PINAKA-POPULAR nga kandidato sa pagka-Presidente si Marcos Jr. para sa Mayo 2022 nga eleksyon sa kabilugan apang indi sa tanan nga Age Range, sunu sa survey nga ginhiwat sadtong Marso 2022 nga gindala sang pahayagan nga Balita.
Nanguna sing daku si Marcos Jr. sa mga may edad 25-44, apang wala siya ginpasulabi sang mga kabataan nga botante (18-24) kag sang mga gulang-gulang na (45 +) kon diin nangibabaw si VP Leni Robredo.
Ang mga dalagku nga rally sa kampanya ni VP Robredo nagpakita nga daw manugdaug ini sa eleksyon. Sa sining mga rally ni VP Robredo makita nga ang kadam-an amo ang mga Generation Z nga kabataan (12-27 ang edad tubtub sa sining tuig 2024) nga indi, ugaling, makatumbas sa kadamuon sang mga 25-45 sa mga rally ni Marcos Jr.
Samtang ang mga street survey kag sa mga merkado nagpakita sang pagpangibabaw ni Marcos Jr., labi na gid sang gindala sini malapit na sa eleksyon ang pasalig nga “PhP20 per kilo na bigas!”
Of course, wala ini matuman tubtub sa karon, although, to be fair sa iya, ginpaninguhaan gid man ini ni PBBM ining pasalig sang nagdaug na siya. Well, gin-justify ini ni PBBM sa indi ma-control nga pagtaas sang halos tanan nga presyo tungod sa pang-kalibutan nga epekto sang negosyo sa langis kag sang global inflation.
Dala ini sang gyera sang Ukraine kag Rusya sugod sadtong Pebrero 2022 kag tubtub pa subong nga gyera sa tunga man sang Israel kag Hamas.
Pareho man ini sa pasalig ni anay Presidente Duterte. Ginpanakga niya nga tapuson ang mga durugista sa sulod lang sang anom (6) ka bulan. Tubub karon, pagkatapos sang iya 6 man ka tuig nga termino, yara pa ang drug menace kag daw naglala pa gani bisan sa sige pagpamatay sang mga durugista.
Malas pa ni Duterte kay akusado siya karon sang International Criminal Court sang Crime Against Humanity bilang utok-utok sang pagpamatay nga wala due process.
Naham-ot lang ang mga botante nga ang tagline: “Patup-a anay ang pangako!” samtang ginboto gid nila ang mga kandidato nga kilala sa ila binuhatan sa mga pumuluyo, katulad sang Angat Buhay nga programa ni VP Robredo.
***
Ano ayhan ang isyu sang mga gulang-gulang (45 +) nga ginsalig ang ila pag-upod kay VP Robredo?
Sa iya kampanya sa Dumaguete City, ginpasalig sini ang mas mataas nga pension sa mga indigent senior citizens.
“Lahat na senior citizens makakatanggap ng pension, at dodoblehin natin ‘yung natatanggap ngayon,” pasalig niya.
Angot sa paghatag trabaho sa mga pumuluyo, ginpasalig niya ang PhP192-B nga job generation program nga ginpaseguro niya kuhaon sa nagakalain-lain nga ahensya sang gobyerno, lakip na halin sa DPWH, DOTr, Office of the President kag Philippine National Police.
Well, mas bilib ugaling ang mga pumuluyo sa “Php20 per kilo na bigas” nga bisan ang mga adviser ni Marcos Jr. indi mismo makapati nga matuman ini.
***
Ngaa naman gin-updan sang Generation Z ang kandidatura ni VP Robredo, nga Leni lang ang tawag nila sa iya?
Ang mga kabataan galakip sang mga 16% sang global population kag gin-expectar nga magsaka pa ang kadamuon sa 7% tubtub sa 1.3 ka bilyon sa 2030. Mga Gen Z na ang kalabanan sini sa ila sa sini nga panahon nga nagtupa na ang gut-got sang Climate Crisis.
Tungod sini daku nga rason ang pagkahangawa nila sa pwede matabo sa ila henerasyon bunga sang Climate Crisis.
Matandaan pa naton ang teenager nga si Greta Thunberg sa iya may daku nga kabalaka nga panawagan sa UN Climate Action Summit sadtong 2019 sa atubangan sang mga world leaders agud mag-take “urgent action” batok sa Climate Change.
Sugod sadto, nangin headliners na ining mga kabataan sa mga media reports sa ila panawagan nga awayon sing husto ang Greenhouse Gas (GHG) emission agud mapunggan ang pagtaas sang init sang kalibutan lapaw sa 1.5 degrees Celsius.
Diri, gina-suhestyon nila ang pagpanubo sang pagboga labi na gid sang carbon dioxide nga halin sa fossil fuel (coal, natural gas, oil) nga gapadalagan sang mga industriya, transportasyon, kag elektrisidad sang aton mga komunidad, kag ang pagpasanyog sang renewable energy (solar, hydro, wind, etc.).
Obviously, ang ila boto INDI SA KANDIDATO kundi SA MGA ISYU, nga madamo sini gindala ni VP Robredo.
Sa Malay, Aklan ginpasalig ni Robredo ang paglakip sang Climate Change programs sa tanan nga plano sang gobyerno, nga nauyunan sang mga kabataan nga masami gaupod sa mga rally ni VP Robredo.
Ining mga kabataan gapanindugan man sa kawsa sang human rights, ang barato ukon libre nga college education, universal welfare kag healthcare program, buhis nga may compensating measure, kag iban pa./PN
