[av_one_full first min_height=” vertical_alignment=” space=” custom_margin=” margin=’0px’ padding=’0px’ border=” border_color=” radius=’0px’ background_color=” src=” background_position=’top left’ background_repeat=’no-repeat’ animation=”]
[av_heading heading=’PAUTWAS! ‘ tag=’h3′ style=’blockquote modern-quote’ size=” subheading_active=’subheading_below’ subheading_size=’15’ padding=’10’ color=” custom_font=”]
BY JOEL FRANCO
[/av_heading]
[av_textblock size=” font_color=” color=”]
Panguma sa syudad
ANG PANGUMA nagahatag kabuhi sa kadam-an sang mga Filipino. Apang bangud sang ginatawag nga urbanization, amat-amat nga nagakitid ang lugar nga ginatalauma.
Ang pagsangkad sang kasyudaran pamahog sa siguridad sa pagkaon. Diri nagsulod ang mga paghimakas sang gobyerno kun paano mapasulod ang panguma sa syudad.
Diri sa Iloilo, may mga lugar pa man nga ginpain sa panguma kaangay sang mga barangay sang Lanit kag mga kaiping nga barangay sa Jaro, kag pila ka barangay sa Mandurriao.
Samtang masako ang aton gobyerno sa away kontra sa ilegal nga droga, napabay-an na ang aspeto sang palangabuhian nga amo man ang nangin ugat sining aton problema sa sosyodad.
Ang kagutom amo ang nagapanguna nga kabangdanan kun nga-a nagakabiktima ang kadam-an sa ilegal nga droga. Gani dapat hatagan sang dako nga pagtamod ang palangabuhian sang mga pumuluyo.
Sining karon lang nagpaidalum sa paghanas ang 70 ka mangunguma nga katapo sang Iloilo City-Wide Farmers Association (ICWFA) kag Iloilo Organic Agriculture Alliance (ICOAAL) angut sa native swine sa City Hall Penthouse. Ang Office of the City Agriculturist (CAO) ang nag-initiate sang native swine dispersal and raising program.
Suno kay Mayor Jed Patrick Mabilog ang initiative magahatag palangabuhian sa mga beneficiaries kag magapasanyog pa sang organic farming sa syudad.
May 12 ka idik ang umpisahan nga saguron sa Monte Verde Farm sa Barangay Bito-on, Jaro agud mag-develop sang nayon. Target diri ang re-dispersal sang 120 ka mga idik sa sulod sang duha ka tuig para ipanagtag sa mga katapo sang talapuanan.
Ang proyekto ginpondohan sang Department of Agriculture matapos ginpropose sang City Agriculture Office (CAO) sa pagpamuno ni Romulo Pangantihon. Gintun-an diri kun paano magsagod sang baboy sa syudad nga indi makahalit sa palibot paagi sa organiko nga pamaagi.
Maluwas sini may nagapadayun na nga programa ang syudad – ang Integrated Community Food Production Program (ICFP). Nagapanagtag ang CAO sang 11 ka baridad sang utanon nga Makita sa bahay kubo. Target sini ang 70 ka barangay gikan sa pito ka distrito sang syudad nga pagabug-usan sang 2,000 ka pinakaimol nga pumuluyo. Mismo ang syudad ang nagapatubo sang binhi kag ihatag na lang agud itanum sang mga beneficiaries. Paagi sini nga programa, ginalauman nga mapahagan-hagan ang kagutom kag mapasanyog ang nutritional status kag economic status sang isa ka panimalay.
Ini nga mga programa dapat sakdagun bangud dako ang mabulig sini sa mga pumuluyo sa pagpasanyog sang ila kabuhi. Kabay nga ini nga programa mapadayun kag tamdon sang husto sang mga beneficiaries. Pamatuod ini nga bisan diin ka lang kun mapisan ka, indi kamagutuman kag mabuhi ka sa disente nga pamaagi. Indi na kinahanglan nga ibuhi sang kabuhi kag palaabuton sa pagsulod sa mga ilegal nga hilikuton.
Dapat mangin kabahin ang panguma sa atun pangabuhi sa syudad. Ang simple nga pagtanom sang sibuyas-dahon sa buka nga container ukon royda sang salakyan dako na nga bagay sa isa ka panimalay. Mahimo man makatanum sang balatong kag ipakabod lang sa kudal sang balay. Pwede man tamnan ang mga daan kag basiyo sang soft drinks kag ibitay sa pader. Ang gardening mayo sa panglawason. Maayo ini nga exercise bangud mataas ang calories nga masunog samtang nagatrabaho sa garden.
Ligwaton na naton ang pagbinatasan nga magsalig sang aton pagkaon sa tindahan. Kun mahimo man lang nga mapatubo sang utanon sa atun balay, himuon ta bangud dako ini nga buhin sa atun kagastuhanan sa pagkaon.
Ti-on na nga tun-an naton ang pagpanguma sa syudad!/PN
[/av_textblock]
[/av_one_full]
