NATINGALA gid si Pedro kon ngaa indi tugot ang Simbahan nga makapatay ang isa ka Kristiyano sang sin-o man nga tawo nga naga-insulto sa Diyos, indi katulad sang mga tumuluo sang lain nga relihiyon nga nagapanumpa nga patyon, kag nagapamatay, gid sang naga-insulto sa ila ginapatihan nga diyos.
Ina tungod bala kay ang mga Kristiyano wala sing matuod-tuod nga pagpahalaga sa balatyagon sang Diyos kag sang Iya pagka-Diyos?
Indi man. Nagasunod lang sila sa panugyan sang Diyos sa Iya siling nga “Vengeance is mine…”, nga sunu kay Saint Paul sa Romans 12:17 ang buot silingon: “Do not repay evil for evil”, nga gin-confirm man ni Hesukristo sa iya mga pagtudlo kag buhat tubtub sa iya kamatayon sa krus. Siling pa gani niya samtang gahimugto sa krus: “Patawara sila Amay ko kay wala sila nakahibalo sang ila ginahimo…”
Gani ginahatag na gid lang naton nga mga Kristiyano ang kabayaran sa sining klase nga pagpakasala sa “gaba” – ang penalidad nga ang Kalangitan lang ang makahulog sini. Katulad abe sang pagpaabot sang malain nga madangtan nila, nga matagaan man sang madamo sing ebidensya.
***
Nalutos gid man ang Japan sa gyera, apang indi lang batok sa China sa ila 1st kag 2nd Sino-Japanese War kundi batok na sa United States sang pagpasakop sini sa WW 2 upod sa mga Allied Forces batok sa Axis Power nga ginatapuan sang Germany, Italy kag Japan.
Ang US nagpasakop na sa WW2 sang gin-surprise attack sang Japanese war planes ang US military base sa Pearl Harbor sa Hawaii sadtong Disyembre 7, 1941 (US time) kag dayon nagsakop pa sang Filipinas nga isa ka commonwealth sang US sadto.
Nagsugod ang gyera sa tunga sang China kag Japan sa ila pag-inagaway sa pag-control sa Korea sa sobra 20 ka tuig tubtub naglab-utanay sila sa outright hostilities sadtong Hulyo 28, 1894 sa Battle of Asan nga nagpa-ibwal sang First Sino-Japanese War.
Sadto isa lang ka “tributary” nga pungsod ang Korea nga nagahatag sing tribute bilang “protection money” sa China.
Nagdaug ang Japan sa sining gyera sa pag-agaw na sang Japan sang Pyongyang halin sa pag-control sang China. Nakig-negosyar ang China for peace, tubtub naglupok naman ang 2nd Sino-Japan War sadtong 1937 nga nagtapos sa pag-surrender sang Japan sa United States sadtong 1945.
Apang paano napa-surrender sang US ang Japan? Wala duha-duha tungod sang paghulog sang US sing atomic bomb sa Hiroshima kag Nagasaki “agud malikawan ang pagkalamatay pa sang madamo nga mga soldado nga Amerikano” sa ginapaabot nga “fierce battle” sa pagsalakay na sang US troops sa mainland Japan.
Ginatos ka libu nga kabuhi ang gin-utas kag ginpaantos sang paghulog sang atomic bomb, isa sa Hirsohima kag isa man sa Nagasaki, nga nagrusdak sa madamo nga propriedad kag structures sa malapad kaayo nga lugar, nga ang kahalitan halin sadto wala pa natabo sa istorya sang kon diin man nga gyera sa kalibutan.
Mga strategic military sites man ining duha ka siyudad nga ang daku nga kapahamakan nagpiang gid sing husto sa paglaum pa sang Japan agud dag-on ang gyera batok sa US.
Gani nag-surrender na ang Japan sa United States sadtong Setyembre 2 (Setyembre 1 US Time), 1945.
***
Maathag nga ang atomic bomb amo gid ang kabangdanan sang dayon nga pagkalutos sang Japan, nga indi na gani kinahanglan ang mabulig pa sang Soviet Union (USSR), nga sang ulihi nagbulig na sa China, kag sang combined forces nanday Mao Zedong kag Chiang Kai Shek agud matabo ini.
Wala nangayo sing bisan ano man ang United States sa China bilang kabayaran sa pagluas sa China sa dugang nga kahalitan ukon, otherwise, malutos pa ini.
Sunu gani sa sinulatan ni Lianchao Han sa pahayagan nga China Change sadtong Setyembre 3, 2015: “When the Chinese people and the Chinese nation were in peril, the United States came to the rescue and asked for nothing in return. The U.S. never occupied a single inch of Chinese territory, never reaped any particular reward.”
Wala man gin-ambisyon sang United States pa ang pag-control sang South China Sea kag ginbilin nga bukas ang daku nga bahin sini sa international navigation sunu sa nahisugtan na sang mga pungsod sadto pa.
Karon luyag na sang China awayon ang United States sa padayon sini nga handom nga palaparon pa gid ang iya impluwensya sa South China Sea, kag bisan pa na-deklarar na sang International Arbitration Court nga “illegal” ang pag-okupar sini sa 200-nautical mile Exclusive Economic Zone sang Filipinas nga ang kinamatarong dira ginakilala sang United States kag sang iya mga kaalyado.
Wala matuod kabalaslan ining China sa iya kadalok agud padayon isulong ang iya ancient imperial ambition. Kabalan gid!/PN
