PAALAM BROD DENNIS. Sa paggwa sining isyu (Hulyo 3, 2024) sang Panay News, ginapahibalo ta sa wala pa nakahibalo nga mga himata kag mga abyan ni Atty. Dennis D. Juanon nga nagtaliwan na siya sadtong nagligad lang nga semana.
Si Brod Dennis katapo sang mother Sigma Rho Fraternity sa UP-Diliman. Tumandok ini siya sang Dingle, Iloilo.
Naisipan niya samtang nagatudlo sadto sa University of Iloilo nga tukuron ang lokal nga tsapter sang frat dira sa UI Iloilo sadtong 1968.
Halin sadto naglapta na ang mga sister chapter sang Sigma Rho Iloilo sa bug-os nga Western Visayas tubtub sa Mindanao nga gakilala gihapon sang liderato ni Brod Dennis sa iya pag-inspire sang ila existence sa Visayas kag Mindanao.
Nangin instrumento man siya agud matukod ang Sigma Rho Philippines (Samahan ng mga Sigma Rho sa Pilipinas) dungan sa paghiwat sang 1st Grand National Alumni Assembly sa Sarabia Manor Hotel sadtong Oktubre 26, 2013.
Sa ginhiwat nga eleksyon napilian nga National Presidente si Brod Prof. Rex B. Demafelis sang Sigma Rho Los Baños, nga isa man ka Ilonggo. Executive Vice President si Brod Dennis upod sa iban pa nga mga nabotohan man nga mga opisyales.
Sang nahibal-an sang mga Sigma Rhoan ang balita, nagbuligay dayon ang tanan nga brod kag sis upod sa pamilya ni Brod Dennis agud mahatagan siya sang bagay nga pagpadungog kag pag-unong sa kasubo sang pamilya tubtub mabutang na ang iya remains sa dapat hamtangan.
Gintagaan sing mainunungon nga wake sang pamilya kag sang iya mga brods kag sis ang iya pagtaliwan tubtub nga madala kag mahamtang na ang iya cremated ashes sa Abecia-Gegato Chapelle de Serrenite et Columbarium sa Tanza, Iloilo City halin sa Abecia-Gegato Funeral Homes and Crematorium sa Jaro.
Indi pa kita malipat sa matahum nga panugyan ni Brod Dennis sa tion sang 1st National Alumni Assembly sadto: “We have already reached the National Unity that was only in our dreams before at the time when we started Sigma Rho and Lambda Sigma Rho (sister members) in Western Visayas.
“…. But we should not stop here. We should continue bridging Sigma Rhoans and sisters worldwide. Only then can we say that our ultimate goal has been done.” Copy that, brod…
For the Sigma Rho… Fight! For the Lambda Sigma Rho/ Delta Lambda Sigma … Fight!
***
Ang pag-atake sang Chinese Coast Guard sa mga resupply boats sang Philippine Coast Guard para sa M/V Sierra Madre sadtong Hunyo 17 ang “the most violent case” na sang pang-harass sang China sa West Philippine Sea.
Bag-o sini, ginatabug sang China ang aton mga mangingisda dira sa aton mismo 200-nautical mile Exclusive Economic Zone (EEZ) sa WPS, ginabombahan sing mabaskug nga tubig ang aton mga resupply boats, kag gina-intercept ang food supply kag ihaboy pa gani sa dagat.
Apang sang Hunyo 17 gin-atake na gid sang CCG ang aton resupply boats kag ginpilit nga ma-blockade ini agud indi madalhan sang pagkaon kag iban pa nga kinahanglanon ang aton mga soldado nga na-destino dira sa na-grounded nga WW 2 warship.
Ginsundan sang CCG ang mga resupply boats tubtub sa malapit na gid sa daan nga barko, kag sang malab-ut gin-corner ini, namahog gamit ang armas, ginsaka ang mga resupply boats kag gin-loot ini sang mga bagay nga imporrtante sa ila. Papwersa man sini nga ginguyod palayo ang nagaubay nga mga rubber boats (RHIBs) pagkatapos nga ginpangbuslot ang pila sini.
Naglab-ut ang ginagamo tubtub sa 17 ka oras halin sa a las 6 sag aga sa pag-abot sang CCG sa lagoon sang Ayungin Shoal, nga kinahanglan pa sang tatlo ka tinawo sa RHIBs nga maglikaw pasaka sa daan nga barko kag magpatigayon sang medical evacuation tubtub ma-rescue sang isa ka PH Coast Guard nga natabuan malapit didto.
***
Tungod sa istrikto nga paghangop sang United Nations Secuirity Council kon ano ang “armed aggression”, wala nahimo si Presidente Marcos kundi batunon nga indi maka-qualify ang ginhimo sang CCG sa “armed attack” agud ma-apply ang US-PH Mutual Defense Treaty.
Nonetheless, personal kita nagapati nga naka-commit sang “international crime” ang CCG/China sa pag-blockade sang resupply boats.
Morally, ang kabug-at sang kasal-anan makilala sa degree sang offense, degree of knowledge of the offense, kag intention sa pag-commit sang offense.
Kon indi gid man grave nga offense ang nahimo sang CCG sa pag-blockade sa resupply boats, naseguro naton ugaling nga nahibal-an sini nga malain ang ila ginhimo kag malain man ang ila intention sa mga soldado sa M/V Sierra Madre – pagutman tubtub magmalasakit kag magkalamatay pa gani!
Daku ini nga “international crime” sa bahin sang CCG/China sa idalom sang International Humanitarian Law./PN
