NAG-AMAT-amat kambyo ang dapya sang hangin sa bug-os nga syudad sang Iloilo. Nagapadulong na kita sa mabugnaw nga tyempo bangud sa nagahilapit nga Paskwa apang init ang aton mabatyagan bangud sa nagapasulod naman nga midterm elections.
Isa ka daku nga balantayan nga magapaligwat sa pulitika sang syudad sang Iloilo ang liwat nga pagtuhaw ni former Mayor Jed Patrick Mabilog matapos nga siya ang nangisog nga magpauli kag atubangon ang mga akusasyon nga ginhaboy sa iya. Tion na ini nga iya atubangon ang tanan nga gina-akusar sa iya kag agud mabatian man sang mga pumuluyo sa syudad ang iya bahin batok sa mga alegasyon kag akusasyon nga gintampok sa iya.
Importante nga nakatipon siya sang kusog kag ginduso sang iya kahidlaw nga makita kag makumusta ang kahimtangan sang iya mga pumuluyo matapos ang kapin pito ka tuig nga pagpadulong sa luwas sang pungsod agud nga makalikaw sa wala ginalauman nga mga sitwasyon.
Ang iya tingog kag presensya nagahatag ang bag-o nga paglaum sa mga pumuluyo sang syudad nga nahidlaw sa iya sahi sang panghimanwa.
Kon may mga sitwasyon sadto nga nabutang siya sa alang-alang, ginakabig na lang niya ini nga isa ka eksperyensya nga nagtudlo sa iya kon paano mas mangin malapit sa iya pamilya.
Para sa akon, dapat na nga maglikaw si former Mayor Jed Mabilog sa mga sugyot kag paggamit sa iya sang mga pulitiko sa nasyunal nga lebel. Atubangon na lang niya sa korte ang mga kaso kag indi na magsige pa hambal ukon magpagamit sa bentaha sang iban nga pulitiko ilabi na nga nagahilapit ang eleksyon.
Indi na kinahanglan nga magsambod pa ang iya kapalaran sa ibabaw. Tama na ang leksyon sang nakalipas kag konsentrahan na lang niya ang paghatag sang tion kag serbisyo sa mga Ilonggo sa syudad sang Iloilo.
Sa nakalipas nga mga panahon, sa iya pagpabugnaw kag paghakus sa kalinong sa iban nga pungsod, possible nga nakilala na niya sing lubos ang mga tawo nga nagbulig gid sa iya nga wala sang kabaylo kag ang mga tawo nga masami ang pagdikit sa iya bangud nga may ginapangayo, gina-amar, gina-probitsar gikan sa iya nga kaalwan. May mga tawo nga nagduso sa iya sa kalaglagan, may mga tawo nga nagtikwang sa iya sa pil-as sang malain nga kapalaran.
Kahibalo kita nga indi madumot si former Mayor Jed Patrick Mabilog. Prangka ini siya kag ginahambal niya ang mga bagay nga wala niya nauyonan. Wala siya nagatanum sang kaakig kag indi siya kaangay sang iban nga nagayuhom sa atubang apang nagabuno sa likod.
Bagay lang nga diri siya magkonsentar sa syudad sang Iloilo, himakasan niya nga mapanas ang tap-ing nga ginpalhit sa iya ngalan. Dapat nga pabangunon sini ang iya dungog nga ginlinas sang iban nga tawo.
Matuod, indi niya malimpyuhan ang iya ngalan kon indi siya magbalik sa lugar kon sa diin madamo ang nagasimpatiya sa iya, nagasalig sa iya, nagataha sa iya, kag nagapati sa iya personalidad.
Kon ano man ang mangin masunod nga tikang ni former Mayor Jed Mabilog, kon wala pa sang conviction sa iya ginapangatubang ang kaso, may higayon siya nga pamatud-an sa mga nagaguba sa iya nga palangga gihapon siya sang iya mga pumuluyo sa syudad sang Iloilo.
Indi mahinago nga madamo sa karon ang nagasunod sa mga sitwasyon kon ano ang mga tikang nga ginahimo sang anay alkalde kag kon ano ang mga posible sini nga tikang sa palaabuton ilabi na nga sa Oktubre 1 na ang umpisa sang pag-file sang certificate of candidacy.
Madamo sang mga hitabu nga dapat lauman sa paglipas sang mga inadlaw, umpisa nga nagtungtong ang iya tiil sa Pilipinas tubtob sa sini nga takna. Madamo sang mga grupo sa negosyo kag pulitika ang nagabantay sa masunod nga hitabu, may nagapukwat-pukwat sa ila bangko, may nahidlaw na nga masugilanon siya, kag may mga ginakibang nga basi marumpag ang ila ginatungtungan nga pedestal.
Malawig pa ang mga inadlaw, madamo pa siya sang mabisitahan nga iya mga lideres sadto, madamo pa sila sang tion nga makasugilanon kon ano ang matuod nga sitwasyon sang syudad kag kon ano ang iya mabulig diri.
Lauman naton ang liwat nga pagpuron-puron sang mga lideres sadto nga tampad sa iya. Magatipon sila kag magapakita sang ila naandan nga pwersa. Liwat sila nga magatingog sa pagpangapin sa iya.
Indi mahinago nga may mabungkag nga grupo kag magabalik sa luyo ni Mabilog. Kahibalo sila kon sa diin sila nga duyan magasakay, kon sa diin sila hilway kag angay.
Sa pagtuhaw ni Mabilog, mangin tuhay ang dagway sang pulitika sa Iloilo, mangin tuhay ang pagtiyog sang sitwasyon kag mangin paborable sa mga Ilonggo nga ang handom amo ang masulhay nga pangginahum. (bertladera@gmail.com/PN)
