[av_one_full first min_height=” vertical_alignment=” space=” custom_margin=” margin=’0px’ padding=’0px’ border=” border_color=” radius=’0px’ background_color=” src=” background_position=’top left’ background_repeat=’no-repeat’ animation=”]
[av_heading heading=’PAUTWAS! ‘ tag=’h3′ style=’blockquote modern-quote’ size=” subheading_active=’subheading_below’ subheading_size=’15’ padding=’10’ color=” custom_font=”]
BY JOEL FRANCO
[/av_heading]
[av_textblock size=” font_color=” color=”]
Pavia, Oton, San Miguel wala sang kaugalingon nga basurahan
ANG PAGKONTROL sang basura isa karon sang dako nga alatubangon nga problema sang tagsa ka pamunuan lokal.
Sa pagbanta sang Solid Waste Management Commission, may kapin sa isa ka gatos nga mga local government units (LGU) nga posible magapangatubang sang paglapas sang Republic Act 9003 ukon ang Comprehensive Solid Waste Management Act bangud wala sila sang kaugalingon nga basurahan ukon padayun sila nga naga-operate sang open dump site.
May mga banwa na sa Iloilo nga nakasuhan kag nagatubang na sa Environmental Ombudsman. Ini ang mga banwa sang Santa Barbara, Ajuy, Concepcion, Banate kag Sara sa Iloilo, kag Nabas sa Aklan. Ini nga mga banwa natukiban nga padayun nga naga-operate sang open dumpsite.
Pero nahibaluan n’yo bala nga may tatlo ka banwa sa probinsya sang Iloilo nga wala gid sang ila kaugalingon nga halabuyan sang basura? Ini nga mga banwa diri pa sa syudad sang Iloilo nagahaboy sang ila basura matapos magpirma sang kasugtanan sa syudad. Ang banwa sang Pavia, Oton kag San Miguel diri nagaula sang ila basura sa syudad sang Iloilo bangud wala sila sang kaugalingon nga basurahan. May nalapas bala sila nga kasuguan?
Siling ni Deputy Ombudsman for Luzon kag Environmental Ombudsman Atty. Gerard Mosquera, wala man sang ginlapas nga kasuguan ining tatlo ka banwa bangud ginapahanugutan man ang clustering sang mga LGUs sa pagtukod sang basuran ukon sanitary landfill.
Wala matuod sila sang nalapas nga kasuguan pero, patas bala ina nga wala sila nagahimakas agud magpatindog sang ila kaugalingon nga sanitary landfill?
Ang Oton first-class municipality samtang ang Pavia second-class kag ang San Miguel fourth-class. Kun tan-awon naton, pwede mahangpan ang banwa sang san Miguel bangud gamay ini apang ang Oton kag Pavia mga dalagko ini nga banwa.
Indi gid man bala sila makarasang magpatindog sang landfill? Ukon nagasalig na lang sila bangud may pasilidad man ang syudad sang Iloilo?
Masubo paminsaron nga nagapabugal sang dalagko nga mga proyekto kag developments ang Oton kag Pavia apang wala gale sang halabuyan sang basura nga importante para sa isa ka mauswagon nga LGU.
Ang syudad sang Iloilo may average nga 260 ka tonelada nga basura kada adlaw. Te kun dugangan pa sang basura gikan sa sining tatlo ka banwa, pila na ayhan ka tonelada kada adlaw ang nagasulod sa sanitary landfill sang syudad?
Ang lifespan sang landfill tubtob lamang sa pulo ka tuig suno sa General Services Office. Kun magtingub pa ang basura gikan sa Oton, Pavia kag San Miguel basi mas magalip-ot pa gid ang kabuhi sang aton landfill.
Tubtob san-o magabaton sang basura sang sini nga mga banwa ang syudad? Indi man makabalibad ang LGU sang Iloilo City bangud bilang dako nga syudad dapat mangin kaangay sya nga magulang sa kaiping nga mga banwa. Dugangan pa nga katapo sila sang Metro Iloilo-Guimaras Economic Development Council (MIGEDC), tapat pa gid nga may katungdanan ang syudad sa sini nga mga banwa nga buligan sa ila mga kakulangan.
Te indi na lang maghimakas ang mga opisyal sining mga banwa agud maka-angkon sang ila kaugalingon nga landfill?
Kabay nga indi na maghulat ini nga mga banwa nga mangin bukid na ang problema sa basura antes maghulag.
Kabay pa!/PN
[/av_textblock]
[/av_one_full]
