Bangud sa mandu, posible nga nasanagan na ang mga manunudlo nga dapat magpokus sa paghatag sang leksyon sa ila estudyante kag indi maggasto sa mga dekorasyon nga makapabanga sa ila ginatudluan.
Ayhan makapamuklat man ini sa mga manunudlo nga dapat konsentrahan ang pagtudlo sa mga estudyante kag indi pagpaligban ang mga dekorasyon. Ayhan ang iban sa mga manunudlo wala sang ideya sa sining nabalhag nga pagtuon kabangdanan nga wala man sila sang ideya sa kon ano ang epekto sang ila dekorasyon sa sulod sang hulot-klasehan sa mga estudyante nga ila ginatudluan.
Maayo man nga nabungat kag nagpatay-og ini sa tanan agud nga magbalikid sa dapat tutukan agud nga mas mangin maalam ang mga kabataan.
Kahibalo kita nga madamo sang sablag sa pagtuon sang kabataan. Nagakabanga sila sa computer kag sa cellphone. Madamo ang nagaagaw sa ila atensyon.
Kinahanglan bawion naton ang ila konsentrasyon gikan sa pagkabanga. Dapat magkonsentrar sila sa pagtulok sa pisara.
Kabay nga mahangpan sang mga manunudlo ang tinutuyo sang mandu sang ila tiglikom. Nagalaum kita nga mas makahimo sila sang paagi kon paano mas makatutok sa paghatag sang leksyon sa kabataan kag epektibo ini nila nga matun-an.
Nagalaum man kita nga ang mga kritiko maathagan man kag mas mangin mabakod ang ila argumento paagi sa pagpresentar sang mga pagtuon nga nagasupak diri agud nga matimbang sang DepEd kon ano ang angay nga pagahimuon. Kon wala sang supak nga pagtuon sila nga mapresentar, mas maayo nga tun-an nila ang pagtuon nga naugyon agud nga mas maapresyar nila ang resulta kag kon paano sila makabulig nga mas makabenepisyo diri ang mga manunudlo, mga estudyante, ginikanan kag komunidad. (bertladera@gmail.com/PN)
