LIWAT nga natublag ang Department of Education – Regional Office 6 sa pinakaulihi nga report nga may isa naman ka manunudlo nga nadakpan sa buy bust operation sang kapulisan bangud sa pagduso sang ilegal nga druga.
Nagakaangay nga papagsikon ang programa batok sa ilegal nga druga sa mga buluthuan sa bug-os nga Pilipinas. Kinahanglan nga pukawon ang interes sang mga estudyante, ginikanan, manunudlo kag komunidad agud nga liwat nga mag-away kag pukanon ang ilegal nga druga nga mahimo makahalit sa pagtuon kag paglab-ot sa ginahandom nga kadalag-an sa kabuhi.
Nahibaluan nga may national drug education program sa Pilipinas kag isa ini sa lima ka flagship program sang Oplan Kalusugan sa Department of Education (OK sa DepEd) nga nagatuyo sa pagtuga sang ihiwalo sa malain nga epekto sang pag-abuso sa ilega nga druga kag ma-develop sa mga estudyante ang positibo nga pagbinatasan kag ikasangkol sa kabuhi nga likawan ang ilegal nga druga.
Madumduman nga sadtong Setyembre 24, 2023, nadakpan sa buy-bust operation ang isa ka public high school teacher sa banwa sang Sara, Iloilo. Ginapasuni nga nabaklan siya sang isa ka sachet sang ginapasuni nga shabu.
Dapat nga hatagan na ini sang lubos nga atensyon tungod may nauna na nga mga insidente nga nareport ang kapulisan nga may mga manunudlo na nga una nga nadakpan bangud sa ilegal nga druga. Magluwas sini, may mga ilegal man nga hilikuton nga ginahimo ang iban pa nga nga manunudlo nga natikma sang mga otoridad.
Makatulublag ang ini nga hitabu tungod nga kinahanglan manguna nga mga manunudlo sa pag-away sa ilegal nga druga kag giyahan ang mga kabataan sa husto nga banas apang may pila sa ila nga amo pa ang nagaganoy sa mga kabataan padulong sa kalalat-an.
Kon may nadakpan nga kaangay sang manunudlo sa Sara, posible nga may iban pa nga mga manunudlo nga nagahimo sang ilegal man nga buluhaton ukon supak sa kasuguan nga wala pa nadakpan ukon wala pa natumod kag wala pa nabukaran ang ila malain nga ginahimo.
Tion na ang mag-aligmat man ang mga ginikanan nga dapat bantayan ang lihok sang ila kabataan. Dapat man nga tukibon kon may mga manunudlo nga nagaganoy sa ila bata padulong sa kalalat-an.
Sa isa ka lihok nga kaangay sini, kon madakpan kag makasuha, maguba ang ila bwas-damlag, mabutang sa wala sang kapuslanan ang paghimakas nila nga makatibawa sa ila pangabuhi.
Dapat pamangkuton man sang ginikanan ang ila kabataan kon ano ang mga ginapanghimo sang ila mga manunudlo agud nga makahimo sang angay nga tikang kag makapanagang sa posible nga matabu.
Kinahanglan man sang DepEd nga magmonitor sa ila mga manunudlo agud nga mahibaluan man nila kon yara pa sa husto nga banas, kon nagalisa na, kon may ginahimo nga tuhay sa dapat sini nga pagahimuon bilang manunudlo.
Dapat liwat nga ipasiguro nga aktibo ang mga programa kag polisiya nga ginapatuman sang gobyerno batok sa ilegal nga druga.
Masami naton makita ang napagkit sa mga buluthuan nga “drug-free school” apang dapat nga aktibuhon ang pagpanagang agud nga indi makasulod ang nagakamang nga impluwensya sang ilegal nga druga.
Dapat nga magtingob ang tanan kag ugyunan ang pag-away batok sa llegal nga druga. Dapat pukanon ang kuko sang ilegal nga druga nga nagatuga sang halit nga nagakaros sa bwas-damlag sang mga estudyante.
Ipangibabaw naton ang pagpangapin sa mga kabataan, sa ila palaabuton, sa ila damgo, kag sa ila madangatan sa palaabuton. (bertladera@gmail.com/PN)
