APAT NA ka aksidente ang nagluntad sa bahin sang Sunset Boulevard matapos ini ginbuksan sadtong Enero 24, 2025.
May mga nagkalapilasan kag ang mas masakit tungod nga may nauyang nga kabuhi bangud sa aksidente.
Makatulublag ini nga mga hitabu nga nagakaangay lamang nga hatagan sang gilayon nga igtalupangod kag solusyon agud nga malikawan nga may magluntad nga kaangay nga aksidente sa palaabuton.
Tungod sa asud-asod nga mga hitabu, nagapati ang iban nga posible mari-it ang ina nga bahin sang dalan sa Sunset Boulevard kon sa diin masami nagaluntad ang aksidente kag may nauyang nga kabuhi.
Apang, may mga nagasiling man nga kon maghalong ang nagamaneho malikawan sini nga maaksidente. Para sa ila, wala sang mari-it nga dalan, may yara lang sang kakulangan sa paghalong agud nga indi madisgrasya.
Mas maayo siguro nga ilakip sa pagplano kag konsiderahon ang kinaiya sang tawo kon mahuman ang proyekto, kon paano gamiton sang tawo, kon magdugok sila sa tion nga mahuman ang proyekto, kag kon ano ang epekto ukon impact sini sa mangin gawi sang pumuluyo.
Masami nga ginalantaw naton ang pangkabug-usan nga epekto sang proyekto sa pumuluyo kag kon kaisa indi pa handa ang pumuluyo sa pag-usar sini gani nga nagakatabu ang aksidente.
Indi malikawan, sa bisan diin man, basta may bag-o nga dalan, may madasig magpaladagan ang salakyan kag masami nga nagaluntad ang aksidente.
Ang buot ko silingon, antes naton buksan sa publiko, dapat naantisipar na naton ang sitwasyon. Wala sang bag-o nga bagay nga wala ginadugukan, ina bangud sa koryusidad sang tanan nga makita ukon ma-eksperyensyahan kon ano man ang ina nga proyekto. Normal sa iban nga tawo nga maganyat kag mahaylo nga magpadulong sa lugar nga ginadugukan. Bisan wala pa sang may nagasugo sa ila apang ang ila duna nga kinaiya nagaduso sa ila nga magpakigbahin sa sini nga lihok.
Diri naton nakita nga madamo sang kulang sa Sunset Boulevard kag ang ini nga mga kulang ang ginabuyagyag sang tagsa ka mga hitabu nga nagaluntad sa matag-adlaw nga tanan.
Imbis nga proactive, nangin reactive ang gobyerno lokal sa kon ano man nga mga hitabu nga nagaluntad. Kulang sa antisipasyon, wala ginalantaw ang posibilidad kag kabus sa angay nga mga plano.
Nagahatag sang solusyon sa tagsa ka may problema nga magatuhaw. Kuntani, naantisipar na kag may nakaplastar nga solusyon antes magluntad ang problema.
Ang Sunset Boulevard indi lamang normal nga dalan nga maagyan tungod may viewing deck ini nga naga-imbitar sa mga nagalabay nga maghapit, maghangaw-hangaw kag ang ini nga aktibidad nagatuga sang mga ginalauman nga aktibidad kaangay sang pagkaon kag personal nga pagkinahanglan.
Tungod bag-o, ginaganyat sini ang mga nagalabay nga maghapit kag magpalipas sang ginutlo antes magpauli kag maghaklu sang hangin samtang nagalantaw sa pagtunod sang adlaw.
Tungod sa matag-adlaw nga mga lihok sa palibot, Nakita nga wala sang portable toilet, wala sang basurahan, kulang sa streetlights, wala sang stoplights kag signages.
Nagtuhaw man ang pagkinahanglan nga dapat may mga traffic personnel kag iban pa nga nagaronda kag nagabantay sa sitwasyon sa palibot.
Dapat may CCTV camera agud nga mamonitor ang mga hitabu sa malawig nga dalan.
Kon planado kag plastado ang tanan matapos nga ini ang buksan, posible nga nalikawan ang pagluntad sang mga wala ginalauman nga aksidente kag iban pa nga mga insidente.
Mahilig kita sa atado nga proyekto kag hampol-hampulan lang sang solusyon kon may yara na sang insidente nga nagluntad.
Dapat nakapreparar na ang mga signages nga nagapaandam sa mga motorista, ilabi na kon wala pa traffic lights, kon wala pa sang traffic personnel, agud nga mahibaluan sang mga nagalabay ang sitwasyon kag may yara na sila sang antisipasyon sa mga posibilidad nga ila maatubang.
Malikawan ang aksidente kon maghalong ang tanan. Wala sang mari-it nga dalan sa makahibalo magkalkulo sa iya nahamtangan, kon kahibalo mag-antisipar sa posible nga matabu kag wala nagapatumbaya sa iya kaugalingon.
Kon maplastar na ang tanan nga kinahanglanon, kaangay sang mga streetlight, stoplight kag signage sa Sunset Boulevard, mahagan-hagan na ang pagluntad sang aksidente. Kag, kon maghalong ang nagamaneho, daku ang posibilidad nga malikawan na ang pagluntad sang vehicular accident.
Nagalaum kita nga kuntani mangin leksyon ukon pagtulon-an ini para sa mga masunod nga proyekto nga ipatuman sang gobyerno. Indi lang kita magdulog sa punto nga may ginadul-ong kita nga proyekto sa pumuluyo, dapat nga kutob sa panahon nga ginagamit ang proyekto kag tun-an gid naton ang posible nga mangin reaksyon sang tawo lakip ang pag-antisipar sa mangin solusyon para sa sini nga mga problema.
Dapat may pondo nga itigana, sa tion nga mahuman ang proyekto, agud gamiton sa mga accessories tungod sa masami ang pondo para lang mismo sa infrastructure. Kag ini ang rason kon ngaa nagapanglaghap pa para sa mga kinahanglanon nga dapat ipahamtang sa sini nga proyekto.
Kabay nga wala na sang may mauyang pa nga kabuhi ukon daku nga aksidente nga magluntad sa Sunset Boulevard. (bertladera@gmail.com/PN)
