MADUGAY na nga nagadabdab ang problema sang Bureau of Fire Protection diri sa Rehiyon 6, ilabi na sa probinsya sang Iloilo. Nabatyagan ang init sang kalayo sang ila problema sa ginhiwat nga joint committee hearing sang Committee on Public Order and Security nga ginapamunuan ni 2nd District Senior Board Member June Mondejar kag Committee on Disaster Risk Reduction and Management nga ginapamunuan ni 4th District Board Member Rolando Distura.
Kaupod sa nagtambong ang BPF-6 nga ginapangunahan ni Regional Director Jerry Candido kag yara man ang presensya ni Vice Governor Christine “Tingting” Garin, 3rd District Board Member Jason Gonzales, 1st District Board Member Jo Ann Germinanda, kag nga tiglawas sang iban pa nga mga katapo sang mga komitiba.
Nangin mitsa sa pag-ibwal sang palamangkutanon kon ano ang kabangdanan ngaa wala nasalbar ang nasunog nga balay ni anay Dumangas Vice Mayor Rose Marie Duremdes-Doromal sang damlag lang.
Ginpatpat sang taga-BFP kon ano ang natabu kag kon ngaa bisan yara lang sa luyo sang fire station ang puluy-an apang lubos ini nga nalamon sang kalayo. Maathag nila nga naplastar ang mga kabangdanan sandig sa ila natun-an, sandig sa siyensya kag sa angay nga mga pamaagi sa pag-away sa kalayo.
Ginbuyagyag ni BFP-6 Regional Director Jerry Candido nga may yara sang 106 ka firetruck sa Rehiyon 6 nga dapat na kuntani nga islan.
May 91 ka serviceable firetruck sa probinsya sang Iloilo apang 39 diri ang angay na nga islan. Sa sini nga 39 ka firetruck, 16 diri ang may edad nga 20 tubtob 30-anyos, 20 diri ang masobra na 30-anyos, kag 3 ang masobra na 40-anyos.
Ginpabutyag sini nga 52 ka firetruck ang “less than 20 years” ang edad sa probinsya sang Iloilo.
Indi makadalagan sang tuman ka dasig ang mga firetruck nga daan na tungod sa kahangawa nga basi madisgrasya sila kon indi na maggana ang brake system sini, kaangay sa natabu sa Sibunag, Guimaras.
Ginakonsiderar nila ang safety sang firetruck kabangdanan nga wala sila naga-full speed ilabi na kon daan na tungod indi na makasarang ang trak. Ginapakamaayo nila nga bisan hinay lang basta makalab-ot sa ginarespondihan kaysa sa padasigon nga indi makalab-ot sa padulungan.
Nabuyagyag man nga kulang sila sang 1,924 ka personnel tungod nga ang ila kabug-usan nga pwersa sa karon amo ang 2,339 ka personnel. Kabus ang kadamuon sang tawo sa angay nga maga-duty sa sulod sang walo ka oras sa kada firetruck.
Magluwas sini, natukiban man ang problema sa fire hydrant tungod nga kalabanan sang mga local government unit ang wala sini bangud nga mahal ini kag kinahanglan nga magtakod sang linya ukon mag-lay out sang piping. Sa idalom sang kasuguan, may mayor nga katungdanan ang water district apang nagapang-ampo man sila sa kakulang sang pondo para diri.
Sa bahin sang Dumangas, natalupangdan man nga ang fire hydrant sa kilid sang munisipyo sang Dumangas ang tuman na ka daan.
Ginpanugyan man ni 4th District Board Member Rolando Distura sa Fire Marshall sang Dumangas-BFP kag sa MDRRMO nga magtumod sang water source nga mahimo makwaan sang tubig sa tion nga may sunog.
Ginpahayag nanday Vice Governor Christine “Tingting” Garin, 2nd District Senior Board Member June Mondejar kag 4th District Board Member Rolando Distura nga handa sila nga magbulig sa BFP-6 sa pagpamuno ni Regional Director Jerry Candido agud nga masolusyunan ang ila ginapangatubang nga mga problema.
Ginaduso ang mga resolution nga makabulig sa BFP-6, ilabi na sa pag-ilis sang mga daan na nga firetruck kag iban pa nga ila ginakabalaka.
Masiling naton nga bentaha para sa natungdan nga mga ahensya nga ipatawag sila sang 14th SP tungod nga ginatungkad ang problema kag ginapangita ang posible nga solusyon. Gina-id-id ang pagtuman nila sang ila katungdanan agud nga mahibaluan kon may sayop na dapat tadlungon, kon may angay nga ligwaton kag kon may dapat pa nga imprubahon.
Gin-athag sang 14th SP nga ginpatawag nila ang BFP-6, indi agud nga intrigahon, kundi buligan sa pagpanuktok sa mga natungdan nga talupangdon ang ila kahimtangan.
Ginapangabay sang 14th SP sa BFP-6 nga maghimakas gid agud nga indi malugaw-an ang pumuluyo sa ila ginahatag nga serbisyo, pun-an ang ila kakulangan, panason ang negatibo nga impresyon kag ibalik ang pagsalig sang tawo sa ila. Nagpasalig ang 14th SP nga buligan sila sa ila mga kinahanglanon kag pag-atubang sa ila mga problema agud nga mas mangin mabakod sila sa pagtuman sa ila katungdanan. (bertladera@gmail.com/PN)
