SAMTANG nagahilapit ang highlight sang Dinagyang Festival sa sini nga tuig, mas madamo ang nagakaganyat nga magpadulong sa syudad sang Iloilo.
Mismo ang Iloilo Hotels, Resorts, and Restaurants Association (IHRRA) nagsiling nga 80 tubtob 85 porsyento sang 2,000 tubtob 3,000 ka hotel rooms, pension houses, Airbnb accommodations, kag iban pa nga lodging houses ukon posible mateniran ang na-book na para sa panahon sang kahiwatan sang Dinagyang.
May mga nabilin pa man nga mga hulot nga mahimo teniran sang mga bisita apang posible mabudlayan na sila sap ag-agom sini tungod sa madamo ang nagahingamo nga maka-book na agud may mateniran nga hulot.
Sadto pa, gina-antisipar na ang pagdugok sang mga bisita kag kada tuig ginalantaw na ang tayuyon nga pagdamo sang mga turista gikan sa magkatuhay nga bahin sang pungsod, kag gikan sa luwas sang pungsod nga luyag maka-eksperyensya sang pinasahi nga kapyestahan nga ginahiwat diri sa syudad kag probinsya sang Iloilo.
Bangud man sa pagtuon sang mga indibidwal nga yara sa sini nga sektor sang negosyo, ila ginalantaw ang kadamuon sang mga bisita nga naga-okupar sa mga hulot kag bisan pa sa sini nga pagtuon, indi sa gihapon mapaktan ang bulyada sang kadamuon sang mga bisita.
Kon aton lantawon sa palibot, tuman ka damo sang mga hotel kag mga condominium ang nagabaton na sang mga kustomer kag halos ini ang lunsay mga puno na sang mga bisita. Ginatukos nila ang balor sang mga hulot nga ila ginateniran lamang nga makapakigbahin sa kasadya sang piyesta diri sa syudad sang Iloilo.
Bisan pa nga makita naton ang padayon nga pagtindog sang mga edipisyo kaangay sang mga hotel ukon lodging house, pension house kag iban pa, apang masiling sa gihapon nga ginakulang ang mga hulot.
Posible nga nahidlaw man ang iban nga tawo ukon mga lokal kag dumuluong nga mga bisita sa pagpadulong sa Iloilo.
Madamo sang mga pamatan-on, ang mga yadtong may trabaho kag nagaganar, nga naga-grupo-grupo kag tingob nga nagplano nga magpadulong sa Iloilo, kag sa sini madamo sa ila ang may ginasiling nga ‘disposable income’ nga ila ginagasto sa pagdagyang sa Iloilo.
Lakip nga nagabenepisyo sa sini nga bulyada sang mga bisita ang sektor sang transportasyon, ilabi na ang mga taxi nga nagabiyahe diri sa syudad sang Iloilo. Bentaha man para sa mga modernized jeep ukon mini bus nga nagabiyahe tungod nga madamo sang pasahero nga nagapakadto-pakari sa mga lugar nga may mga aktibidades.
Bisan ang mga kalan-an ukon restaurant ang puno man sang mga tawo bangud sa kabantog nga natuga sang syudad sang Iloilo bilang city of gastronomy.
Lauman man ang tuman ka damo nga mga pagkaon sang mga Ilonggo nga mahimo mabakal sa sin inga mga kalan-an kag mismo sa mga kiosko nga pagabuksan para sa food festival may kaantanan sa gihapon sa Dinagyang Festival.
Ang mga bisita nga naka-book sa mga hotel malapit sa Iloilo Business Park ang indi na kinahanglan magpalayo pa tungod nga may kapin sa 500 ka stalls ang ipahamtang diri para sa mga yara sa palibot sang distrito sang Mandurriao. May yara man sang masobra 200 ka stalls sa downtown area ukon sa mga dalan sang Valeria kag Delgado, kag mismo ang provincial government may yara man sang Gastronomic Food Festival and Bazaar sa Muelle Loney Street, City Proper umpisa Enero 25 tubtob 28.
Madamo man sang matilawan nga mga produkto tungod may 70 ka manugbaligya gikan sa mga banwa sang Ajuy, Batad. Concepcion kag Santa Barbara ang magapakigbahin diri.
Lauman pa gid ang dugang nga mga kiosko nga magapasakop nga tungod madamo ang nagpatimaan sang ila interes nga magpakigbahin.
Kon lantawon sa pangkabug-usan, okupado gid ang tanan sa syudad sang Iloilo tungod nga madamo ang mga bisita nga magapakigbahin sa sining tuigan nga kapyestahan sang syudad kag probinsya sang Iloilo.
Okupado ang mga hotel, pension house, lodging house kag iban pa nga mga akomodasyon nga sahi sang Negosyo sa syudad sang Iloilo. Mangin okupado man ang mga taxi kag iban pa nga sahi sang transportasyon, mangin okupado man ang mga lamesa sa mga restaurant kag stalls sa mga food festival bangud sa madamo ang luyag makatilaw sa mga pagkaon nga ginapabugal sang Iloilo.
Ang tanan halos okupado sa mga aktibidades kag hilikuton may kaantanan sa Dinagyang Festival.
Daku ang ginabulig sang Dinagyang Festival sa negosyo, ekonomiya kag palangabuhian sang mga Ilonggo.
Kabay nga padayunon naton ang papaga-on sang sin inga hilikuton agud nga mapanubli sang mga nagasunod nga henerasyon. (bertladera@gmail.com/PN)
