NAGPAGKIT sang dugang nga kadungganan para sa probinsya sang Iloilo ang pinakauna nga babaye nga bise gobernador.
Sa pinakauna nga higayon, naghatag sang igtalupangod ang Commission on Elections sa mga kababaihan nga nagpapili sang nagligad nga eleksyon, ilabi na ang mga wala sang kasumpong.
Madumduman nga si Vice Governor Christine Garin ginproklamar nga nagdaug nga may 725, 282 ka mga boto.
Ang ini nga hitabu nagpagkit sa maragtas sang pulitika sa probinsya sang Iloilo nga ang pinakauna nga babaye nga bise gobernador ang pinakauna man nga nagpapili nga wala sang kasumpong sa sini nga pwesto.
Nagakaangay lamang nga hatagan sang pasidungog kag kilalahon ang ini nga pinasahi nga sirkumstansya sa patag sang pulitika.
Matuod nga isa ka daku nga bugal kag dungog para sa probinsya sang Iloilo ang pagkilala sa bise gobernador bilang Pura Villanueva Kalaw awardee.
Tungod sini, lubos nga nagapasalamat si Iloilo Vice Governor Christine “Tingting” Garin sa paghatag sa iya sang Pura Villanueva Kalaw award sang Commission on Elections kag ini mismo ang ginhatag nanday COMELEC Chair George Erwin Garcia, Commisioner Socorro Inting kag Commisioner Nelson Celis.
Nabaton sang bise gobernador ang award sadtong Biernes, November 24, 2023 didto sa Metro Manila, Philippines.
Sa nasiling na, pinakauna ini nga higayon nga ang COMELEC naghatag sang Teresa Magbanua Award, Pura Villanueva Kalaw kag Magdalena Leones Award sa 20 lamang ka mga outstanding women candidates sa nagligad nga National Elections.
Ang kada isa sa mga ginhatagan sang pasidungog ang ginkilala sa ila pinasahi nga kinaiya nga nagakaangay nga sundon ukon mangin inspirasyon sang iban man nga mga kababaihan nga yara sa patag sang pulitika kag nagapangibabaw ang pag-ulikid sa mga pumuluyo.
Suno sa Comelec nga ila ginakilala si Vice Governor Christine “Tingting” Garin paagi sa Pura Villanueva Kalaw award bangud nga siya ang ’empowered UNOPPOSED woman candidate’ sa 2022 National and Local Elections nga naga-promote sa makahulugan nga pagpakigbahin sang kababaihan sa pulitika sa pungsod.
Nahibaluan nga si Puraficacion “Pura” Villanueva Kalaw isa ka Ilongga nga nagpakigbatu para sa kinamatarong sang kababaihan kag nagpanguna sa hublag sa bug-os nga pungsod agud nga makaboto ang kababaihan sadtong 1937.
Si Pura Villanueva Kalaw indi lamang talented writer kag teacher, kundi mabaskog nga tagsuporta sang kinamatarong kag edukasyon sang kababaihan.
Nabun-an siya sadtong April 27, 1886 sa Arevalko, Iloilo City. Anak siya nanday Emilio Villanueva nga isa ka ilustrado kag Emilia Garcia nga nabun-ag sa Espanya.
Sa edad nga 22-anyos, siya ang ginakilala nga pinakauna nga “beauty queen” sang Pilipinas.
Nakasal siya kay Teodoro M. Kalaw sang Lipa, Batangas sadtong 1910 kag nangin bantugon nga mamantala kag editor para sa El Tiempo, ang bantugon nga pamantalaan sa Western Visayas.
Mas nagakaangay nga mahibaluan naton ang kinaiya ni Pura Villanueva Kalaw agud mahangpan kag maapresyar naton ang ini nga award nga ginhatag sa bise gobernador.
Kahibalo kita kon paano nagahimakas ang bise gobernador agud nga mahatagan sang kadungganan kag makilala ang probinsya sang Iloilo sa patag sang panghimanwa ukon serbisyo publiko. Ilabi na nga nagapakita ini sang pinasahi nga liderato bisan pa nga isa siya ka babaye.
Nahibaluan nga si Iloilo Vice Governor Christine “Tingting” Garin amo man ang napilian nga National President sang Four-L Philippines Inc.
Padayon nga ginakigbato ni Vice Governor Christine “Tingting” Garin, paagi sa mga adbokasiya, ang pagpangapin sa mga kababaihan, kabataan kag pamilya. Ginahimo niya ini paagi sa pagduso sang mga resolution kag mga ordinansa agud nga mas mapabakod ang iya tinutuyo nga kaayuhan para sa mga pumuluyo.
Nakita man sang iba nga mga pulitiko nga indi angay nga sumpungon kag tublagon ang mga ginahimo nga adbokasiya kag pagpanghimanwa sang bise gobernadora kabangdanan nga wala sang may naminsar nga mangin kasumpong sa nagligad nga eleksyon.
Matapos lang ang iya termino nga matalunsay ang pagserbisyo, nagahangpanay ang mga katapo sang Provincial Board kag nagabuylog para sa kaayuhan sang probinsya sang Iloilo.
Madamo pa nga kadungganan kag pagkilala ang posible nga mabaton sang probinsya sang Iloilo paagi sa paghimakas kag pinasahi nga liderato ni Vice Governor Christine “Tingting” Garin.
Nagakatabu lamang ini bangud mas ginapasulabi niya ang pag-ulikid sa mga kasimanwa, nagatuga sang talalupangdon nga resulta, nagakilala sa mga paghimakas kag pinasahi nga pagpanghimanwa sa mga pumuluyo, indi lamang sa probinsya sang Iloilo, lakip man sa mga lideres sa iban nga mga lugar sa pungsod. (bertladera@gmail.com/PN)
