DAKU NGA pagpanghangkat para sa isa ka atleta kon paano niya hanason ang iya kaugalingon kag mas mapasanyog ang iya abilidad agud nga magpangibabaw sa kada kompetisyon.
Tuman ka lawig nga panahon ang ginahinguyang kag daku nga pondo ang ginakinahanglan agud nga mas mangin sampaton kag mangin madinalag-on sa mga kompetisyon.
Madamo na kita sang mga istorya nga nabasa ukon nasalapuan gikan mismo sa mga atleta, sa mga coach, kag sa mga naga-unong sa ila nga paghanas kon paano nila ginataklad ang matag-adlaw nga hangkat sang paghanas.
Ginaagwanta nila ang kabus nga pondo para sa paghanas, bisan indi komportable ang ila kahimtangan apang padayon sila nga nagahimakas nga makahatag ang dungog kag bugal sa aton pungsod.
May mga pilantropo nga mga manggaranon nga negosyante nga nagabulig sa aton mga atleta kaangay sang bilyunaryo nga si bilyonaryo Manny V. Pangilinan.
Mabudlay para sa mga atleta kon wala sang kwarta nga hulagon para ibakal sang ila kinahanglanon sa matag-adlaw nga paghanas. Kaangay man ini sa investment nga dapat mapagwa ka gid sang kapital antes ka makakita ang ginansya.
May mga negosyante sa patag ang hinampang nga nagasuporta man tuod apang ginalantaw nila ang balik sa ila mga negosyo. Ginaisip nila kon pila ang ila maginansya kon makapagwa sila ang kantidad.
Ginahimo man nga palangabuhian ang iban nga mahuyugon sa hinampang ang ila abilidad kag diri sila nagakuha ang ila nga palangitan-an.
Sa subong, bangud sa naagom nga duha ka bulawan nga medalya ni Carlos Yulo sa 2024 Paris Olympics, dapat magpaminsar na ang gobyerno kon paano lubos nga masuportahan ang patag sang hinampang kon sa diin mas nagapangibabaw ang mga Filipino.
Madamo sang team sports nga indi kita makalusot, madamo man sang individual sports nga mataas ang posibilidad nga makasungkit kita ang medalya.
Sa sini, dapat maghimo man sang istratehiya ang gobyerno kon paano maganyat ang mga negosyante nga suportahan ang programa sa hinampang samtang nagahanas pa lang ang mga atleta.
Madamo sang nagasakay sa kadalag-an ang mga nagdaug nga atleta, nagatan-ay sila sang kon ano man ang mahimo nila mahatag. Matuod nga nagapaganyat ini sa iban nga atleta nga maghimakas man agud nga makaagom sang bulawan nga medalya apang pila lang sa ila ang mapalaron. Masubo nga pareho ang ila himakas apang may mga indi mapalaron sa ila pagpasimpalad kag wala sila sang minilyon nga balor sang kaalwan kag kwarta nga mabaton.
Dapat nga ganyaton sang gobyerno ang mga negosyante nga maghatag ang suporta sa mga atleta samtang nagahanas pa lang agud masiguro nga mas madamo nga bulawan nga aton madaug. Mas madamo nga atleta ang mabuligan kon italatapod ini sa tanan.
Hatagan ang mga nagsuporta nga negosyante sang angay nga promosyon sang ila negosyo sa kadalag-an ang mga atleta.
Dapat may istratehiya ang gobyerno para sa mga nagasuporta nga negosyante. Halimbawa sini mo ang paghatag sang tax incentives. Kon magdonar sila sang kwarta para sa mga atleta, dapat magahatag man sang diskwento ang gobyerno sa ila buhis nga ginabayawan. Dugang nga diskwento kon mag-bronze, mas taas nga diskwento kon mag-silver kag mas mataas pa gid nga diskwento kon mag-gold medalist ang mga atleta.
Mangin public-private partnership ang pagsuporta sa mga atleta. Indi mangin daku ang igapain nga pondo sang gobyerno kag may partisipasyon ang pribado nga sektor.
Depende sa kon ano pa gid nga mga ideya ang mapaminsaran sang aton mga mamalidha agud nga maganyat ang pribado nga sektor ukon mga negosyante sa pagsuporta sa mga atleta.
Kon may i-donar pa gid sila nga mga bagay ukon kwarta sa nakaagom ang bulawan sa kompetisyon, dapat ipaiway na ang pagsukot sa buhis ukon ano man nga makapamag-an sa nagadonar agud nga indi man mangin daku nga palas-anon para sa ila.
Malikawan pa naton ang pagpatayog-tayog sang ihi sang mga negosyante kag mga kompaniya paagi sa pag-anunsyo sang ila igahatag sa mga nakaagom sang bulawan.
Dapat pondohan man sang gobyerno ang tanan nga nagpasakop sa kompetisyon. Dapat ‘in cash and in kind’ agud nga mangin makalalaton ang mahatag sini nga inspirasyon sa tanan nga atleta.
Importante sa tanan, dapat suportahan sang gobyerno ang mga nagasuporta sa mga atleta. Indi tanan mahap-an sang gobyerno, dapat magplastar ang sistema kon paano maganyat kag maakomodar ang mga pilantropo nga luyag nga makita nga nagapangibabaw ang mga atleta nga Filipino.
Tion nga magpasar sang kasuguan agud suportahan ang mga nagasuporta sa mga atleta agud nga mangin kultura ang pag-agom sang medalya nga bulawan sa kada may hiwaton nga kompetisyon. Dapat magmuklat na ang tanan kag tutukan ang mga hampang nga daku ang aton higayon nga magmadinalag-on. Indi ini paswerte-swerte lamang. Preparasyon ang pundasyon sa kadalag-an.
Ang preparasyon, paghanas, kag paghimakas nagakinahanglan sang suporta. Agud matigayon ang angay nga suporta para sa mga atleta sang pungsod, dapat man nga suportahan ang mga maalwan nga nagasuporta sa aton mga atleta. (bertladera@gmail.com/PN)
