GIN-INAGURAHAN na ni Presidente Ferdinand “Bongbong” Marcos Jr. sang Martes, Hulyo 16, ang isa sa tatlo ka dam component sang Jalaur River Multi-Purpose Project Stage II (JRMP II) sa Brgy. Agcalaga, Calinog, Iloilo.
Ginakabig ini nga pinakadaku nga irrigation development project sa Western Visayas suno sa National Irrigation Administration (NIA) nga may pondo nga naglab-ot sa P19.7 billion kag gintawan ni Presidente Bongbong Marcos nga landmark project.
Ginalauman nga makahatag ini ang irigasyon sa 31,840 ka ektarya sang ulumhan sa Iloilo, makatuga sang kapin 6.6 megawatts sang hydroelectric power kag 86 million liters per day sang bulk water supply para sa probinsya kag syudad sang Iloilo, makapasanyog sang eco-cultural tourism opportunities, kag makahagan-hagan sang pagbaha sa Calinog kag katupad nga mga banwa.
Ginsiling ni anay Senate President Franklin Drilon nga ang JRMP II makahatag benepisyo sa 25,000 ka mga mangunguma. Magasaka ang produksyon sang palay sa 71.54% sa probinsya ang Iloilo ukon mangin 338,874 metric tons gikan sa 197,545 metric tons kada tuig.
Bangud sa kadaku sang proyekto kag ginalauman ang tuman ka damo nga benepisyo nga mahatag sa mga pumuluyo sang Iloilo, nangin hugot ang suporta sang Iloilo Sangguniang Panlalawigan sa pagpanguna ni Vice Governor Christine “Tingting” Garin.
Mismo ang tagpatuman ang proyekto nakamutik kag nagsiling nga tuman ka bakod ang partnership nila sa Iloilo SP para sa pagpatuman sang proyekto sang Jalaur River Multipurpose Project II kag probinsya sang Iloilo.
Ginkabig ni Atty. Michael Margarico, ang Technical Legal Consultant sang JRMP II nga bangud sa proyekto napakita ang kabaskog sang partnership sang JRMP II kag probinsya sang Iloilo nga nangin valuable partner na umpisa nga ginsuguran ang proyekto.
Ginsiling sini nga daku gid ang nabulig sang 13th Iloilo SP sa idalom ni Vice Governor Christine “Tingting” Garin ilabi na nga nagsuporta ang Committee on General Services and Human Resources nga ginapamunuan ni 3rd District Board Member Matt Palabrica kag Committee on Agriculture nga ginapamunuan ni 2nd District Board Member Rolito Cajilig nga nagrekomendar nga hatagan sang usufractuary right ang JRMP II sa tatlo ka property nga ginapanag-iyahan sang Iloilo Provincial Government nga para sa ila high canal line.
Gindugang sini nga daku ang kontribusyon sang sini nga rekomendasyon agud mas mapadasig pa gid nila ang pagpatuman sang proyekto sang JRMP II.
Paagi sa bulig sang Iloilo SP nahatagan sila sang positibo nga rekomendasyon tuhoy sa pagaagyan sang ila high line canal kag magadasig na kag magatawhay na ang pagpatuman sang proyekto paagi sa right of way acquisition.
Gindugang sini nga ang high line canal amo ang pagaagyan sang tubig gikan sa dam padulong sa ila mga service area sa probinsya sang Iloilo nga nagalaba sang kapin sa 81 kilometros gikan sa Calinog padulong sa Tigbauan.
Nahibaluan nga ang line canal, sa pagpatuman sang NIA-Jalaur River Multi-Purpose Project 2, ang nagalapus sa tatlo ka propyedad nga ginapanag-iyahan sang Iloilo Provincial Government (IPG), nga amo ang mga masunod: a) Lot 7966 sa Barangay Toyungan, Calinog; b) Lot 3507-A sa Barangay Balagiao, Lambunao; kag, c) Lot 5786 sa Barangay Badlan, Calinog.
Nagapasalamat gid ang National Irrigation Administration 6 sa suporta kag bulig nga ginahatag sang Iloilo Provincial Government sa idalom ni Governor Arthur Defensor, Jr. kag sang Sangguniang Panlalawigan ng Iloilo sa pagpamuno ni Vice Governor Christine “Tingting” Garin.
Madasig nga naga-akto ang Iloilo SP sa anuman nga ginahingyo ang NIA-6 para mapadasig ang paghuman sang JRMP II. Lubos nga pagbulig ang ginahimo agud nga indi maatrasar ang proyekto ilabi na nga madamo ang nagahulat nga mabuligan sini.
Nakita sang mga katapo sang Iloilo SP nga dapat wala sang sablag kag mangin tayuyon ang pagpatuman ang proyekto tungod nga daku ang mabulig sini sa ekonomiya kag palangabuhian. Makapasanyog ini sang produksyon kag makaagom sang pagtin-ad ang tanan tungod sa benepisyo nga mahatag sang proyekto.
Ginaplastar ko sa inyo ang ini nga punto bangud sadto pa sang tuig 2021 masami na kita nga nagapakig-angot sa NIA-6 tuhoy sa kahimtangan ang JRMP II kag ginahibalo naton ang sitwasyon sini.
Mas nagakaangay nga ipaalinton ang ini nga bagay sa mga pumuluyo agud mahibaluan nila ang signipikante nga papel sang Iloilo SP sa tayuyon nga pagpatuman ang sini nga proyekto, agud mahibaluan ang pumuluyo nga nagatrabaho ang mga katapo sang Iloilo SP para mabuligan ang madasig nga paghuman sang proyekto.
Nagabinuligay ang kada isa agud nga matigayon ang proyekto, madamo ang imbolbado, kag kabahin sa sini nga nagabulig amo ang Iloilo SP sa pagpamuno ni Vice Governor Christine “Tingting” Garin. (bertladera@gmail.com/PN)
