NI Cyrus M. Garde
Syudad sang BACOLOD – Nadakpan ang isa ka pulis nga nagahupot sang gina-alegar shabu kag paltik nga armas sa ginpatigayon nga “Oplan Bakal” sa mga KTV bar sa Syudad sang Victorias, Negros Occidental, Martes sang kaagahon.
Sa pagpamuno ni Supt. Santiago Rapiz, hepe sang Victorias City PNP, na-aresto si PO1 Reylan Berja Bordas, 24, soltero kag pumoluyo sang Mauyon, banwa sang Manapla.
Nakuha sa paghinakop ni Bordas ang isa ka malaba nga sachet sang ginasuspetsahan shabu kag paltik nga .38 kalibre nga armas nga may anum ka mga bala.
Nadakpan ini sang magsulod ang mga pulis sa mga KTV bar sa may highway sa Crossing Daanbanwa sang amo nga syudad ala-1:30 sa kaagahon sang Martes.
Priso na sia subong sa selda sang Victorias City PNP.
Madumdoman nga si Bordas ang isa sa mga pulis sa Negros Occidental nga nagpositibo sa droga sang ginpatigayon ang drug test sining karon lamang.
Gina-alegar nga naga-gamit ini kag nagabaligya shabu kag mga armas./H
