ANG nasyon nga nagapabilin nga uhaw sa daku nga kakulang sang mga matarong nga mga alagad sang pumuluyo sa panghimanwa nagpadungog sang sini lang kay anay Ilongga Senator Miriam Defensor-Santiago sang isa ka dakdalan sa Quezon City.
Ang ining dakdalan (avenue) ginahingadlan sa karon nga Senator Miriam Defensor-Santiago Avenue bulos sa magkasugpon nga mga dalanon sang Agham Road kag BIR Road.
Gasugod ang kalawig sini sa North Avenue lusot sa Quezon Avenue tubtub sa East Avenue.
Formal ini nga ginhingadlan sadtong Nobyembre 11 sa isa ka seremonya sa pagpanguna ni VP kag Education Secretary Sara Z. Duterte upod sanday QC Mayor Joy Belmonte, QC 1st District Councilor Juan Carlos Atayde, kag Dra. Linnea Defensor-Evangelista kag Abogado Narciso Santiago, utod kag bana ni Miriam.
Ginpatuman ini nga paghingadlan kay Miriam sang sining avenue sa idalom sang RA 11963.
Sa pagpadungog sini sa nagtaliwan nga senadora, siling ni VP Duterte nga nagapahayag ini sang pagpasalamat sang pungsod sa iya legasiya sang kaisug sa pagpabutyag sang kamatuoran kag pinasahe nga kinaalam sa kasuguan (legal brilliance) samtang nagapakig-away sa kagarukan sa gobyerno.
Kabay ma-inspire man ang aton mga kabataan, siling ni VP Duterte, sa sining pinasahe nga legasiya ni Miriam sa ila man kaugalingon nga panglakaton padulong sa mabungahan kag matarong nga panghimanwa.
Tani diri man sa siyudad sang Iloilo may kasubong nga pagpadungog kay Miriam, nga tubo sang La Paz, Iloilo City, sa isa ka dalan ukon sang ano man nga building dira sa UP-Iloilo kon diin siya nagtapos sang political science bag-o magsaylo sa UP-Dilliman kon diin siya nagtapos sing abogasiya.
Madumduman ko pa nga sang magtaliwan si Miriam ginhingadlan ini sang mga lokal nga pamalantaan nga “Best President we never had”.
Nagdalagan ini sa pagka-presidente batok kay Fidel Ramos, nga naglutos sa iya sang wala pa isa ka milyon nga abanse halin sa mga 40 ka milyon nga botante.
So, bagay seguro ang kasubong nga pagpadungog naton sa iya, indi bala?
***
Madugay na ini nga problema sang mga ginikanan diri sa amon sa Podco, Mandurriao. Halin pa ining problema sang panahon pa sang Panay Electric Company (PECO).
Sa isa ka poste diri sa atubangan sang Panay News Compound may nahamtang dira nga duha ka metro (electric meter) malapit gid sa duta. Mga duha lang ka tapak halin sa duta. Ang problema pa kay ang nagalaylay nga linya dira may mga sinugpunan nga posible makakas sa pirme lagsanay dira sang mga kabataan palibut sa poste. Tungod sini daku ang tsansa nga masalipay nila ang live wire nga indi mamaraspasan sang mga ginikanan kag ma-kuryente sila.
Sang sining ulihi lang – Nobyembre 22 bala ato, a las 9:00 sa aga – may nagbisita nga tinawo sang FRMC nga contractor sang power distributor sang ciudad nga may kaupod pa nga duha ka pulis.
Suspetso sang pila diri, lakip man kita, nga basi may ginautod sila nga linya sang wala makabayad sing ila bill. Pero, wala man gali kag daw ginatan-aw man lang ang sitwasyon sang mga metro sa tupad nga poste kag wala man gani sing may ginhimo gid.
Natabuan nga yara ang pila ka ginikanan, lakip kita, kag ginmuno naton ining problema. Nag-suhestyon kita nga kon pwede maplastar tani ang mga duha ka metro paibabaw nga indi malab-ut ang naglaylay nga linya sang kabataan.
Aba, suplado ining tinawo sang FRMC. Siling niya, nga pabara-bara, nga indi kuno niya mahimo ina kay indi ina bahin sang iya ubra. In other words, wala siya labot kon ano ang matabo sa mga kabataan nga indi mapunggan sa paghampang dira.
Naaburido ako sa iya panabat kag ginsingganan ko siya kon bala sabton niya kon ano ang matabo sa mga kabataan kon ikaso, siling niya: “Huo!” nga may katig-a.
Bisan matuod nga tinawo lang sya sang contractor, may labot man sila nga maamligan ang mga pumuluyo, indi bala?
Tani nagsiling man lang siya nga pahibaluon niya ang nag-contract sa ila parti sining problema. Indi kay akuon niya ang ano man nga matabo sa mga kabataan kon ikaso, nga daw may ikasarang gid siya nga atubangon ang dapat salabton niya kon matabo ini.
Wala kurtesiya! Wala pa konsyensya!/PN
