KAANGAY ang daku nga balud nga naghampak sa bato ang paglagbong nga natuga ang anunsyo tuhoy sa implementasyon ang clamping ordinance, ordinansa nga natumod sa dugang nga no parking places, kag ordinansa nga nagatumod sa mga lugar bilang pay parking spaces.
Matapos nga ginbalhag sa social media kag gin-anunsyo a kahanginan, madamo nga pumuluyo ang nagatalupangod sini kag madamo man nga palamangkutanon ang nagtuhaw sa ila pang-ino-ino.
May mga napukaw ang ila interes kag nagapamangkot kon paano ini ipatuman tungod nakita nila ang sitwasyon sa mga dalanon sa palibot sang syudad. Indi mahinago nga madamo sang nagaparking sa bisan diin lang nga bahin, kag madata ang parkinganay sa atubang sang mga bangko ilabi na kon adlaw sang Lunes.
Indi man mahinago ang pagguot sang trapiko sa atubang ang mga buluthuan, mga ospital kag mga establisemyento komersyal sa masami bangud man sa mga nagapondo nga mga salakyan, may mga umalagi apang may yara gid sang nagatenir sa malawig nga tion.
Bangud nga madamo sang naapektuhan, madamo sang naka-eksperyensya, madamo ang nagabatyag sang pag-igod sang mga salakyan, gani mas madamo man ang natandog sa sini nga plano sang syudad nga i-clamp ang mga salakyan nga nagapasaway kag nagatuga sang paggutok sang dalanon.
Madamo sang mga dalanon nga gintumod nga indi pwede maparkingan kag kon magpasaway, may ibutang nga clamp ang mga tinawo sang syudad.
Kon sensiro kag determinado sila sa pagpatuman sang mga ordinansa, kon wala sang pinilian, kon wala sang may pagapaboran nga mga negosyante, mangin masulhay ang dalan, mangin masulhay ang lakat sang trapiko.
Sa pagkamatuod, ang mga naga-park halos mga pribado man lang nga salakyan. Kahibalo man kita nga tuman ka damo sang pribado nga salakyan kaysa sa pampubliko nga salakyan nga makita mo sa dalan.
Ang mga pampubliko nga salakyan kinahanglan nga maghulag agud nga makakita sang pasahero para sa ila palangabuhian.
Dapat man sawayon ang mga taxi nga ginahimo nila parkingan ukon terminal ang palibot sang plaza, ang atubang sang mga mall kag mga ospital. Wala problema kon may espasyo ang mga establisemyento para nga maparkingan nila. Ang problema kon gina-okupar nila ang porsyon sang karsada.
Bangud sa sini nga pagpatuman sang clamping ordinance kag indi pagtugot nga maparkingan ang pila ka natumod nga mga dalan, nagalaum ang mga pumuluyo nga indi lang ini umalagi ukon sa una lang ang kasaw kag sa ulihi malipatan na naman kag magbalik sa kinaandan.
Nagalaum man ang mga pumuluyo nga indi lang sa mga dalanon sang syudad kundi dapat ilakip man ang mga dalanon sa kabarangayan nga masami ginahimo nga parkingan ang kilid sang dalan.
Matuod nga ginpalapad ang mga karsada apang nangin paborable ini sa mga pasaway tungod nga sementado na ang ila parkingan sa kilid sang dalan.
Manami na sadto sang panahon ni anay Presidente Rodrigo Duterte nga ginpahawanan ang mga dalan agud nga wala sang may matuga nga huol kag indi maatrasar ang mga estudyante sa ila pagbutho, ang mga empleyado sa pagpadulog nila sa ila mga opisina, kag mga pumuluyo sa pagkadto sa ila padulungan.
Dapat nga butangan sang signages ang mga dalan nga indi pwede maparkingan kag makabig nga clamping area. Mas mayo pa gid nga pabutangan sang bantay sa sulod sang anum ka bulan tubtob nga makahibalo na ang halos tanan sa ginapatuman nga mga ordinansa.
Dapat nga pabuligon ang mga barangay official sa paghawan sa mga dalanon sang ila barangay kag indi anay magsige ka sawsaw sa pulitika. Solusyon sa problema ang dapat nila nga paligban kag indi ang mag-ikog-ikog sa kon sin-o nga may interes nga magpapili sa palaabuton nga piniliay.
Isa sa ehemplo sa nagakitid nga dalan ang sa bahin sang Barangay Cubay. Mahawan ina dira sadto, apang subong ang ginhawan ila ginbalikan kag mas naglala pa ang sitwasyon.
Ikaw nga nagalabay, ikaw pa ang mangalihid agud nga indi makasagaid sa mga nagaparking nga tricycle kag pribado nga salakyan. Ang alagyan sang tawo okupado na sang mga tapangko kag lamesa nga may tumpok nga baligya.
Tuman ka gutok kag mabudlay maglabay apang daw sa mga bulag ang mga opisyales sang barangay kag wala man pasunaid ang mga nagabaligya kag nagapark. May kaugalingon sila nga gobyerno kag wala na nagadumdom sa mga pagsulundan sang gobyerno sang pungsod nga dapat tumanon.
Ang pagpatuman sang nasambit nga mga ordinansa sang syudad tuman ka daku nga katungdanan. Madamo sang masalapay, madamo sang magareklamo, madamo sang maapektuhan apang magaresulta ini sang daku nga benepisyo para sa tanan.
Indi dapat magkalingkang. Dapat mangin determinado kag pursigido agud malab-ot ang tinutuyo nga madula na ang huol ukon sablag sa mga dalanon.
Indi dapat mangin umalagi nga kaangay sang nag-ibwal nga kalayo kag pagkatapos naalimunaw na lang. Dapat dugangan ang clamp kag butangan sang closed-circuit television ukon CCTV ang mga lugar nga indi pwede maparkingan agud nga makita kag may pamatuod nga nagalapas sila sa ordinansa. (bertladera@gmail.com/PN)
